dn3:2.1.0 4. Vijjācaraṇakathā
BAGIAN 2
dn3:2.1.1 “Katamaṁ pana taṁ, bho gotama, caraṇaṁ, katamā ca pana sā vijjā”ti?
dn3:2.1.2 “Na kho, ambaṭṭha, anuttarāya vijjācaraṇasampadāya jātivādo vā vuccati, gottavādo vā vuccati, mānavādo vā vuccati:
dn3:2.1.3 ‘arahasi vā maṁ tvaṁ, na vā maṁ tvaṁ arahasī’ti.
dn3:2.1.4 Yattha kho, ambaṭṭha, āvāho vā hoti, vivāho vā hoti, āvāhavivāho vā hoti, etthetaṁ vuccati jātivādo vā itipi gottavādo vā itipi mānavādo vā itipi:
dn3:2.1.5 ‘arahasi vā maṁ tvaṁ, na vā maṁ tvaṁ arahasī’ti.
dn3:2.1.6 Ye hi keci, ambaṭṭha, jātivādavinibaddhā vā gottavādavinibaddhā vā mānavādavinibaddhā vā āvāhavivāhavinibaddhā vā, ārakā te anuttarāya vijjācaraṇasampadāya.
dn3:2.1.7 Pahāya kho, ambaṭṭha, jātivādavinibaddhañca gottavādavinibaddhañca mānavādavinibaddhañca āvāhavivāhavinibaddhañca anuttarāya vijjācaraṇasampadāya sacchikiriyā hotī”ti.
dn3:2.2.1 “Katamaṁ pana taṁ, bho gotama, caraṇaṁ, katamā ca sā vijjā”ti?
dn3:2.2.2 “Idha, ambaṭṭha, tathāgato loke uppajjati arahaṁ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṁ buddho bhagavā.
dn3:2.2.3 So imaṁ lokaṁ sadevakaṁ samārakaṁ sabrahmakaṁ sassamaṇabrāhmaṇiṁ pajaṁ sadevamanussaṁ sayaṁ abhiññā sacchikatvā pavedeti.
dn3:2.2.4 So dhammaṁ deseti ādikalyāṇaṁ majjhekalyāṇaṁ pariyosānakalyāṇaṁ sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ pakāseti.
dn3:2.2.5 Taṁ dhammaṁ suṇāti gahapati vā gahapatiputto vā aññatarasmiṁ vā kule paccājāto.
dn3:2.2.6 So taṁ dhammaṁ sutvā tathāgate saddhaṁ paṭilabhati.
dn3:2.2.7 So tena saddhāpaṭilābhena samannāgato iti paṭisañcikkhati …pe…
dn3:2.2.8 So vivicceva kāmehi, vivicca akusalehi dhammehi, savitakkaṁ savicāraṁ vivekajaṁ pītisukhaṁ paṭhamaṁ jhānaṁ upasampajja viharati …pe…
dn3:2.2.9 idampissa hoti caraṇasmiṁ.
dn3:2.2.10 Puna caparaṁ, ambaṭṭha, bhikkhu vitakkavicārānaṁ vūpasamā ajjhattaṁ sampasādanaṁ cetaso ekodibhāvaṁ avitakkaṁ avicāraṁ samādhijaṁ pītisukhaṁ dutiyaṁ jhānaṁ upasampajja viharati …pe…
dn3:2.2.11 idampissa hoti caraṇasmiṁ.
dn3:2.2.12 Puna caparaṁ, ambaṭṭha, bhikkhu pītiyā ca virāgā upekkhako ca viharati sato ca sampajāno, sukhañca kāyena paṭisaṁvedeti, yaṁ taṁ ariyā ācikkhanti: ‘upekkhako satimā sukhavihārī’ti, tatiyaṁ jhānaṁ upasampajja viharati …pe…
dn3:2.2.13 idampissa hoti caraṇasmiṁ.
dn3:2.2.14 Puna caparaṁ, ambaṭṭha, bhikkhu sukhassa ca pahānā dukkhassa ca pahānā, pubbeva somanassadomanassānaṁ atthaṅgamā adukkhamasukhaṁ upekkhāsatipārisuddhiṁ catutthaṁ jhānaṁ upasampajja viharati …pe…
dn3:2.2.15 idampissa hoti caraṇasmiṁ.
dn3:2.2.16 Idaṁ kho taṁ, ambaṭṭha, caraṇaṁ.
dn3:2.2.17 So evaṁ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte ñāṇadassanāya cittaṁ abhinīharati abhininnāmeti …pe…
dn3:2.2.18 idampissa hoti vijjāya …pe…
dn3:2.2.19 nāparaṁ itthattāyāti pajānāti,
dn3:2.2.20 idampissa hoti vijjāya.
dn3:2.2.21 Ayaṁ kho sā, ambaṭṭha, vijjā.
dn3:2.2.22 Ayaṁ vuccati, ambaṭṭha, bhikkhu ‘vijjāsampanno’ itipi, ‘caraṇasampanno’ itipi, ‘vijjācaraṇasampanno’ itipi.
dn3:2.2.23 Imāya ca, ambaṭṭha, vijjāsampadāya caraṇasampadāya ca aññā vijjāsampadā ca caraṇasampadā ca uttaritarā vā paṇītatarā vā natthi.
dn3:2.3.0 5. Catuapāyamukha
dn3:2.3.1 Imāya kho, ambaṭṭha, anuttarāya vijjācaraṇasampadāya cattāri apāyamukhāni bhavanti.
dn3:2.3.2 Katamāni cattāri?
dn3:2.3.3 Idha, ambaṭṭha, ekacco samaṇo vā brāhmaṇo vā imaññeva anuttaraṁ vijjācaraṇasampadaṁ anabhisambhuṇamāno khārividhamādāya araññāyatanaṁ ajjhogāhati:
dn3:2.3.4 ‘pavattaphalabhojano bhavissāmī’ti.
dn3:2.3.5 So aññadatthu vijjācaraṇasampannasseva paricārako sampajjati.
dn3:2.3.6 Imāya kho, ambaṭṭha, anuttarāya vijjācaraṇasampadāya idaṁ paṭhamaṁ apāyamukhaṁ bhavati.
dn3:2.3.7 Puna caparaṁ, ambaṭṭha, idhekacco samaṇo vā brāhmaṇo vā imañceva anuttaraṁ vijjācaraṇasampadaṁ anabhisambhuṇamāno pavattaphalabhojanatañca anabhisambhuṇamāno kudālapiṭakaṁ ādāya araññavanaṁ ajjhogāhati:
dn3:2.3.8 ‘kandamūlaphalabhojano bhavissāmī’ti.
dn3:2.3.9 So aññadatthu vijjācaraṇasampannasseva paricārako sampajjati.
dn3:2.3.10 Imāya kho, ambaṭṭha, anuttarāya vijjācaraṇasampadāya idaṁ dutiyaṁ apāyamukhaṁ bhavati.
dn3:2.3.11 Puna caparaṁ, ambaṭṭha, idhekacco samaṇo vā brāhmaṇo vā imañceva anuttaraṁ vijjācaraṇasampadaṁ anabhisambhuṇamāno pavattaphalabhojanatañca anabhisambhuṇamāno kandamūlaphalabhojanatañca anabhisambhuṇamāno gāmasāmantaṁ vā nigamasāmantaṁ vā agyāgāraṁ karitvā aggiṁ paricaranto acchati.
dn3:2.3.12 So aññadatthu vijjācaraṇasampannasseva paricārako sampajjati.
dn3:2.3.13 Imāya kho, ambaṭṭha, anuttarāya vijjācaraṇasampadāya idaṁ tatiyaṁ apāyamukhaṁ bhavati.
dn3:2.3.14 Puna caparaṁ, ambaṭṭha, idhekacco samaṇo vā brāhmaṇo vā imaṁ ceva anuttaraṁ vijjācaraṇasampadaṁ anabhisambhuṇamāno pavattaphalabhojanatañca anabhisambhuṇamāno kandamūlaphalabhojanatañca anabhisambhuṇamāno aggipāricariyañca anabhisambhuṇamāno cātumahāpathe catudvāraṁ agāraṁ karitvā acchati:
dn3:2.3.15 ‘yo imāhi catūhi disāhi āgamissati samaṇo vā brāhmaṇo vā, tamahaṁ yathāsatti yathābalaṁ paṭipūjessāmī’ti.
dn3:2.3.16 So aññadatthu vijjācaraṇasampannasseva paricārako sampajjati.
dn3:2.3.17 Imāya kho, ambaṭṭha, anuttarāya vijjācaraṇasampadāya idaṁ catutthaṁ apāyamukhaṁ bhavati.
dn3:2.3.18 Imāya kho, ambaṭṭha, anuttarāya vijjācaraṇasampadāya imāni cattāri apāyamukhāni bhavanti.
dn3:2.4.1 Taṁ kiṁ maññasi, ambaṭṭha,
dn3:2.4.2 api nu tvaṁ imāya anuttarāya vijjācaraṇasampadāya sandissasi sācariyako”ti?
dn3:2.4.3 “No hidaṁ, bho gotama.
dn3:2.4.4 Kocāhaṁ, bho gotama, sācariyako, kā ca anuttarā vijjācaraṇasampadā?
dn3:2.4.5 Ārakāhaṁ, bho gotama, anuttarāya vijjācaraṇasampadāya sācariyako”ti.
dn3:2.4.6 “Taṁ kiṁ maññasi, ambaṭṭha,
dn3:2.4.7 api nu tvaṁ imañceva anuttaraṁ vijjācaraṇasampadaṁ anabhisambhuṇamāno khārividhamādāya araññavanamajjhogāhasi sācariyako:
dn3:2.4.8 ‘pavattaphalabhojano bhavissāmī’”ti?
dn3:2.4.9 “No hidaṁ, bho gotama”.
dn3:2.4.10 “Taṁ kiṁ maññasi, ambaṭṭha,
dn3:2.4.11 api nu tvaṁ imañceva anuttaraṁ vijjācaraṇasampadaṁ anabhisambhuṇamāno pavattaphalabhojanatañca anabhisambhuṇamāno kudālapiṭakaṁ ādāya araññavanamajjhogāhasi sācariyako:
dn3:2.4.12 ‘kandamūlaphalabhojano bhavissāmī’”ti?
dn3:2.4.13 “No hidaṁ, bho gotama”.
dn3:2.4.14 “Taṁ kiṁ maññasi, ambaṭṭha,
dn3:2.4.15 api nu tvaṁ imañceva anuttaraṁ vijjācaraṇasampadaṁ anabhisambhuṇamāno pavattaphalabhojanatañca anabhisambhuṇamāno kandamūlaphalabhojanatañca anabhisambhuṇamāno gāmasāmantaṁ vā nigamasāmantaṁ vā agyāgāraṁ karitvā aggiṁ paricaranto acchasi sācariyako”ti?
dn3:2.4.16 “No hidaṁ, bho gotama”.
dn3:2.4.17 “Taṁ kiṁ maññasi, ambaṭṭha,
dn3:2.4.18 api nu tvaṁ imañceva anuttaraṁ vijjācaraṇasampadaṁ anabhisambhuṇamāno pavattaphalabhojanatañca anabhisambhuṇamāno kandamūlaphalabhojanatañca anabhisambhuṇamāno aggipāricariyañca anabhisambhuṇamāno cātumahāpathe catudvāraṁ agāraṁ karitvā acchasi sācariyako:
dn3:2.4.19 ‘yo imāhi catūhi disāhi āgamissati samaṇo vā brāhmaṇo vā, taṁ mayaṁ yathāsatti yathābalaṁ paṭipūjessāmā’”ti?
dn3:2.4.20 “No hidaṁ, bho gotama”.
dn3:2.5.1 “Iti kho, ambaṭṭha, imāya ceva tvaṁ anuttarāya vijjācaraṇasampadāya parihīno sācariyako.
dn3:2.5.2 Ye cime anuttarāya vijjācaraṇasampadāya cattāri apāyamukhāni bhavanti, tato ca tvaṁ parihīno sācariyako.
dn3:2.5.3 Bhāsitā kho pana te esā, ambaṭṭha, ācariyena brāhmaṇena pokkharasātinā vācā:
dn3:2.5.4 ‘ke ca muṇḍakā samaṇakā ibbhā kaṇhā bandhupādāpaccā, kā ca tevijjānaṁ brāhmaṇānaṁ sākacchā’ti attanā āpāyikopi aparipūramāno.
dn3:2.5.5 Passa, ambaṭṭha, yāva aparaddhañca te idaṁ ācariyassa brāhmaṇassa pokkharasātissa.
dn3:2.6.0 6. Pubbakaisibhāvānuyoga
dn3:2.6.1 Brāhmaṇo kho pana, ambaṭṭha, pokkharasāti rañño pasenadissa kosalassa dattikaṁ bhuñjati.
dn3:2.6.2 Tassa rājā pasenadi kosalo sammukhībhāvampi na dadāti.
dn3:2.6.3 Yadāpi tena manteti, tirodussantena manteti.
dn3:2.6.4 Yassa kho pana, ambaṭṭha, dhammikaṁ payātaṁ bhikkhaṁ paṭiggaṇheyya, kathaṁ tassa rājā pasenadi kosalo sammukhībhāvampi na dadeyya.
dn3:2.6.5 Passa, ambaṭṭha, yāva aparaddhañca te idaṁ ācariyassa brāhmaṇassa pokkharasātissa.
dn3:2.7.1 Taṁ kiṁ maññasi, ambaṭṭha,
dn3:2.7.2 idha rājā pasenadi kosalo hatthigīvāya vā nisinno assapiṭṭhe vā nisinno rathūpatthare vā ṭhito uggehi vā rājaññehi vā kiñcideva mantanaṁ manteyya.
dn3:2.7.3 So tamhā padesā apakkamma ekamantaṁ tiṭṭheyya.
dn3:2.7.4 Atha āgaccheyya suddo vā suddadāso vā, tasmiṁ padese ṭhito tadeva mantanaṁ manteyya:
dn3:2.7.5 ‘evampi rājā pasenadi kosalo āha, evampi rājā pasenadi kosalo āhā’ti.
dn3:2.7.6 Api nu so rājabhaṇitaṁ vā bhaṇati rājamantanaṁ vā manteti?
dn3:2.7.7 Ettāvatā so assa rājā vā rājamatto vā”ti?
dn3:2.7.8 “No hidaṁ, bho gotama”.
dn3:2.8.1 “Evameva kho tvaṁ, ambaṭṭha, ye te ahesuṁ brāhmaṇānaṁ pubbakā isayo mantānaṁ kattāro mantānaṁ pavattāro, yesamidaṁ etarahi brāhmaṇā porāṇaṁ mantapadaṁ gītaṁ pavuttaṁ samihitaṁ, tadanugāyanti tadanubhāsanti bhāsitamanubhāsanti vācitamanuvācenti, seyyathidaṁ—aṭṭhako vāmako vāmadevo vessāmitto yamataggi aṅgīraso bhāradvājo vāseṭṭho kassapo bhagu:
dn3:2.8.2 ‘tyāhaṁ mante adhiyāmi sācariyako’ti, tāvatā tvaṁ bhavissasi isi vā isitthāya vā paṭipannoti netaṁ ṭhānaṁ vijjati.
dn3:2.9.1 Taṁ kiṁ maññasi, ambaṭṭha,
dn3:2.9.2 kinti te sutaṁ brāhmaṇānaṁ vuddhānaṁ mahallakānaṁ ācariyapācariyānaṁ bhāsamānānaṁ—
dn3:2.9.3 ye te ahesuṁ brāhmaṇānaṁ pubbakā isayo mantānaṁ kattāro mantānaṁ pavattāro, yesamidaṁ etarahi brāhmaṇā porāṇaṁ mantapadaṁ gītaṁ pavuttaṁ samihitaṁ, tadanugāyanti tadanubhāsanti bhāsitamanubhāsanti vācitamanuvācenti, seyyathidaṁ—aṭṭhako vāmako vāmadevo vessāmitto yamataggi aṅgīraso bhāradvājo vāseṭṭho kassapo bhagu,
dn3:2.9.4 evaṁ su te sunhātā suvilittā kappitakesamassū āmukkamaṇikuṇḍalābharaṇā odātavatthavasanā pañcahi kāmaguṇehi samappitā samaṅgībhūtā paricārenti, seyyathāpi tvaṁ etarahi sācariyako”ti?
dn3:2.9.5 “No hidaṁ, bho gotama”.
dn3:2.10.1 “ …pe…
dn3:2.10.2 Evaṁ su te sālīnaṁ odanaṁ sucimaṁsūpasecanaṁ vicitakāḷakaṁ anekasūpaṁ anekabyañjanaṁ paribhuñjanti, seyyathāpi tvaṁ etarahi sācariyako”ti?
dn3:2.10.3 “No hidaṁ, bho gotama”.
dn3:2.10.4 “ …pe…
dn3:2.10.5 Evaṁ su te veṭhakanatapassāhi nārīhi paricārenti, seyyathāpi tvaṁ etarahi sācariyako”ti?
dn3:2.10.6 “No hidaṁ, bho gotama”.
dn3:2.10.7 “ …pe…
dn3:2.10.8 Evaṁ su te kuttavālehi vaḷavārathehi dīghāhi patodalaṭṭhīhi vāhane vitudentā vipariyāyanti, seyyathāpi tvaṁ etarahi sācariyako”ti?
dn3:2.10.9 “No hidaṁ, bho gotama”.
dn3:2.10.10 “ …pe…
dn3:2.10.11 Evaṁ su te ukkiṇṇaparikhāsu okkhittapalighāsu nagarūpakārikāsu dīghāsivudhehi purisehi rakkhāpenti, seyyathāpi tvaṁ etarahi sācariyako”ti?
dn3:2.10.12 “No hidaṁ, bho gotama”.
dn3:2.10.13 “Iti kho, ambaṭṭha, neva tvaṁ isi na isitthāya paṭipanno sācariyako.
dn3:2.10.14 Yassa kho pana, ambaṭṭha, mayi kaṅkhā vā vimati vā so maṁ pañhena, ahaṁ veyyākaraṇena sodhissāmī”ti.
dn3:2.11.0 7. Dvelakkhaṇādassana
dn3:2.11.1 Atha kho bhagavā vihārā nikkhamma caṅkamaṁ abbhuṭṭhāsi.
dn3:2.11.2 Ambaṭṭhopi māṇavo vihārā nikkhamma caṅkamaṁ abbhuṭṭhāsi.
dn3:2.11.3 Atha kho ambaṭṭho māṇavo bhagavantaṁ caṅkamantaṁ anucaṅkamamāno bhagavato kāye dvattiṁsamahāpurisalakkhaṇāni samannesi.
dn3:2.11.4 Addasā kho ambaṭṭho māṇavo bhagavato kāye dvattiṁsamahāpurisalakkhaṇāni yebhuyyena ṭhapetvā dve.
dn3:2.11.5 Dvīsu mahāpurisalakkhaṇesu kaṅkhati vicikicchati nādhimuccati na sampasīdati—
dn3:2.11.6 kosohite ca vatthaguyhe pahūtajivhatāya ca.
dn3:2.12.1 Atha kho bhagavato etadahosi:
dn3:2.12.2 “passati kho me ayaṁ ambaṭṭho māṇavo dvattiṁsamahāpurisalakkhaṇāni yebhuyyena ṭhapetvā dve.
dn3:2.12.3 Dvīsu mahāpurisalakkhaṇesu kaṅkhati vicikicchati nādhimuccati na sampasīdati—
dn3:2.12.4 kosohite ca vatthaguyhe pahūtajivhatāya cā”ti.
dn3:2.12.5 Atha kho bhagavā tathārūpaṁ iddhābhisaṅkhāraṁ abhisaṅkhāsi. Yathā addasa ambaṭṭho māṇavo bhagavato kosohitaṁ vatthaguyhaṁ.
dn3:2.12.6 Atha kho bhagavā jivhaṁ ninnāmetvā ubhopi kaṇṇasotāni anumasi paṭimasi, ubhopi nāsikasotāni anumasi paṭimasi, kevalampi nalāṭamaṇḍalaṁ jivhāya chādesi.
dn3:2.12.7 Atha kho ambaṭṭhassa māṇavassa etadahosi:
dn3:2.12.8 “samannāgato kho samaṇo gotamo dvattiṁsamahāpurisalakkhaṇehi paripuṇṇehi, no aparipuṇṇehī”ti.
dn3:2.12.9 Bhagavantaṁ etadavoca:
dn3:2.12.10 “handa ca dāni mayaṁ, bho gotama, gacchāma, bahukiccā mayaṁ bahukaraṇīyā”ti.
dn3:2.12.11 “Yassadāni tvaṁ, ambaṭṭha, kālaṁ maññasī”ti.
dn3:2.12.12 Atha kho ambaṭṭho māṇavo vaḷavārathamāruyha pakkāmi.
dn3:2.13.1 Tena kho pana samayena brāhmaṇo pokkharasāti ukkaṭṭhāya nikkhamitvā mahatā brāhmaṇagaṇena saddhiṁ sake ārāme nisinno hoti ambaṭṭhaṁyeva māṇavaṁ paṭimānento.
dn3:2.13.2 Atha kho ambaṭṭho māṇavo yena sako ārāmo tena pāyāsi.
dn3:2.14.1 Yāvatikā yānassa bhūmi, yānena gantvā yānā paccorohitvā pattikova yena brāhmaṇo pokkharasāti tenupasaṅkami; upasaṅkamitvā brāhmaṇaṁ pokkharasātiṁ abhivādetvā ekamantaṁ nisīdi. Ekamantaṁ nisinnaṁ kho ambaṭṭhaṁ māṇavaṁ brāhmaṇo pokkharasāti etadavoca:
dn3:2.14.2 “kacci, tāta ambaṭṭha, addasa taṁ bhavantaṁ gotaman”ti?
dn3:2.14.3 “Addasāma kho mayaṁ, bho, taṁ bhavantaṁ gotaman”ti.
dn3:2.14.4 “Kacci, tāta ambaṭṭha, taṁ bhavantaṁ gotamaṁ tathā santaṁyeva saddo abbhuggato no aññathā;
dn3:2.14.5 kacci pana so bhavaṁ gotamo tādiso no aññādiso”ti?
dn3:2.14.6 “Tathā santaṁyeva, bho, taṁ bhavantaṁ gotamaṁ saddo abbhuggato no aññathā, tādisova so bhavaṁ gotamo no aññādiso.
dn3:2.14.7 Samannāgato ca so bhavaṁ gotamo dvattiṁsamahāpurisalakkhaṇehi paripuṇṇehi no aparipuṇṇehī”ti.
dn3:2.14.8 “Ahu pana te, tāta ambaṭṭha, samaṇena gotamena saddhiṁ kocideva kathāsallāpo”ti?
dn3:2.14.9 “Ahu kho me, bho, samaṇena gotamena saddhiṁ kocideva kathāsallāpo”ti.
dn3:2.14.10 “Yathā kathaṁ pana te, tāta ambaṭṭha, ahu samaṇena gotamena saddhiṁ kocideva kathāsallāpo”ti?
dn3:2.14.11 Atha kho ambaṭṭho māṇavo yāvatako ahosi bhagavatā saddhiṁ kathāsallāpo, taṁ sabbaṁ brāhmaṇassa pokkharasātissa ārocesi.
dn3:2.15.1 Evaṁ vutte, brāhmaṇo pokkharasāti ambaṭṭhaṁ māṇavaṁ etadavoca:
dn3:2.15.2 “aho vata re amhākaṁ, paṇḍitaka, aho vata re amhākaṁ, bahussutaka, aho vata re amhākaṁ, tevijjaka, evarūpena kira, bho, puriso atthacarakena kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjeyya.
dn3:2.15.3 Yadeva kho tvaṁ, ambaṭṭha, taṁ bhavantaṁ gotamaṁ evaṁ āsajja āsajja avacāsi, atha kho so bhavaṁ gotamo amhepi evaṁ upaneyya upaneyya avaca.
dn3:2.15.4 Aho vata re amhākaṁ, paṇḍitaka, aho vata re amhākaṁ, bahussutaka, aho vata re amhākaṁ, tevijjaka, evarūpena kira, bho, puriso atthacarakena kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjeyyā”ti, kupito anattamano ambaṭṭhaṁ māṇavaṁ padasāyeva pavattesi.
dn3:2.15.5 Icchati ca tāvadeva bhagavantaṁ dassanāya upasaṅkamituṁ.
dn3:2.16.0 8. Pokkharasātibuddhūpasaṅkamana
dn3:2.16.1 Atha kho te brāhmaṇā brāhmaṇaṁ pokkharasātiṁ etadavocuṁ:
dn3:2.16.2 “ativikālo kho, bho, ajja samaṇaṁ gotamaṁ dassanāya upasaṅkamituṁ.
dn3:2.16.3 Svedāni bhavaṁ pokkharasāti samaṇaṁ gotamaṁ dassanāya upasaṅkamissatī”ti.
dn3:2.16.4 Atha kho brāhmaṇo pokkharasāti sake nivesane paṇītaṁ khādanīyaṁ bhojanīyaṁ paṭiyādāpetvā yāne āropetvā ukkāsu dhāriyamānāsu ukkaṭṭhāya niyyāsi, yena icchānaṅgalavanasaṇḍo tena pāyāsi.
dn3:2.17.1 Yāvatikā yānassa bhūmi yānena gantvā, yānā paccorohitvā pattikova yena bhagavā tenupasaṅkami. upasaṅkamitvā bhagavatā saddhiṁ sammodi, sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho brāhmaṇo pokkharasāti bhagavantaṁ etadavoca:
dn3:2.17.2 “āgamā nu khvidha, bho gotama, amhākaṁ antevāsī ambaṭṭho māṇavo”ti?
dn3:2.17.3 “Āgamā kho te, brāhmaṇa, antevāsī ambaṭṭho māṇavo”ti.
dn3:2.17.4 “Ahu pana te, bho gotama, ambaṭṭhena māṇavena saddhiṁ kocideva kathāsallāpo”ti?
dn3:2.17.5 “Ahu kho me, brāhmaṇa, ambaṭṭhena māṇavena saddhiṁ kocideva kathāsallāpo”ti.
dn3:2.17.6 “Yathākathaṁ pana te, bho gotama, ahu ambaṭṭhena māṇavena saddhiṁ kocideva kathāsallāpo”ti?
dn3:2.17.7 Atha kho bhagavā yāvatako ahosi ambaṭṭhena māṇavena saddhiṁ kathāsallāpo, taṁ sabbaṁ brāhmaṇassa pokkharasātissa ārocesi.
dn3:2.17.8 Evaṁ vutte, brāhmaṇo pokkharasāti bhagavantaṁ etadavoca:
dn3:2.17.9 “bālo, bho gotama, ambaṭṭho māṇavo, khamatu bhavaṁ gotamo ambaṭṭhassa māṇavassā”ti.
dn3:2.17.10 “Sukhī hotu, brāhmaṇa, ambaṭṭho māṇavo”ti.
dn3:2.18.1 Atha kho brāhmaṇo pokkharasāti bhagavato kāye dvattiṁsamahāpurisalakkhaṇāni samannesi.
dn3:2.18.2 Addasā kho brāhmaṇo pokkharasāti bhagavato kāye dvattiṁsamahāpurisalakkhaṇāni yebhuyyena ṭhapetvā dve.
dn3:2.18.3 Dvīsu mahāpurisalakkhaṇesu kaṅkhati vicikicchati nādhimuccati na sampasīdati—
dn3:2.18.4 kosohite ca vatthaguyhe pahūtajivhatāya ca.
dn3:2.18.5 Atha kho bhagavato etadahosi:
dn3:2.18.6 “passati kho me ayaṁ brāhmaṇo pokkharasāti dvattiṁsamahāpurisalakkhaṇāni yebhuyyena ṭhapetvā dve.
dn3:2.18.7 Dvīsu mahāpurisalakkhaṇesu kaṅkhati vicikicchati nādhimuccati na sampasīdati—
dn3:2.18.8 kosohite ca vatthaguyhe pahūtajivhatāya cā”ti.
dn3:2.18.9 Atha kho bhagavā tathārūpaṁ iddhābhisaṅkhāraṁ abhisaṅkhāsi yathā addasa brāhmaṇo pokkharasāti bhagavato kosohitaṁ vatthaguyhaṁ.
dn3:2.18.10 Atha kho bhagavā jivhaṁ ninnāmetvā ubhopi kaṇṇasotāni anumasi paṭimasi, ubhopi nāsikasotāni anumasi paṭimasi, kevalampi nalāṭamaṇḍalaṁ jivhāya chādesi.
dn3:2.19.1 Atha kho brāhmaṇassa pokkharasātissa etadahosi:
dn3:2.19.2 “samannāgato kho samaṇo gotamo dvattiṁsamahāpurisalakkhaṇehi paripuṇṇehi no aparipuṇṇehī”ti.
dn3:2.19.3 Bhagavantaṁ etadavoca:
dn3:2.19.4 “adhivāsetu me bhavaṁ gotamo ajjatanāya bhattaṁ saddhiṁ bhikkhusaṅghenā”ti.
dn3:2.19.5 Adhivāsesi bhagavā tuṇhībhāvena.
dn3:2.20.1 Atha kho brāhmaṇo pokkharasāti bhagavato adhivāsanaṁ viditvā bhagavato kālaṁ ārocesi:
dn3:2.20.2 “kālo, bho gotama, niṭṭhitaṁ bhattan”ti.
dn3:2.20.3 Atha kho bhagavā pubbaṇhasamayaṁ nivāsetvā pattacīvaramādāya saddhiṁ bhikkhusaṅghena yena brāhmaṇassa pokkharasātissa nivesanaṁ tenupasaṅkami; upasaṅkamitvā paññatte āsane nisīdi.
dn3:2.20.4 Atha kho brāhmaṇo pokkharasāti bhagavantaṁ paṇītena khādanīyena bhojanīyena sahatthā santappesi sampavāresi, māṇavakāpi bhikkhusaṅghaṁ.
dn3:2.20.5 Atha kho brāhmaṇo pokkharasāti bhagavantaṁ bhuttāviṁ onītapattapāṇiṁ aññataraṁ nīcaṁ āsanaṁ gahetvā ekamantaṁ nisīdi.
dn3:2.21.1 Ekamantaṁ nisinnassa kho brāhmaṇassa pokkharasātissa bhagavā anupubbiṁ kathaṁ kathesi, seyyathidaṁ—
dn3:2.21.2 dānakathaṁ sīlakathaṁ saggakathaṁ; kāmānaṁ ādīnavaṁ okāraṁ saṅkilesaṁ, nekkhamme ānisaṁsaṁ pakāsesi.
dn3:2.21.3 Yadā bhagavā aññāsi brāhmaṇaṁ pokkharasātiṁ kallacittaṁ muducittaṁ vinīvaraṇacittaṁ udaggacittaṁ pasannacittaṁ, atha yā buddhānaṁ sāmukkaṁsikā dhammadesanā, taṁ pakāsesi—
dn3:2.21.4 dukkhaṁ samudayaṁ nirodhaṁ maggaṁ.
dn3:2.21.5 Seyyathāpi nāma suddhaṁ vatthaṁ apagatakāḷakaṁ sammadeva rajanaṁ paṭiggaṇheyya;
dn3:2.21.6 evameva brāhmaṇassa pokkharasātissa tasmiññeva āsane virajaṁ vītamalaṁ dhammacakkhuṁ udapādi:
dn3:2.21.7 “yaṁ kiñci samudayadhammaṁ sabbaṁ taṁ nirodhadhamman”ti.
dn3:2.22.0 9. Pokkharasātiupāsakattapaṭivedanā
dn3:2.22.1 Atha kho brāhmaṇo pokkharasāti diṭṭhadhammo pattadhammo viditadhammo pariyogāḷhadhammo tiṇṇavicikiccho vigatakathaṅkatho vesārajjappatto aparappaccayo satthusāsane bhagavantaṁ etadavoca:
dn3:2.22.2 “abhikkantaṁ, bho gotama, abhikkantaṁ, bho gotama.
dn3:2.22.3 Seyyathāpi, bho gotama, nikkujjitaṁ vā ukkujjeyya, paṭicchannaṁ vā vivareyya, mūḷhassa vā maggaṁ ācikkheyya, andhakāre vā telapajjotaṁ dhāreyya: ‘cakkhumanto rūpāni dakkhantī’ti; evamevaṁ bhotā gotamena anekapariyāyena dhammo pakāsito.
dn3:2.22.4 Esāhaṁ, bho gotama, saputto sabhariyo sapariso sāmacco bhavantaṁ gotamaṁ saraṇaṁ gacchāmi dhammañca bhikkhusaṅghañca.
dn3:2.22.5 Upāsakaṁ maṁ bhavaṁ gotamo dhāretu ajjatagge pāṇupetaṁ saraṇaṁ gataṁ.
dn3:2.22.6 Yathā ca bhavaṁ gotamo ukkaṭṭhāya aññāni upāsakakulāni upasaṅkamati, evameva bhavaṁ gotamo pokkharasātikulaṁ upasaṅkamatu.
dn3:2.22.7 Tattha ye te māṇavakā vā māṇavikā vā bhavantaṁ gotamaṁ abhivādessanti vā paccuṭṭhissanti vā āsanaṁ vā udakaṁ vā dassanti cittaṁ vā pasādessanti, tesaṁ taṁ bhavissati dīgharattaṁ hitāya sukhāyā”ti.
dn3:2.22.8 “Kalyāṇaṁ vuccati, brāhmaṇā”ti.
dn3:2.22.9 Ambaṭṭhasuttaṁ niṭṭhitaṁ tatiyaṁ.