dn4:8.1 Atha kho soṇadaṇḍassa brāhmaṇassa tirovanasaṇḍagatassa evaṁ cetaso parivitakko udapādi:
BAGIAN 8
dn4:8.2 “ahañceva kho pana samaṇaṁ gotamaṁ pañhaṁ puccheyyaṁ;
dn4:8.3 tatra ce maṁ samaṇo gotamo evaṁ vadeyya:
dn4:8.4 ‘na kho esa, brāhmaṇa, pañho evaṁ pucchitabbo, evaṁ nāmesa, brāhmaṇa, pañho pucchitabbo’ti, tena maṁ ayaṁ parisā paribhaveyya:
dn4:8.5 ‘bālo soṇadaṇḍo brāhmaṇo abyatto, nāsakkhi samaṇaṁ gotamaṁ yoniso pañhaṁ pucchitun’ti.
dn4:8.6 Yaṁ kho panāyaṁ parisā paribhaveyya, yasopi tassa hāyetha.
dn4:8.7 Yassa kho pana yaso hāyetha, bhogāpi tassa hāyeyyuṁ.
dn4:8.8 Yasoladdhā kho panamhākaṁ bhogā.
dn4:8.9 Mamañceva kho pana samaṇo gotamo pañhaṁ puccheyya, tassa cāhaṁ pañhassa veyyākaraṇena cittaṁ na ārādheyyaṁ;
dn4:8.10 tatra ce maṁ samaṇo gotamo evaṁ vadeyya:
dn4:8.11 ‘na kho esa, brāhmaṇa, pañho evaṁ byākātabbo, evaṁ nāmesa, brāhmaṇa, pañho byākātabbo’ti, tena maṁ ayaṁ parisā paribhaveyya:
dn4:8.12 ‘bālo soṇadaṇḍo brāhmaṇo abyatto, nāsakkhi samaṇassa gotamassa pañhassa veyyākaraṇena cittaṁ ārādhetun’ti.
dn4:8.13 Yaṁ kho panāyaṁ parisā paribhaveyya, yasopi tassa hāyetha.
dn4:8.14 Yassa kho pana yaso hāyetha, bhogāpi tassa hāyeyyuṁ.
dn4:8.15 Yasoladdhā kho panamhākaṁ bhogā.
dn4:8.16 Ahañceva kho pana evaṁ samīpagato samāno adisvāva samaṇaṁ gotamaṁ nivatteyyaṁ, tena maṁ ayaṁ parisā paribhaveyya:
dn4:8.17 ‘bālo soṇadaṇḍo brāhmaṇo abyatto mānathaddho bhīto ca, no visahati samaṇaṁ gotamaṁ dassanāya upasaṅkamituṁ, kathañhi nāma evaṁ samīpagato samāno adisvā samaṇaṁ gotamaṁ nivattissatī’ti.
dn4:8.18 Yaṁ kho panāyaṁ parisā paribhaveyya, yasopi tassa hāyetha.
dn4:8.19 Yassa kho pana yaso hāyetha, bhogāpi tassa hāyeyyuṁ,
dn4:8.20 yasoladdhā kho panamhākaṁ bhogā”ti.