dn25:7.0 2. Tapojigucchāvāda
BAGIAN 7
dn25:7.1 Atha kho bhagavā yena nigrodho paribbājako tenupasaṅkami.
dn25:7.2 Atha kho nigrodho paribbājako bhagavantaṁ etadavoca:
dn25:7.3 “etu kho, bhante, bhagavā, svāgataṁ, bhante, bhagavato.
dn25:7.4 Cirassaṁ kho, bhante, bhagavā imaṁ pariyāyamakāsi yadidaṁ idhāgamanāya.
dn25:7.5 Nisīdatu, bhante, bhagavā, idamāsanaṁ paññattan”ti.
dn25:7.6 Nisīdi bhagavā paññatte āsane.
dn25:7.7 Nigrodhopi kho paribbājako aññataraṁ nīcāsanaṁ gahetvā ekamantaṁ nisīdi.
dn25:7.8 Ekamantaṁ nisinnaṁ kho nigrodhaṁ paribbājakaṁ bhagavā etadavoca:
dn25:7.9 “kāya nuttha, nigrodha, etarahi kathāya sannisinnā, kā ca pana vo antarākathā vippakatā”ti?
dn25:7.10 Evaṁ vutte, nigrodho paribbājako bhagavantaṁ etadavoca:
dn25:7.11 “idha mayaṁ, bhante, addasāma bhagavantaṁ sumāgadhāya tīre moranivāpe abbhokāse caṅkamantaṁ, disvāna evaṁ avocumhā:
dn25:7.12 ‘sace samaṇo gotamo imaṁ parisaṁ āgaccheyya, imaṁ taṁ pañhaṁ puccheyyāma:
dn25:7.13 “ko nāma so, bhante, bhagavato dhammo, yena bhagavā sāvake vineti, yena bhagavatā sāvakā vinītā assāsappattā paṭijānanti ajjhāsayaṁ ādibrahmacariyan”’ti?
dn25:7.14 Ayaṁ kho no, bhante, antarākathā vippakatā; atha bhagavā anuppatto”ti.
dn25:7.15 “Dujjānaṁ kho etaṁ, nigrodha, tayā aññadiṭṭhikena aññakhantikena aññarucikena aññatrāyogena aññatrācariyakena, yenāhaṁ sāvake vinemi, yena mayā sāvakā vinītā assāsappattā paṭijānanti ajjhāsayaṁ ādibrahmacariyaṁ.
dn25:7.16 Iṅgha tvaṁ maṁ, nigrodha, sake ācariyake adhijegucche pañhaṁ puccha:
dn25:7.17 ‘kathaṁ santā nu kho, bhante, tapojigucchā paripuṇṇā hoti, kathaṁ aparipuṇṇā’”ti?
dn25:7.18 Evaṁ vutte, te paribbājakā unnādino uccāsaddamahāsaddā ahesuṁ:
dn25:7.19 “acchariyaṁ vata bho, abbhutaṁ vata bho, samaṇassa gotamassa mahiddhikatā mahānubhāvatā, yatra hi nāma sakavādaṁ ṭhapessati, paravādena pavāressatī”ti.