dn30:2.1.0 15–16. Parimaṇḍalaanonamajaṇṇuparimasanalakkhaṇāni
BAGIAN 2
dn30:2.1.1 “Yampi, bhikkhave, tathāgato purimaṁ jātiṁ purimaṁ bhavaṁ purimaṁ niketaṁ pubbe manussabhūto samāno
dn30:2.1.2 mahājanasaṅgahaṁ samekkhamāno samaṁ jānāti sāmaṁ jānāti, purisaṁ jānāti purisavisesaṁ jānāti:
dn30:2.1.3 ‘ayamidamarahati ayamidamarahatī’ti tattha tattha purisavisesakaro ahosi.
dn30:2.1.4 So tassa kammassa kaṭattā …pe…
dn30:2.1.5 so tato cuto itthattaṁ āgato samāno imāni dve mahāpurisalakkhaṇāni paṭilabhati.
dn30:2.1.6 Nigrodhaparimaṇḍalo ca hoti, ṭhitakoyeva ca anonamanto ubhohi pāṇitalehi jaṇṇukāni parimasati parimajjati.
dn30:2.2.1 So tehi lakkhaṇehi samannāgato sace agāraṁ ajjhāvasati, rājā hoti cakkavattī …pe…
dn30:2.2.2 rājā samāno kiṁ labhati?
dn30:2.2.3 Aḍḍho hoti mahaddhano mahābhogo pahūtajātarūparajato pahūtavittūpakaraṇo pahūtadhanadhañño paripuṇṇakosakoṭṭhāgāro.
dn30:2.2.4 Rājā samāno idaṁ labhati …pe…
dn30:2.2.5 buddho samāno kiṁ labhati?
dn30:2.2.6 Aḍḍho hoti mahaddhano mahābhogo.
dn30:2.2.7 Tassimāni dhanāni honti, seyyathidaṁ—
dn30:2.2.8 saddhādhanaṁ sīladhanaṁ hiridhanaṁ ottappadhanaṁ sutadhanaṁ cāgadhanaṁ paññādhanaṁ.
dn30:2.2.9 Buddho samāno idaṁ labhati”.
dn30:2.2.10 Etamatthaṁ bhagavā avoca.
dn30:2.3.1 Tatthetaṁ vuccati:
dn30:2.3.2 “Tuliya paṭivicaya cintayitvā,
dn30:2.3.3 Mahājanasaṅgahanaṁ samekkhamāno;
dn30:2.3.4 Ayamidamarahati tattha tattha,
dn30:2.3.5 Purisavisesakaro pure ahosi.
dn30:2.3.6 Mahiñca pana ṭhito anonamanto,
dn30:2.3.7 Phusati karehi ubhohi jaṇṇukāni;
dn30:2.3.8 Mahiruhaparimaṇḍalo ahosi,
dn30:2.3.9 Sucaritakammavipākasesakena.
dn30:2.3.10 Bahuvividhanimittalakkhaṇaññū,
dn30:2.3.11 Atinipuṇā manujā byākariṁsu;
dn30:2.3.12 Bahuvividhā gihīnaṁ arahāni,
dn30:2.3.13 Paṭilabhati daharo susu kumāro.
dn30:2.3.14 Idha ca mahīpatissa kāmabhogī,
dn30:2.3.15 Gihipatirūpakā bahū bhavanti;
dn30:2.3.16 Yadi ca jahati sabbakāmabhogaṁ,
dn30:2.3.17 Labhati anuttaraṁ uttamadhanaggan”ti.
dn30:2.4.0 17–19. Sīhapubbaddhakāyāditilakkhaṇaṁ
dn30:2.4.1 “Yampi, bhikkhave, tathāgato purimaṁ jātiṁ purimaṁ bhavaṁ purimaṁ niketaṁ pubbe manussabhūto samāno
dn30:2.4.2 bahujanassa atthakāmo ahosi hitakāmo phāsukāmo yogakkhemakāmo:
dn30:2.4.3 ‘kintime saddhāya vaḍḍheyyuṁ, sīlena vaḍḍheyyuṁ, sutena vaḍḍheyyuṁ, cāgena vaḍḍheyyuṁ, dhammena vaḍḍheyyuṁ, paññāya vaḍḍheyyuṁ, dhanadhaññena vaḍḍheyyuṁ, khettavatthunā vaḍḍheyyuṁ, dvipadacatuppadehi vaḍḍheyyuṁ, puttadārehi vaḍḍheyyuṁ, dāsakammakaraporisehi vaḍḍheyyuṁ, ñātīhi vaḍḍheyyuṁ, mittehi vaḍḍheyyuṁ, bandhavehi vaḍḍheyyun’ti.
dn30:2.4.4 So tassa kammassa kaṭattā …pe…
dn30:2.4.5 so tato cuto itthattaṁ āgato samāno imāni tīṇi mahāpurisalakkhaṇāni paṭilabhati.
dn30:2.4.6 Sīhapubbaddhakāyo ca hoti citantaraṁso ca samavaṭṭakkhandho ca.
dn30:2.5.1 So tehi lakkhaṇehi samannāgato sace agāraṁ ajjhāvasati, rājā hoti cakkavattī …pe…
dn30:2.5.2 rājā samāno kiṁ labhati?
dn30:2.5.3 Aparihānadhammo hoti, na parihāyati dhanadhaññena khettavatthunā dvipadacatuppadehi puttadārehi dāsakammakaraporisehi ñātīhi mittehi bandhavehi, na parihāyati sabbasampattiyā.
dn30:2.5.4 Rājā samāno idaṁ labhati …pe…
dn30:2.5.5 buddho samāno kiṁ labhati?
dn30:2.5.6 Aparihānadhammo hoti, na parihāyati saddhāya sīlena sutena cāgena paññāya, na parihāyati sabbasampattiyā.
dn30:2.5.7 Buddho samāno idaṁ labhati”.
dn30:2.5.8 Etamatthaṁ bhagavā avoca.
dn30:2.6.1 Tatthetaṁ vuccati:
dn30:2.6.2 “Saddhāya sīlena sutena buddhiyā,
dn30:2.6.3 Cāgena dhammena bahūhi sādhuhi;
dn30:2.6.4 Dhanena dhaññena ca khettavatthunā,
dn30:2.6.5 Puttehi dārehi catuppadehi ca.
dn30:2.6.6 Ñātīhi mittehi ca bandhavehi ca,
dn30:2.6.7 Balena vaṇṇena sukhena cūbhayaṁ;
dn30:2.6.8 Kathaṁ na hāyeyyuṁ pareti icchati,
dn30:2.6.9 Atthassa middhī ca panābhikaṅkhati.
dn30:2.6.10 Sa sīhapubbaddhasusaṇṭhito ahu,
dn30:2.6.11 Samavaṭṭakhandho ca citantaraṁso;
dn30:2.6.12 Pubbe suciṇṇena katena kammunā,
dn30:2.6.13 Ahāniyaṁ pubbanimittamassa taṁ.
dn30:2.6.14 Gihīpi dhaññena dhanena vaḍḍhati,
dn30:2.6.15 Puttehi dārehi catuppadehi ca;
dn30:2.6.16 Akiñcano pabbajito anuttaraṁ,
dn30:2.6.17 Pappoti bodhiṁ asahānadhammatan”ti.
dn30:2.7.0 20. Rasaggasaggitālakkhaṇaṁ
dn30:2.7.1 “Yampi, bhikkhave, tathāgato purimaṁ jātiṁ purimaṁ bhavaṁ purimaṁ niketaṁ pubbe manussabhūto samāno
dn30:2.7.2 sattānaṁ aviheṭhakajātiko ahosi pāṇinā vā leḍḍunā vā daṇḍena vā satthena vā.
dn30:2.7.3 So tassa kammassa kaṭattā upacitattā …pe…
dn30:2.7.4 so tato cuto itthattaṁ āgato samāno imaṁ mahāpurisalakkhaṇaṁ paṭilabhati, rasaggasaggī hoti, uddhaggāssa rasaharaṇīyo gīvāya jātā honti samābhivāhiniyo.
dn30:2.8.1 So tena lakkhaṇena samannāgato sace agāraṁ ajjhāvasati, rājā hoti cakkavattī …pe…
dn30:2.8.2 rājā samāno kiṁ labhati?
dn30:2.8.3 Appābādho hoti appātaṅko, samavepākiniyā gahaṇiyā samannāgato nātisītāya nāccuṇhāya.
dn30:2.8.4 Rājā samāno idaṁ labhati …pe…
dn30:2.8.5 buddho samāno kiṁ labhati?
dn30:2.8.6 Appābādho hoti appātaṅko samavepākiniyā gahaṇiyā samannāgato nātisītāya nāccuṇhāya majjhimāya padhānakkhamāya.
dn30:2.8.7 Buddho samāno idaṁ labhati”.
dn30:2.8.8 Etamatthaṁ bhagavā avoca.
dn30:2.9.1 Tatthetaṁ vuccati:
dn30:2.9.2 “Na pāṇidaṇḍehi panātha leḍḍunā,
dn30:2.9.3 Satthena vā maraṇavadhena vā pana;
dn30:2.9.4 Ubbādhanāya paritajjanāya vā,
dn30:2.9.5 Na heṭhayī janatamaheṭhako ahu.
dn30:2.9.6 Teneva so sugatimupecca modati,
dn30:2.9.7 Sukhapphalaṁ kariya sukhāni vindati;
dn30:2.9.8 Samojasā rasaharaṇī susaṇṭhitā,
dn30:2.9.9 Idhāgato labhati rasaggasaggitaṁ.
dn30:2.9.10 Tenāhu naṁ atinipuṇā vicakkhaṇā,
dn30:2.9.11 Ayaṁ naro sukhabahulo bhavissati;
dn30:2.9.12 Gihissa vā pabbajitassa vā puna,
dn30:2.9.13 Taṁ lakkhaṇaṁ bhavati tadatthajotakan”ti.
dn30:2.10.0 21–22. Abhinīlanettagopakhumalakkhaṇāni
dn30:2.10.1 “Yampi, bhikkhave, tathāgato purimaṁ jātiṁ purimaṁ bhavaṁ purimaṁ niketaṁ pubbe manussabhūto samāno
dn30:2.10.2 na ca visaṭaṁ, na ca visāci, na ca pana viceyya pekkhitā, ujuṁ tathā pasaṭamujumano, piyacakkhunā bahujanaṁ udikkhitā ahosi.
dn30:2.10.3 So tassa kammassa kaṭattā …pe…
dn30:2.10.4 so tato cuto itthattaṁ āgato samāno imāni dve mahāpurisalakkhaṇāni paṭilabhati.
dn30:2.10.5 Abhinīlanetto ca hoti gopakhumo ca.
dn30:2.11.1 So tehi lakkhaṇehi samannāgato, sace agāraṁ ajjhāvasati, rājā hoti cakkavattī …pe…
dn30:2.11.2 rājā samāno kiṁ labhati?
dn30:2.11.3 Piyadassano hoti bahuno janassa, piyo hoti manāpo brāhmaṇagahapatikānaṁ negamajānapadānaṁ gaṇakamahāmattānaṁ anīkaṭṭhānaṁ dovārikānaṁ amaccānaṁ pārisajjānaṁ rājūnaṁ bhogiyānaṁ kumārānaṁ.
dn30:2.11.4 Rājā samāno idaṁ labhati …pe…
dn30:2.11.5 buddho samāno kiṁ labhati?
dn30:2.11.6 Piyadassano hoti bahuno janassa, piyo hoti manāpo bhikkhūnaṁ bhikkhunīnaṁ upāsakānaṁ upāsikānaṁ devānaṁ manussānaṁ asurānaṁ nāgānaṁ gandhabbānaṁ.
dn30:2.11.7 Buddho samāno idaṁ labhati”.
dn30:2.11.8 Etamatthaṁ bhagavā avoca.
dn30:2.12.1 Tatthetaṁ vuccati:
dn30:2.12.2 “Na ca visaṭaṁ na ca visāci,
dn30:2.12.3 Na ca pana viceyyapekkhitā;
dn30:2.12.4 Ujuṁ tathā pasaṭamujumano,
dn30:2.12.5 Piyacakkhunā bahujanaṁ udikkhitā.
dn30:2.12.6 Sugatīsu so phalavipākaṁ,
dn30:2.12.7 Anubhavati tattha modati;
dn30:2.12.8 Idha ca pana bhavati gopakhumo,
dn30:2.12.9 Abhinīlanettanayano sudassano.
dn30:2.12.10 Abhiyogino ca nipuṇā,
dn30:2.12.11 Bahū pana nimittakovidā;
dn30:2.12.12 Sukhumanayanakusalā manujā,
dn30:2.12.13 Piyadassanoti abhiniddisanti naṁ.
dn30:2.12.14 Piyadassano gihīpi santo ca,
dn30:2.12.15 Bhavati bahujanapiyāyito;
dn30:2.12.16 Yadi ca na bhavati gihī samaṇo hoti,
dn30:2.12.17 Piyo bahūnaṁ sokanāsano”ti.
dn30:2.13.0 23. Uṇhīsasīsalakkhaṇaṁ
dn30:2.13.1 “Yampi, bhikkhave, tathāgato purimaṁ jātiṁ purimaṁ bhavaṁ purimaṁ niketaṁ pubbe manussabhūto samāno
dn30:2.13.2 bahujanapubbaṅgamo ahosi kusalesu dhammesu bahujanapāmokkho kāyasucarite vacīsucarite manosucarite dānasaṁvibhāge sīlasamādāne uposathupavāse matteyyatāya petteyyatāya sāmaññatāya brahmaññatāya kule jeṭṭhāpacāyitāya aññataraññataresu ca adhikusalesu dhammesu.
dn30:2.13.3 So tassa kammassa kaṭattā …pe…
dn30:2.13.4 so tato cuto itthattaṁ āgato samāno imaṁ mahāpurisalakkhaṇaṁ paṭilabhati—
dn30:2.13.5 uṇhīsasīso hoti.
dn30:2.14.1 So tena lakkhaṇena samannāgato sace agāraṁ ajjhāvasati, rājā hoti cakkavattī …pe…
dn30:2.14.2 rājā samāno kiṁ labhati?
dn30:2.14.3 Mahāssa jano anvāyiko hoti, brāhmaṇagahapatikā negamajānapadā gaṇakamahāmattā anīkaṭṭhā dovārikā amaccā pārisajjā rājāno bhogiyā kumārā.
dn30:2.14.4 Rājā samāno idaṁ labhati …pe…
dn30:2.14.5 buddho samāno kiṁ labhati?
dn30:2.14.6 Mahāssa jano anvāyiko hoti, bhikkhū bhikkhuniyo upāsakā upāsikāyo devā manussā asurā nāgā gandhabbā.
dn30:2.14.7 Buddho samāno idaṁ labhati”.
dn30:2.14.8 Etamatthaṁ bhagavā avoca.
dn30:2.15.1 Tatthetaṁ vuccati:
dn30:2.15.2 “Pubbaṅgamo sucaritesu ahu,
dn30:2.15.3 Dhammesu dhammacariyābhirato;
dn30:2.15.4 Anvāyiko bahujanassa ahu,
dn30:2.15.5 Saggesu vedayittha puññaphalaṁ.
dn30:2.15.6 Veditvā so sucaritassa phalaṁ,
dn30:2.15.7 Uṇhīsasīsattamidhajjhagamā;
dn30:2.15.8 Byākaṁsu byañjananimittadharā,
dn30:2.15.9 Pubbaṅgamo bahujanaṁ hessati.
dn30:2.15.10 Paṭibhogiyā manujesu idha,
dn30:2.15.11 Pubbeva tassa abhiharanti tadā;
dn30:2.15.12 Yadi khattiyo bhavati bhūmipati,
dn30:2.15.13 Paṭihārakaṁ bahujane labhati.
dn30:2.15.14 Atha cepi pabbajati so manujo,
dn30:2.15.15 Dhammesu hoti paguṇo visavī;
dn30:2.15.16 Tassānusāsaniguṇābhirato,
dn30:2.15.17 Anvāyiko bahujano bhavatī”ti.
dn30:2.16.0 24–25. Ekekalomatāuṇṇālakkhaṇāni
dn30:2.16.1 “Yampi, bhikkhave, tathāgato purimaṁ jātiṁ purimaṁ bhavaṁ purimaṁ niketaṁ pubbe manussabhūto samāno
dn30:2.16.2 musāvādaṁ pahāya musāvādā paṭivirato ahosi, saccavādī saccasandho theto paccayiko avisaṁvādako lokassa.
dn30:2.16.3 So tassa kammassa kaṭattā upacitattā …pe…
dn30:2.16.4 so tato cuto itthattaṁ āgato samāno imāni dve mahāpurisalakkhaṇāni paṭilabhati.
dn30:2.16.5 Ekekalomo ca hoti, uṇṇā ca bhamukantare jātā hoti odātā mudutūlasannibhā.
dn30:2.17.1 So tehi lakkhaṇehi samannāgato, sace agāraṁ ajjhāvasati, rājā hoti cakkavattī …pe…
dn30:2.17.2 rājā samāno kiṁ labhati?
dn30:2.17.3 Mahāssa jano upavattati, brāhmaṇagahapatikā negamajānapadā gaṇakamahāmattā anīkaṭṭhā dovārikā amaccā pārisajjā rājāno bhogiyā kumārā.
dn30:2.17.4 Rājā samāno idaṁ labhati …pe…
dn30:2.17.5 buddho samāno kiṁ labhati?
dn30:2.17.6 Mahāssa jano upavattati, bhikkhū bhikkhuniyo upāsakā upāsikāyo devā manussā asurā nāgā gandhabbā.
dn30:2.17.7 Buddho samāno idaṁ labhati”.
dn30:2.17.8 Etamatthaṁ bhagavā avoca.
dn30:2.18.1 Tatthetaṁ vuccati:
dn30:2.18.2 “Saccappaṭiñño purimāsu jātisu,
dn30:2.18.3 Advejjhavāco alikaṁ vivajjayi;
dn30:2.18.4 Na so visaṁvādayitāpi kassaci,
dn30:2.18.5 Bhūtena tacchena tathena bhāsayi.
dn30:2.18.6 Setā susukkā mudutūlasannibhā,
dn30:2.18.7 Uṇṇā sujātā bhamukantare ahu;
dn30:2.18.8 Na lomakūpesu duve ajāyisuṁ,
dn30:2.18.9 Ekekalomūpacitaṅgavā ahu.
dn30:2.18.10 Taṁ lakkhaṇaññū bahavo samāgatā,
dn30:2.18.11 Byākaṁsu uppādanimittakovidā;
dn30:2.18.12 Uṇṇā ca lomā ca yathā susaṇṭhitā,
dn30:2.18.13 Upavattatī īdisakaṁ bahujjano.
dn30:2.18.14 Gihimpi santaṁ upavattatī jano,
dn30:2.18.15 Bahu puratthāpakatena kammunā;
dn30:2.18.16 Akiñcanaṁ pabbajitaṁ anuttaraṁ,
dn30:2.18.17 Buddhampi santaṁ upavattati jano”ti.
dn30:2.19.0 26–27. Cattālīsaaviraḷadantalakkhaṇāni
dn30:2.19.1 “Yampi, bhikkhave tathāgato purimaṁ jātiṁ purimaṁ bhavaṁ purimaṁ niketaṁ pubbe manussabhūto samāno
dn30:2.19.2 pisuṇaṁ vācaṁ pahāya pisuṇāya vācāya paṭivirato ahosi. Ito sutvā na amutra akkhātā imesaṁ bhedāya, amutra vā sutvā na imesaṁ akkhātā amūsaṁ bhedāya, iti bhinnānaṁ vā sandhātā, sahitānaṁ vā anuppadātā, samaggārāmo samaggarato samagganandī samaggakaraṇiṁ vācaṁ bhāsitā ahosi.
dn30:2.19.3 So tassa kammassa kaṭattā …pe…
dn30:2.19.4 so tato cuto itthattaṁ āgato samāno imāni dve mahāpurisalakkhaṇāni paṭilabhati.
dn30:2.19.5 Cattālīsadanto ca hoti aviraḷadanto ca.
dn30:2.20.1 So tehi lakkhaṇehi samannāgato sace agāraṁ ajjhāvasati, rājā hoti cakkavattī …pe…
dn30:2.20.2 rājā samāno kiṁ labhati?
dn30:2.20.3 Abhejjapariso hoti, abhejjāssa honti parisā, brāhmaṇagahapatikā negamajānapadā gaṇakamahāmattā anīkaṭṭhā dovārikā amaccā pārisajjā rājāno bhogiyā kumārā.
dn30:2.20.4 Rājā samāno idaṁ labhati …
dn30:2.20.5 buddho samāno kiṁ labhati?
dn30:2.20.6 Abhejjapariso hoti, abhejjāssa honti parisā, bhikkhū bhikkhuniyo upāsakā upāsikāyo devā manussā asurā nāgā gandhabbā.
dn30:2.20.7 Buddho samāno idaṁ labhati”.
dn30:2.20.8 Etamatthaṁ bhagavā avoca.
dn30:2.21.1 Tatthetaṁ vuccati:
dn30:2.21.2 “Vebhūtiyaṁ sahitabhedakāriṁ,
dn30:2.21.3 Bhedappavaḍḍhanavivādakāriṁ;
dn30:2.21.4 Kalahappavaḍḍhanaākiccakāriṁ,
dn30:2.21.5 Sahitānaṁ bhedajananiṁ na bhaṇi.
dn30:2.21.6 Avivādavaḍḍhanakariṁ sugiraṁ,
dn30:2.21.7 Bhinnānusandhijananiṁ abhaṇi;
dn30:2.21.8 Kalahaṁ janassa panudī samaṅgī,
dn30:2.21.9 Sahitehi nandati pamodati ca.
dn30:2.21.10 Sugatīsu so phalavipākaṁ,
dn30:2.21.11 Anubhavati tattha modati;
dn30:2.21.12 Dantā idha honti aviraḷā sahitā,
dn30:2.21.13 Caturo dasassa mukhajā susaṇṭhitā.
dn30:2.21.14 Yadi khattiyo bhavati bhūmipati,
dn30:2.21.15 Avibhediyāssa parisā bhavati;
dn30:2.21.16 Samaṇo ca hoti virajo vimalo,
dn30:2.21.17 Parisāssa hoti anugatā acalā”ti.
dn30:2.22.0 28–29. Pahūtajivhābrahmassaralakkhaṇāni
dn30:2.22.1 “Yampi, bhikkhave, tathāgato purimaṁ jātiṁ purimaṁ bhavaṁ purimaṁ niketaṁ pubbe manussabhūto samāno
dn30:2.22.2 pharusaṁ vācaṁ pahāya pharusāya vācāya paṭivirato ahosi. Yā sā vācā nelā kaṇṇasukhā pemanīyā hadayaṅgamā porī bahujanakantā bahujanamanāpā, tathārūpiṁ vācaṁ bhāsitā ahosi.
dn30:2.22.3 So tassa kammassa kaṭattā upacitattā …pe…
dn30:2.22.4 so tato cuto itthattaṁ āgato samāno imāni dve mahāpurisalakkhaṇāni paṭilabhati.
dn30:2.22.5 Pahūtajivho ca hoti brahmassaro ca karavīkabhāṇī.
dn30:2.23.1 So tehi lakkhaṇehi samannāgato sace agāraṁ ajjhāvasati, rājā hoti cakkavattī …pe…
dn30:2.23.2 rājā samāno kiṁ labhati?
dn30:2.23.3 Ādeyyavāco hoti, ādiyantissa vacanaṁ brāhmaṇagahapatikā negamajānapadā gaṇakamahāmattā anīkaṭṭhā dovārikā amaccā pārisajjā rājāno bhogiyā kumārā.
dn30:2.23.4 Rājā samāno idaṁ labhati …pe…
dn30:2.23.5 buddho samāno kiṁ labhati?
dn30:2.23.6 Ādeyyavāco hoti, ādiyantissa vacanaṁ bhikkhū bhikkhuniyo upāsakā upāsikāyo devā manussā asurā nāgā gandhabbā.
dn30:2.23.7 Buddho samāno idaṁ labhati”.
dn30:2.23.8 Etamatthaṁ bhagavā avoca.
dn30:2.24.1 Tatthetaṁ vuccati:
dn30:2.24.2 “Akkosabhaṇḍanavihesakāriṁ,
dn30:2.24.3 Ubbādhikaṁ bahujanappamaddanaṁ;
dn30:2.24.4 Abāḷhaṁ giraṁ so na bhaṇi pharusaṁ,
dn30:2.24.5 Madhuraṁ bhaṇi susaṁhitaṁ sakhilaṁ.
dn30:2.24.6 Manaso piyā hadayagāminiyo,
dn30:2.24.7 Vācā so erayati kaṇṇasukhā;
dn30:2.24.8 Vācāsuciṇṇaphalamanubhavi,
dn30:2.24.9 Saggesu vedayatha puññaphalaṁ.
dn30:2.24.10 Veditvā so sucaritassa phalaṁ,
dn30:2.24.11 Brahmassarattamidhamajjhagamā;
dn30:2.24.12 Jivhāssa hoti vipulā puthulā,
dn30:2.24.13 Ādeyyavākyavacano bhavati.
dn30:2.24.14 Gihinopi ijjhati yathā bhaṇato,
dn30:2.24.15 Atha ce pabbajati so manujo;
dn30:2.24.16 Ādiyantissa vacanaṁ janatā,
dn30:2.24.17 Bahuno bahuṁ subhaṇitaṁ bhaṇato”ti.
dn30:2.25.0 30. Sīhahanulakkhaṇaṁ
dn30:2.25.1 “Yampi, bhikkhave, tathāgato purimaṁ jātiṁ purimaṁ bhavaṁ purimaṁ niketaṁ pubbe manussabhūto samāno
dn30:2.25.2 samphappalāpaṁ pahāya samphappalāpā paṭivirato ahosi kālavādī bhūtavādī atthavādī dhammavādī vinayavādī, nidhānavatiṁ vācaṁ bhāsitā ahosi kālena sāpadesaṁ pariyantavatiṁ atthasaṁhitaṁ.
dn30:2.25.3 So tassa kammassa kaṭattā …pe…
dn30:2.25.4 so tato cuto itthattaṁ āgato samāno imaṁ mahāpurisalakkhaṇaṁ paṭilabhati,
dn30:2.25.5 sīhahanu hoti.
dn30:2.26.1 So tena lakkhaṇena samannāgato sace agāraṁ ajjhāvasati, rājā hoti cakkavattī …pe…
dn30:2.26.2 rājā samāno kiṁ labhati?
dn30:2.26.3 Appadhaṁsiyo hoti kenaci manussabhūtena paccatthikena paccāmittena.
dn30:2.26.4 Rājā samāno idaṁ labhati …pe…
dn30:2.26.5 buddho samāno kiṁ labhati?
dn30:2.26.6 Appadhaṁsiyo hoti abbhantarehi vā bāhirehi vā paccatthikehi paccāmittehi, rāgena vā dosena vā mohena vā samaṇena vā brāhmaṇena vā devena vā mārena vā brahmunā vā kenaci vā lokasmiṁ.
dn30:2.26.7 Buddho samāno idaṁ labhati”.
dn30:2.26.8 Etamatthaṁ bhagavā avoca.
dn30:2.27.1 Tatthetaṁ vuccati:
dn30:2.27.2 “Na samphappalāpaṁ na muddhataṁ,
dn30:2.27.3 Avikiṇṇavacanabyappatho ahosi;
dn30:2.27.4 Ahitamapi ca apanudi,
dn30:2.27.5 Hitamapi ca bahujanasukhañca abhaṇi.
dn30:2.27.6 Taṁ katvā ito cuto divamupapajji,
dn30:2.27.7 Sukataphalavipākamanubhosi;
dn30:2.27.8 Caviya punaridhāgato samāno,
dn30:2.27.9 Dvidugamavaratarahanuttamalattha.
dn30:2.27.10 Rājā hoti suduppadhaṁsiyo,
dn30:2.27.11 Manujindo manujādhipati mahānubhāvo;
dn30:2.27.12 Tidivapuravarasamo bhavati,
dn30:2.27.13 Suravarataroriva indo.
dn30:2.27.14 Gandhabbāsurayakkharakkhasebhi,
dn30:2.27.15 Surehi na hi bhavati suppadhaṁsiyo;
dn30:2.27.16 Tathatto yadi bhavati tathāvidho,
dn30:2.27.17 Idha disā ca paṭidisā ca vidisā cā”ti.
dn30:2.28.0 31–32. Samadantasusukkadāṭhālakkhaṇāni
dn30:2.28.1 “Yampi, bhikkhave, tathāgato purimaṁ jātiṁ purimaṁ bhavaṁ purimaṁ niketaṁ pubbe manussabhūto samāno
dn30:2.28.2 micchājīvaṁ pahāya sammāājīvena jīvikaṁ kappesi, tulākūṭakaṁsakūṭamānakūṭaukkoṭanavañcananikatisāciyogachedanavadhabandhanaviparāmosaālopasahasākārā paṭivirato ahosi.
dn30:2.28.3 So tassa kammassa kaṭattā upacitattā ussannattā vipulattā kāyassa bhedā paraṁ maraṇā sugatiṁ saggaṁ lokaṁ upapajjati.
dn30:2.28.4 So tattha aññe deve dasahi ṭhānehi adhigaṇhāti dibbena āyunā dibbena vaṇṇena dibbena sukhena dibbena yasena dibbena ādhipateyyena dibbehi rūpehi dibbehi saddehi dibbehi gandhehi dibbehi rasehi dibbehi phoṭṭhabbehi.
dn30:2.28.5 So tato cuto itthattaṁ āgato samāno imāni dve mahāpurisalakkhaṇāni paṭilabhati, samadanto ca hoti susukkadāṭho ca.
dn30:2.29.1 So tehi lakkhaṇehi samannāgato sace agāraṁ ajjhāvasati, rājā hoti cakkavattī dhammiko dhammarājā cāturanto vijitāvī janapadatthāvariyappatto sattaratanasamannāgato.
dn30:2.29.2 Tassimāni satta ratanāni bhavanti, seyyathidaṁ—
dn30:2.29.3 cakkaratanaṁ hatthiratanaṁ assaratanaṁ maṇiratanaṁ itthiratanaṁ gahapatiratanaṁ pariṇāyakaratanameva sattamaṁ.
dn30:2.29.4 Parosahassaṁ kho panassa puttā bhavanti sūrā vīraṅgarūpā parasenappamaddanā.
dn30:2.29.5 So imaṁ pathaviṁ sāgarapariyantaṁ akhilamanimittamakaṇṭakaṁ iddhaṁ phītaṁ khemaṁ sivaṁ nirabbudaṁ adaṇḍena asatthena dhammena abhivijiya ajjhāvasati.
dn30:2.29.6 Rājā samāno kiṁ labhati?
dn30:2.29.7 Suciparivāro hoti sucissa honti parivārā brāhmaṇagahapatikā negamajānapadā gaṇakamahāmattā anīkaṭṭhā dovārikā amaccā pārisajjā rājāno bhogiyā kumārā.
dn30:2.29.8 Rājā samāno idaṁ labhati.
dn30:2.30.1 Sace kho pana agārasmā anagāriyaṁ pabbajati, arahaṁ hoti sammāsambuddho loke vivaṭṭacchado.
dn30:2.30.2 Buddho samāno kiṁ labhati?
dn30:2.30.3 Suciparivāro hoti, sucissa honti parivārā, bhikkhū bhikkhuniyo upāsakā upāsikāyo devā manussā asurā nāgā gandhabbā.
dn30:2.30.4 Buddho samāno idaṁ labhati”.
dn30:2.30.5 Etamatthaṁ bhagavā avoca.
dn30:2.31.1 Tatthetaṁ vuccati:
dn30:2.31.2 “Micchājīvañca avassaji samena vuttiṁ,
dn30:2.31.3 Sucinā so janayittha dhammikena;
dn30:2.31.4 Ahitamapi ca apanudi,
dn30:2.31.5 Hitamapi ca bahujanasukhañca acari.
dn30:2.31.6 Sagge vedayati naro sukhapphalāni,
dn30:2.31.7 Karitvā nipuṇebhi vidūhi sabbhi;
dn30:2.31.8 Vaṇṇitāni tidivapuravarasamo,
dn30:2.31.9 Abhiramati ratikhiḍḍāsamaṅgī.
dn30:2.31.10 Laddhāna mānusakaṁ bhavaṁ tato,
dn30:2.31.11 Cavitvāna sukataphalavipākaṁ;
dn30:2.31.12 Sesakena paṭilabhati lapanajaṁ,
dn30:2.31.13 Samamapi sucisusukkaṁ.
dn30:2.31.14 Taṁ veyyañjanikā samāgatā bahavo,
dn30:2.31.15 Byākaṁsu nipuṇasammatā manujā;
dn30:2.31.16 Sucijanaparivāragaṇo bhavati,
dn30:2.31.17 Dijasamasukkasucisobhanadanto.
dn30:2.31.18 Rañño hoti bahujano,
dn30:2.31.19 Suciparivāro mahatiṁ mahiṁ anusāsato;
dn30:2.31.20 Pasayha na ca janapadatudanaṁ,
dn30:2.31.21 Hitamapi ca bahujanasukhañca caranti.
dn30:2.31.22 Atha ce pabbajati bhavati vipāpo,
dn30:2.31.23 Samaṇo samitarajo vivaṭṭacchado;
dn30:2.31.24 Vigatadarathakilamatho,
dn30:2.31.25 Imamapi ca paramapi ca passati lokaṁ.
dn30:2.31.26 Tassovādakarā bahugihī ca pabbajitā ca,
dn30:2.31.27 Asuciṁ garahitaṁ dhunanti pāpaṁ;
dn30:2.31.28 Sa hi sucibhi parivuto bhavati,
dn30:2.31.29 Malakhilakalikilese panudehī”ti.
dn30:2.31.30 Idamavoca bhagavā.
dn30:2.31.31 Attamanā te bhikkhū bhagavato bhāsitaṁ abhinandunti.
dn30:2.31.32 Lakkhaṇasuttaṁ niṭṭhitaṁ sattamaṁ.