dn8:22.1 Ṭhānaṁ kho panetaṁ, kassapa, vijjati, yaṁ aññatitthiyā paribbājakā evaṁ vadeyyuṁ:
BAGIAN 22
dn8:22.2 ‘sīhanādaṁ kho samaṇo gotamo nadati, tañca kho suññāgāre nadati, no parisāsū’ti.
dn8:22.3 Te: ‘mā hevan’tissu vacanīyā.
dn8:22.4 ‘Sīhanādañca samaṇo gotamo nadati, parisāsu ca nadatī’ti evamassu, kassapa, vacanīyā.
dn8:22.5 Ṭhānaṁ kho panetaṁ, kassapa, vijjati, yaṁ aññatitthiyā paribbājakā evaṁ vadeyyuṁ:
dn8:22.6 ‘sīhanādañca samaṇo gotamo nadati, parisāsu ca nadati, no ca kho visārado nadatī’ti.
dn8:22.7 Te: ‘mā hevan’tissu vacanīyā.
dn8:22.8 ‘Sīhanādañca samaṇo gotamo nadati, parisāsu ca nadati, visārado ca nadatī’ti evamassu, kassapa, vacanīyā.
dn8:22.9 Ṭhānaṁ kho panetaṁ, kassapa, vijjati, yaṁ aññatitthiyā paribbājakā evaṁ vadeyyuṁ:
dn8:22.10 ‘sīhanādañca samaṇo gotamo nadati, parisāsu ca nadati, visārado ca nadati, no ca kho naṁ pañhaṁ pucchanti …pe…
dn8:22.11 pañhañca naṁ pucchanti; no ca kho nesaṁ pañhaṁ puṭṭho byākaroti …pe…
dn8:22.12 pañhañca nesaṁ puṭṭho byākaroti; no ca kho pañhassa veyyākaraṇena cittaṁ ārādheti …pe…
dn8:22.13 pañhassa ca veyyākaraṇena cittaṁ ārādheti; no ca kho sotabbaṁ maññanti …pe…
dn8:22.14 sotabbañcassa maññanti; no ca kho sutvā pasīdanti …pe…
dn8:22.15 sutvā cassa pasīdanti; no ca kho pasannākāraṁ karonti …pe…
dn8:22.16 pasannākārañca karonti; no ca kho tathattāya paṭipajjanti …pe…
dn8:22.17 tathattāya ca paṭipajjanti; no ca kho paṭipannā ārādhentī’ti.
dn8:22.18 Te: ‘mā hevan’tissu vacanīyā.
dn8:22.19 ‘Sīhanādañca samaṇo gotamo nadati, parisāsu ca nadati, visārado ca nadati, pañhañca naṁ pucchanti, pañhañca nesaṁ puṭṭho byākaroti, pañhassa ca veyyākaraṇena cittaṁ ārādheti, sotabbañcassa maññanti, sutvā cassa pasīdanti, pasannākārañca karonti, tathattāya ca paṭipajjanti, paṭipannā ca ārādhentī’ti evamassu, kassapa, vacanīyā.