dn9:33.1 “Sabbeva kho ete, poṭṭhapāda, paribbājakā andhā acakkhukā;
BAGIAN 33
dn9:33.2 tvaṁyeva nesaṁ eko cakkhumā.
dn9:33.3 Ekaṁsikāpi hi kho, poṭṭhapāda, mayā dhammā desitā paññattā;
dn9:33.4 anekaṁsikāpi hi kho, poṭṭhapāda, mayā dhammā desitā paññattā.
dn9:33.5 Katame ca te, poṭṭhapāda, mayā anekaṁsikā dhammā desitā paññattā?
dn9:33.6 ‘Sassato loko’ti kho, poṭṭhapāda, mayā anekaṁsiko dhammo desito paññatto;
dn9:33.7 ‘asassato loko’ti kho, poṭṭhapāda, mayā anekaṁsiko dhammo desito paññatto;
dn9:33.8 ‘antavā loko’ti kho, poṭṭhapāda …pe…
dn9:33.9 ‘anantavā loko’ti kho, poṭṭhapāda …
dn9:33.10 ‘taṁ jīvaṁ taṁ sarīran’ti kho, poṭṭhapāda …
dn9:33.11 ‘aññaṁ jīvaṁ aññaṁ sarīran’ti kho, poṭṭhapāda …
dn9:33.12 ‘hoti tathāgato paraṁ maraṇā’ti kho, poṭṭhapāda …
dn9:33.13 na hoti tathāgato paraṁ maraṇā’ti kho, poṭṭhapāda …
dn9:33.14 ‘hoti ca na ca hoti tathāgato paraṁ maraṇā’ti kho, poṭṭhapāda …
dn9:33.15 ‘neva hoti na na hoti tathāgato paraṁ maraṇā’ti kho, poṭṭhapāda, mayā anekaṁsiko dhammo desito paññatto.
dn9:33.16 Kasmā ca te, poṭṭhapāda, mayā anekaṁsikā dhammā desitā paññattā?
dn9:33.17 Na hete, poṭṭhapāda, atthasaṁhitā na dhammasaṁhitā na ādibrahmacariyakā na nibbidāya na virāgāya na nirodhāya na upasamāya na abhiññāya na sambodhāya na nibbānāya saṁvattanti.
dn9:33.18 Tasmā te mayā anekaṁsikā dhammā desitā paññattā.
dn9:33.19.0 2.1. Ekaṁsikadhammā
dn9:33.20 Katame ca te, poṭṭhapāda, mayā ekaṁsikā dhammā desitā paññattā?
dn9:33.21 Idaṁ dukkhanti kho, poṭṭhapāda, mayā ekaṁsiko dhammo desito paññatto.
dn9:33.22 Ayaṁ dukkhasamudayoti kho, poṭṭhapāda, mayā ekaṁsiko dhammo desito paññatto.
dn9:33.23 Ayaṁ dukkhanirodhoti kho, poṭṭhapāda, mayā ekaṁsiko dhammo desito paññatto.
dn9:33.24 Ayaṁ dukkhanirodhagāminī paṭipadāti kho, poṭṭhapāda, mayā ekaṁsiko dhammo desito paññatto.
dn9:33.25 Kasmā ca te, poṭṭhapāda, mayā ekaṁsikā dhammā desitā paññattā?
dn9:33.26 Ete hi, poṭṭhapāda, atthasaṁhitā, ete dhammasaṁhitā, ete ādibrahmacariyakā ete nibbidāya virāgāya nirodhāya upasamāya abhiññāya sambodhāya nibbānāya saṁvattanti.
dn9:33.27 Tasmā te mayā ekaṁsikā dhammā desitā paññattā.