dn9:49.1 “Yasmiṁ, citta, samaye oḷāriko attapaṭilābho hoti, neva tasmiṁ samaye manomayo attapaṭilābhoti saṅkhaṁ gacchati, na arūpo attapaṭilābhoti saṅkhaṁ gacchati;
BAGIAN 49
dn9:49.2 oḷāriko attapaṭilābhotveva tasmiṁ samaye saṅkhaṁ gacchati.
dn9:49.3 Yasmiṁ, citta, samaye manomayo attapaṭilābho hoti, neva tasmiṁ samaye oḷāriko attapaṭilābhoti saṅkhaṁ gacchati, na arūpo attapaṭilābhoti saṅkhaṁ gacchati;
dn9:49.4 manomayo attapaṭilābhotveva tasmiṁ samaye saṅkhaṁ gacchati.
dn9:49.5 Yasmiṁ, citta, samaye arūpo attapaṭilābho hoti, neva tasmiṁ samaye oḷāriko attapaṭilābhoti saṅkhaṁ gacchati, na manomayo attapaṭilābhoti saṅkhaṁ gacchati;
dn9:49.6 arūpo attapaṭilābhotveva tasmiṁ samaye saṅkhaṁ gacchati.
dn9:49.7 Sace taṁ, citta, evaṁ puccheyyuṁ:
dn9:49.8 ‘ahosi tvaṁ atītamaddhānaṁ, na tvaṁ nāhosi;
dn9:49.9 bhavissasi tvaṁ anāgatamaddhānaṁ, na tvaṁ na bhavissasi;
dn9:49.10 atthi tvaṁ etarahi, na tvaṁ natthī’ti.
dn9:49.11 Evaṁ puṭṭho tvaṁ, citta, kinti byākareyyāsī”ti?
dn9:49.12 “Sace maṁ, bhante, evaṁ puccheyyuṁ:
dn9:49.13 ‘ahosi tvaṁ atītamaddhānaṁ, na tvaṁ na ahosi;
dn9:49.14 bhavissasi tvaṁ anāgatamaddhānaṁ, na tvaṁ na bhavissasi;
dn9:49.15 atthi tvaṁ etarahi, na tvaṁ natthī’ti.
dn9:49.16 Evaṁ puṭṭho ahaṁ, bhante, evaṁ byākareyyaṁ:
dn9:49.17 ‘ahosāhaṁ atītamaddhānaṁ, nāhaṁ na ahosiṁ;
dn9:49.18 bhavissāmahaṁ anāgatamaddhānaṁ, nāhaṁ na bhavissāmi;
dn9:49.19 atthāhaṁ etarahi, nāhaṁ natthī’ti.
dn9:49.20 Evaṁ puṭṭho ahaṁ, bhante, evaṁ byākareyyan”ti.