Pāthikasutta

dn24:2.1.1 Atha kho, bhaggava, aññataro licchavimahāmatto uṭṭhāyāsanā taṁ parisaṁ etadavoca:

dn24:2.1.2 ‘tena hi, bho, muhuttaṁ tāva āgametha, yāvāhaṁ gacchāmi.

dn24:2.1.3 Appeva nāma ahampi sakkuṇeyyaṁ acelaṁ pāthikaputtaṁ imaṁ parisaṁ ānetun’ti.

dn24:2.1.4 Atha kho so, bhaggava, licchavimahāmatto yena tindukakhāṇuparibbājakārāmo, yena acelo pāthikaputto tenupasaṅkami. upasaṅkamitvā acelaṁ pāthikaputtaṁ etadavoca:

dn24:2.1.5 ‘abhikkamāvuso pāthikaputta, abhikkantaṁ te seyyo, abhikkantā abhiññātā abhiññātā licchavī, abhikkantā abhiññātā abhiññātā ca brāhmaṇamahāsālā gahapatinecayikā nānātitthiyā samaṇabrāhmaṇā. Samaṇopi gotamo āyasmato ārāme divāvihāraṁ nisinno.

dn24:2.1.6 Bhāsitā kho pana te esā, āvuso pāthikaputta, vesāliyaṁ parisati vācā—

dn24:2.1.7 samaṇopi gotamo ñāṇavādo …pe…

dn24:2.1.8 taddiguṇaṁ taddiguṇāhaṁ karissāmīti.

dn24:2.1.9 Abhikkamasseva kho, āvuso pāthikaputta, upaḍḍhapathaṁ.

dn24:2.1.10 Sabbapaṭhamaṁyeva āgantvā samaṇo gotamo āyasmato ārāme divāvihāraṁ nisinno.

dn24:2.1.11 Bhāsitā kho panesā, āvuso pāthikaputta, samaṇena gotamena parisati vācā—

dn24:2.1.12 abhabbo kho acelo pāthikaputto taṁ vācaṁ appahāya taṁ cittaṁ appahāya taṁ diṭṭhiṁ appaṭinissajjitvā mama sammukhībhāvaṁ āgantuṁ.

dn24:2.1.13 Sacepissa evamassa—

dn24:2.1.14 ahaṁ taṁ vācaṁ appahāya taṁ cittaṁ appahāya taṁ diṭṭhiṁ appaṭinissajjitvā samaṇassa gotamassa sammukhībhāvaṁ gaccheyyanti, muddhāpi tassa vipateyyāti.

dn24:2.1.15 Abhikkamāvuso pāthikaputta, abhikkamaneneva te jayaṁ karissāma, samaṇassa gotamassa parājayan’ti.

dn24:2.2.1 Evaṁ vutte, bhaggava, acelo pāthikaputto ‘āyāmi, āvuso, āyāmi, āvuso’ti vatvā tattheva saṁsappati, na sakkoti āsanāpi vuṭṭhātuṁ.

dn24:2.2.2 Atha kho so, bhaggava, licchavimahāmatto acelaṁ pāthikaputtaṁ etadavoca:

dn24:2.2.3 ‘kiṁ su nāma te, āvuso pāthikaputta, pāvaḷā su nāma te pīṭhakasmiṁ allīnā, pīṭhakaṁ su nāma te pāvaḷāsu allīnaṁ?

dn24:2.2.4 Āyāmi, āvuso, āyāmi, āvusoti vatvā tattheva saṁsappasi, na sakkosi āsanāpi vuṭṭhātun’ti.

dn24:2.2.5 Evampi kho, bhaggava, vuccamāno acelo pāthikaputto ‘āyāmi, āvuso, āyāmi, āvuso’ti vatvā tattheva saṁsappati, na sakkoti āsanāpi vuṭṭhātuṁ.

dn24:2.3.1 Yadā kho so, bhaggava, licchavimahāmatto aññāsi:

dn24:2.3.2 ‘parābhūtarūpo ayaṁ acelo pāthikaputto āyāmi, āvuso, āyāmi, āvusoti vatvā tattheva saṁsappati, na sakkoti āsanāpi vuṭṭhātun’ti.

dn24:2.3.3 Atha taṁ parisaṁ āgantvā evamārocesi:

dn24:2.3.4 ‘parābhūtarūpo, bho, acelo pāthikaputto āyāmi, āvuso, āyāmi, āvusoti vatvā tattheva saṁsappati, na sakkoti āsanāpi vuṭṭhātun’ti.

dn24:2.3.5 Evaṁ vutte, ahaṁ, bhaggava, taṁ parisaṁ etadavocaṁ:

dn24:2.3.6 ‘abhabbo kho, āvuso, acelo pāthikaputto taṁ vācaṁ appahāya taṁ cittaṁ appahāya taṁ diṭṭhiṁ appaṭinissajjitvā mama sammukhībhāvaṁ āgantuṁ.

dn24:2.3.7 Sacepissa evamassa—

dn24:2.3.8 ahaṁ taṁ vācaṁ appahāya taṁ cittaṁ appahāya taṁ diṭṭhiṁ appaṭinissajjitvā samaṇassa gotamassa sammukhībhāvaṁ gaccheyyanti, muddhāpi tassa vipateyya.

dn24:2.3.9 Sace pāyasmantānaṁ licchavīnaṁ evamassa—

dn24:2.3.10 mayaṁ acelaṁ pāthikaputtaṁ varattāhi bandhitvā goyugehi āviñcheyyāmāti, tā varattā chijjeyyuṁ pāthikaputto vā.

dn24:2.3.11 Abhabbo pana acelo pāthikaputto taṁ vācaṁ appahāya taṁ cittaṁ appahāya taṁ diṭṭhiṁ appaṭinissajjitvā mama sammukhībhāvaṁ āgantuṁ.

dn24:2.3.12 Sacepissa evamassa—

dn24:2.3.13 ahaṁ taṁ vācaṁ appahāya taṁ cittaṁ appahāya taṁ diṭṭhiṁ appaṭinissajjitvā samaṇassa gotamassa sammukhībhāvaṁ gaccheyyanti, muddhāpi tassa vipateyyā’ti.

dn24:2.4.1 Atha kho, bhaggava, jāliyo dārupattikantevāsī uṭṭhāyāsanā taṁ parisaṁ etadavoca:

dn24:2.4.2 ‘tena hi, bho, muhuttaṁ tāva āgametha, yāvāhaṁ gacchāmi;

dn24:2.4.3 appeva nāma ahampi sakkuṇeyyaṁ acelaṁ pāthikaputtaṁ imaṁ parisaṁ ānetun’ti.

dn24:2.4.4 Atha kho, bhaggava, jāliyo dārupattikantevāsī yena tindukakhāṇuparibbājakārāmo, yena acelo pāthikaputto tenupasaṅkami. upasaṅkamitvā acelaṁ pāthikaputtaṁ etadavoca:

dn24:2.4.5 ‘abhikkamāvuso pāthikaputta, abhikkantaṁ te seyyo. Abhikkantā abhiññātā abhiññātā licchavī, abhikkantā abhiññātā abhiññātā ca brāhmaṇamahāsālā gahapatinecayikā nānātitthiyā samaṇabrāhmaṇā. Samaṇopi gotamo āyasmato ārāme divāvihāraṁ nisinno.

dn24:2.4.6 Bhāsitā kho pana te esā, āvuso pāthikaputta, vesāliyaṁ parisati vācā—

dn24:2.4.7 samaṇopi gotamo ñāṇavādo …pe…

dn24:2.4.8 taddiguṇaṁ taddiguṇāhaṁ karissāmīti.

dn24:2.4.9 Abhikkamasseva, kho āvuso pāthikaputta, upaḍḍhapathaṁ.

dn24:2.4.10 Sabbapaṭhamaṁyeva āgantvā samaṇo gotamo āyasmato ārāme divāvihāraṁ nisinno.

dn24:2.4.11 Bhāsitā kho panesā, āvuso pāthikaputta, samaṇena gotamena parisati vācā—

dn24:2.4.12 abhabbo acelo pāthikaputto taṁ vācaṁ appahāya taṁ cittaṁ appahāya taṁ diṭṭhiṁ appaṭinissajjitvā mama sammukhībhāvaṁ āgantuṁ.

dn24:2.4.13 Sacepissa evamassa—

dn24:2.4.14 ahaṁ taṁ vācaṁ appahāya taṁ cittaṁ appahāya taṁ diṭṭhiṁ appaṭinissajjitvā samaṇassa gotamassa sammukhībhāvaṁ gaccheyyanti, muddhāpi tassa vipateyya.

dn24:2.4.15 Sace pāyasmantānaṁ licchavīnaṁ evamassa—

dn24:2.4.16 mayaṁ acelaṁ pāthikaputtaṁ varattāhi bandhitvā goyugehi āviñcheyyāmāti. Tā varattā chijjeyyuṁ pāthikaputto vā.

dn24:2.4.17 Abhabbo pana acelo pāthikaputto taṁ vācaṁ appahāya taṁ cittaṁ appahāya taṁ diṭṭhiṁ appaṭinissajjitvā mama sammukhībhāvaṁ āgantuṁ.

dn24:2.4.18 Sacepissa evamassa—

dn24:2.4.19 ahaṁ taṁ vācaṁ appahāya taṁ cittaṁ appahāya taṁ diṭṭhiṁ appaṭinissajjitvā samaṇassa gotamassa sammukhībhāvaṁ āgaccheyyanti, muddhāpi tassa vipateyyāti.

dn24:2.4.20 Abhikkamāvuso pāthikaputta, abhikkamaneneva te jayaṁ karissāma, samaṇassa gotamassa parājayan’ti.

dn24:2.5.1 Evaṁ vutte, bhaggava, acelo pāthikaputto ‘āyāmi, āvuso, āyāmi, āvuso’ti vatvā tattheva saṁsappati, na sakkoti āsanāpi vuṭṭhātuṁ.

dn24:2.5.2 Atha kho, bhaggava, jāliyo dārupattikantevāsī acelaṁ pāthikaputtaṁ etadavoca:

dn24:2.5.3 ‘kiṁ su nāma te, āvuso pāthikaputta, pāvaḷā su nāma te pīṭhakasmiṁ allīnā, pīṭhakaṁ su nāma te pāvaḷāsu allīnaṁ?

dn24:2.5.4 Āyāmi, āvuso, āyāmi, āvusoti vatvā tattheva saṁsappasi, na sakkosi āsanāpi vuṭṭhātun’ti.

dn24:2.5.5 Evampi kho, bhaggava, vuccamāno acelo pāthikaputto ‘āyāmi, āvuso, āyāmi, āvuso’ti vatvā tattheva saṁsappati, na sakkoti āsanāpi vuṭṭhātunti.

dn24:2.6.1 Yadā kho, bhaggava, jāliyo dārupattikantevāsī aññāsi:

dn24:2.6.2 ‘parābhūtarūpo ayaṁ acelo pāthikaputto āyāmi, āvuso, āyāmi, āvusoti vatvā tattheva saṁsappati, na sakkoti āsanāpi vuṭṭhātun’ti, atha naṁ etadavoca—

dn24:2.6.3 Bhūtapubbaṁ, āvuso pāthikaputta, sīhassa migarañño etadahosi:

dn24:2.6.4 ‘yannūnāhaṁ aññataraṁ vanasaṇḍaṁ nissāya āsayaṁ kappeyyaṁ.

dn24:2.6.5 Tatrāsayaṁ kappetvā sāyanhasamayaṁ āsayā nikkhameyyaṁ, āsayā nikkhamitvā vijambheyyaṁ, vijambhitvā samantā catuddisā anuvilokeyyaṁ, samantā catuddisā anuviloketvā tikkhattuṁ sīhanādaṁ nadeyyaṁ, tikkhattuṁ sīhanādaṁ naditvā gocarāya pakkameyyaṁ.

dn24:2.6.6 So varaṁ varaṁ migasaṅghe vadhitvā mudumaṁsāni mudumaṁsāni bhakkhayitvā tameva āsayaṁ ajjhupeyyan’ti.

dn24:2.6.7 Atha kho, āvuso, so sīho migarājā aññataraṁ vanasaṇḍaṁ nissāya āsayaṁ kappesi.

dn24:2.6.8 Tatrāsayaṁ kappetvā sāyanhasamayaṁ āsayā nikkhami, āsayā nikkhamitvā vijambhi, vijambhitvā samantā catuddisā anuvilokesi, samantā catuddisā anuviloketvā tikkhattuṁ sīhanādaṁ nadi, tikkhattuṁ sīhanādaṁ naditvā gocarāya pakkāmi.

dn24:2.6.9 So varaṁ varaṁ migasaṅghe vadhitvā mudumaṁsāni mudumaṁsāni bhakkhayitvā tameva āsayaṁ ajjhupesi.

dn24:2.6.10 Tasseva kho, āvuso pāthikaputta, sīhassa migarañño vighāsasaṁvaḍḍho jarasiṅgālo ditto ceva balavā ca.

dn24:2.6.11 Atha kho, āvuso, tassa jarasiṅgālassa etadahosi:

dn24:2.6.12 ‘ko cāhaṁ, ko sīho migarājā.

dn24:2.6.13 Yannūnāhampi aññataraṁ vanasaṇḍaṁ nissāya āsayaṁ kappeyyaṁ.

dn24:2.6.14 Tatrāsayaṁ kappetvā sāyanhasamayaṁ āsayā nikkhameyyaṁ, āsayā nikkhamitvā vijambheyyaṁ, vijambhitvā samantā catuddisā anuvilokeyyaṁ, samantā catuddisā anuviloketvā tikkhattuṁ sīhanādaṁ nadeyyaṁ, tikkhattuṁ sīhanādaṁ naditvā gocarāya pakkameyyaṁ.

dn24:2.6.15 So varaṁ varaṁ migasaṅghe vadhitvā mudumaṁsāni mudumaṁsāni bhakkhayitvā tameva āsayaṁ ajjhupeyyan’ti.

dn24:2.7.1 Atha kho so, āvuso, jarasiṅgālo aññataraṁ vanasaṇḍaṁ nissāya āsayaṁ kappesi.

dn24:2.7.2 Tatrāsayaṁ kappetvā sāyanhasamayaṁ āsayā nikkhami, āsayā nikkhamitvā vijambhi, vijambhitvā samantā catuddisā anuvilokesi, samantā catuddisā anuviloketvā tikkhattuṁ sīhanādaṁ nadissāmīti siṅgālakaṁyeva anadi bheraṇḍakaṁyeva anadi, ke ca chave siṅgāle, ke pana sīhanādeti.

dn24:2.7.3 Evameva kho tvaṁ, āvuso pāthikaputta, sugatāpadānesu jīvamāno sugatātirittāni bhuñjamāno tathāgate arahante sammāsambuddhe āsādetabbaṁ maññasi.

dn24:2.7.4 Ke ca chave pāthikaputte, kā ca tathāgatānaṁ arahantānaṁ sammāsambuddhānaṁ āsādanāti.

dn24:2.8.1 Yato kho, bhaggava, jāliyo dārupattikantevāsī iminā opammena neva asakkhi acelaṁ pāthikaputtaṁ tamhā āsanā cāvetuṁ.

dn24:2.8.2 Atha naṁ etadavoca:

dn24:2.8.3 ‘Sīhoti attānaṁ samekkhiyāna,

dn24:2.8.4 Amaññi kotthu migarājāhamasmi;

dn24:2.8.5 Tatheva so siṅgālakaṁ anadi,

dn24:2.8.6 Ke ca chave siṅgāle ke pana sīhanādeti.

dn24:2.8.7 Evameva kho tvaṁ, āvuso pāthikaputta, sugatāpadānesu jīvamāno sugatātirittāni bhuñjamāno tathāgate arahante sammāsambuddhe āsādetabbaṁ maññasi.

dn24:2.8.8 Ke ca chave pāthikaputte, kā ca tathāgatānaṁ arahantānaṁ sammāsambuddhānaṁ āsādanā’ti.

dn24:2.9.1 Yato kho, bhaggava, jāliyo dārupattikantevāsī imināpi opammena neva asakkhi acelaṁ pāthikaputtaṁ tamhā āsanā cāvetuṁ.

dn24:2.9.2 Atha naṁ etadavoca:

dn24:2.9.3 ‘Aññaṁ anucaṅkamanaṁ,

dn24:2.9.4 Attānaṁ vighāse samekkhiya;

dn24:2.9.5 Yāva attānaṁ na passati,

dn24:2.9.6 Kotthu tāva byagghoti maññati.

dn24:2.9.7 Tatheva so siṅgālakaṁ anadi,

dn24:2.9.8 Ke ca chave siṅgāle ke pana sīhanādeti.

dn24:2.9.9 Evameva kho tvaṁ, āvuso pāthikaputta, sugatāpadānesu jīvamāno sugatātirittāni bhuñjamāno tathāgate arahante sammāsambuddhe āsādetabbaṁ maññasi.

dn24:2.9.10 Ke ca chave pāthikaputte, kā ca tathāgatānaṁ arahantānaṁ sammāsambuddhānaṁ āsādanā’ti.

dn24:2.10.1 Yato kho, bhaggava, jāliyo dārupattikantevāsī imināpi opammena neva asakkhi acelaṁ pāthikaputtaṁ tamhā āsanā cāvetuṁ.

dn24:2.10.2 Atha naṁ etadavoca:

dn24:2.10.3 ‘Bhutvāna bheke khalamūsikāyo,

dn24:2.10.4 Kaṭasīsu khittāni ca koṇapāni;

dn24:2.10.5 Mahāvane suññavane vivaḍḍho,

dn24:2.10.6 Amaññi kotthu migarājāhamasmi;

dn24:2.10.7 Tatheva so siṅgālakaṁ anadi,

dn24:2.10.8 Ke ca chave siṅgāle ke pana sīhanādeti.

dn24:2.10.9 Evameva kho tvaṁ, āvuso pāthikaputta, sugatāpadānesu jīvamāno sugatātirittāni bhuñjamāno tathāgate arahante sammāsambuddhe āsādetabbaṁ maññasi.

dn24:2.10.10 Ke ca chave pāthikaputte, kā ca tathāgatānaṁ arahantānaṁ sammāsambuddhānaṁ āsādanā’ti.

dn24:2.11.1 Yato kho, bhaggava, jāliyo dārupattikantevāsī imināpi opammena neva asakkhi acelaṁ pāthikaputtaṁ tamhā āsanā cāvetuṁ.

dn24:2.11.2 Atha taṁ parisaṁ āgantvā evamārocesi:

dn24:2.11.3 ‘parābhūtarūpo, bho, acelo pāthikaputto āyāmi āvuso, āyāmi, āvusoti vatvā tattheva saṁsappati, na sakkoti āsanāpi vuṭṭhātun’ti.

dn24:2.12.1 Evaṁ vutte, ahaṁ, bhaggava, taṁ parisaṁ etadavocaṁ:

dn24:2.12.2 ‘abhabbo kho, āvuso, acelo pāthikaputto taṁ vācaṁ appahāya taṁ cittaṁ appahāya taṁ diṭṭhiṁ appaṭinissajjitvā mama sammukhībhāvaṁ āgantuṁ.

dn24:2.12.3 Sacepissa evamassa—

dn24:2.12.4 ahaṁ taṁ vācaṁ appahāya taṁ cittaṁ appahāya taṁ diṭṭhiṁ appaṭinissajjitvā samaṇassa gotamassa sammukhībhāvaṁ gaccheyyanti, muddhāpi tassa vipateyya.

dn24:2.12.5 Sacepāyasmantānaṁ licchavīnaṁ evamassa—

dn24:2.12.6 mayaṁ acelaṁ pāthikaputtaṁ varattāhi bandhitvā nāgehi āviñcheyyāmāti. Tā varattā chijjeyyuṁ pāthikaputto vā.

dn24:2.12.7 Abhabbo pana acelo pāthikaputto taṁ vācaṁ appahāya taṁ cittaṁ appahāya taṁ diṭṭhiṁ appaṭinissajjitvā mama sammukhībhāvaṁ āgantuṁ.

dn24:2.12.8 Sacepissa evamassa—ahaṁ taṁ vācaṁ appahāya taṁ cittaṁ appahāya taṁ diṭṭhiṁ appaṭinissajjitvā samaṇassa gotamassa sammukhībhāvaṁ gaccheyyanti, muddhāpi tassa vipateyyā’ti.

dn24:2.13.1 Atha khvāhaṁ, bhaggava, taṁ parisaṁ dhammiyā kathāya sandassesiṁ samādapesiṁ samuttejesiṁ sampahaṁsesiṁ, taṁ parisaṁ dhammiyā kathāya sandassetvā samādapetvā samuttejetvā sampahaṁsetvā mahābandhanā mokkhaṁ karitvā caturāsītipāṇasahassāni mahāviduggā uddharitvā tejodhātuṁ samāpajjitvā sattatālaṁ vehāsaṁ abbhuggantvā aññaṁ sattatālampi acciṁ abhinimminitvā pajjalitvā dhūmāyitvā mahāvane kūṭāgārasālāyaṁ paccuṭṭhāsiṁ.

dn24:2.13.2 Atha kho, bhaggava, sunakkhatto licchaviputto yenāhaṁ tenupasaṅkami; upasaṅkamitvā maṁ abhivādetvā ekamantaṁ nisīdi. Ekamantaṁ nisinnaṁ kho ahaṁ, bhaggava, sunakkhattaṁ licchaviputtaṁ etadavocaṁ:

dn24:2.13.3 ‘Taṁ kiṁ maññasi, sunakkhatta,

dn24:2.13.4 yatheva te ahaṁ acelaṁ pāthikaputtaṁ ārabbha byākāsiṁ, tatheva taṁ vipākaṁ aññathā vā’ti?

dn24:2.13.5 ‘Yatheva me, bhante, bhagavā acelaṁ pāthikaputtaṁ ārabbha byākāsi, tatheva taṁ vipākaṁ, no aññathā’ti.

dn24:2.13.6 ‘Taṁ kiṁ maññasi, sunakkhatta,

dn24:2.13.7 yadi evaṁ sante kataṁ vā hoti uttari manussadhammā iddhipāṭihāriyaṁ, akataṁ vā’ti?

dn24:2.13.8 ‘Addhā kho, bhante, evaṁ sante kataṁ hoti uttari manussadhammā iddhipāṭihāriyaṁ, no akatan’ti.

dn24:2.13.9 ‘Evampi kho maṁ tvaṁ, moghapurisa, uttari manussadhammā iddhipāṭihāriyaṁ karontaṁ evaṁ vadesi—

dn24:2.13.10 na hi pana me, bhante, bhagavā uttari manussadhammā iddhipāṭihāriyaṁ karotīti.

dn24:2.13.11 Passa, moghapurisa, yāvañca te idaṁ aparaddhan’ti.

dn24:2.13.12 Evampi kho, bhaggava, sunakkhatto licchaviputto mayā vuccamāno apakkameva imasmā dhammavinayā, yathā taṁ āpāyiko nerayiko.

dn24:2.14.0 6. Aggaññapaññattikathā

dn24:2.14.1 Aggaññañcāhaṁ, bhaggava, pajānāmi.

dn24:2.14.2 Tañca pajānāmi, tato ca uttaritaraṁ pajānāmi, tañca pajānaṁ na parāmasāmi, aparāmasato ca me paccattaññeva nibbuti viditā, yadabhijānaṁ tathāgato no anayaṁ āpajjati.

dn24:2.14.3 Santi, bhaggava, eke samaṇabrāhmaṇā issarakuttaṁ brahmakuttaṁ ācariyakaṁ aggaññaṁ paññapenti.

dn24:2.14.4 Tyāhaṁ upasaṅkamitvā evaṁ vadāmi:

dn24:2.14.5 ‘saccaṁ kira tumhe āyasmanto issarakuttaṁ brahmakuttaṁ ācariyakaṁ aggaññaṁ paññapethā’ti?

dn24:2.14.6 Te ca me evaṁ puṭṭhā, ‘āmo’ti paṭijānanti.

dn24:2.14.7 Tyāhaṁ evaṁ vadāmi:

dn24:2.14.8 ‘kathaṁvihitakaṁ pana tumhe āyasmanto issarakuttaṁ brahmakuttaṁ ācariyakaṁ aggaññaṁ paññapethā’ti?

dn24:2.14.9 Te mayā puṭṭhā na sampāyanti, asampāyantā mamaññeva paṭipucchanti.

dn24:2.14.10 Tesāhaṁ puṭṭho byākaromi:

dn24:2.14.11 ‘Hoti kho so, āvuso, samayo yaṁ kadāci karahaci dīghassa addhuno accayena ayaṁ loko saṁvaṭṭati.

dn24:2.14.12 Saṁvaṭṭamāne loke yebhuyyena sattā ābhassarasaṁvattanikā honti.

dn24:2.14.13 Te tattha honti manomayā pītibhakkhā sayaṁpabhā antalikkhacarā subhaṭṭhāyino ciraṁ dīghamaddhānaṁ tiṭṭhanti.

dn24:2.15.1 Hoti kho so, āvuso, samayo yaṁ kadāci karahaci dīghassa addhuno accayena ayaṁ loko vivaṭṭati.

dn24:2.15.2 Vivaṭṭamāne loke suññaṁ brahmavimānaṁ pātubhavati.

dn24:2.15.3 Atha kho aññataro satto āyukkhayā vā puññakkhayā vā ābhassarakāyā cavitvā suññaṁ brahmavimānaṁ upapajjati.

dn24:2.15.4 So tattha hoti manomayo pītibhakkho sayampabho antalikkhacaro subhaṭṭhāyī, ciraṁ dīghamaddhānaṁ tiṭṭhati.

dn24:2.16.1 Tassa tattha ekakassa dīgharattaṁ nivusitattā anabhirati paritassanā uppajjati—

dn24:2.16.2 aho vata aññepi sattā itthattaṁ āgaccheyyunti.

dn24:2.16.3 Atha aññepi sattā āyukkhayā vā puññakkhayā vā ābhassarakāyā cavitvā suññaṁ brahmavimānaṁ upapajjanti tassa sattassa sahabyataṁ.

dn24:2.16.4 Tepi tattha honti manomayā pītibhakkhā sayaṁpabhā antalikkhacarā subhaṭṭhāyino, ciraṁ dīghamaddhānaṁ tiṭṭhanti.

dn24:2.17.1 Tatrāvuso, yo so satto paṭhamaṁ upapanno, tassa evaṁ hoti—

dn24:2.17.2 ahamasmi brahmā mahābrahmā abhibhū anabhibhūto aññadatthudaso vasavattī issaro kattā nimmātā seṭṭho sajitā vasī pitā bhūtabhabyānaṁ, mayā ime sattā nimmitā.

dn24:2.17.3 Taṁ kissa hetu?

dn24:2.17.4 Mamañhi pubbe etadahosi—

dn24:2.17.5 aho vata aññepi sattā itthattaṁ āgaccheyyunti;

dn24:2.17.6 iti mama ca manopaṇidhi. Ime ca sattā itthattaṁ āgatāti.

dn24:2.17.7 Yepi te sattā pacchā upapannā, tesampi evaṁ hoti—

dn24:2.17.8 ayaṁ kho bhavaṁ brahmā mahābrahmā abhibhū anabhibhūto aññadatthudaso vasavattī issaro kattā nimmātā seṭṭho sajitā vasī pitā bhūtabhabyānaṁ;

dn24:2.17.9 iminā mayaṁ bhotā brahmunā nimmitā.

dn24:2.17.10 Taṁ kissa hetu?

dn24:2.17.11 Imañhi mayaṁ addasāma idha paṭhamaṁ upapannaṁ; mayaṁ panāmha pacchā upapannāti.

dn24:2.17.12 Tatrāvuso, yo so satto paṭhamaṁ upapanno, so dīghāyukataro ca hoti vaṇṇavantataro ca mahesakkhataro ca.

dn24:2.17.13 Ye pana te sattā pacchā upapannā, te appāyukatarā ca honti dubbaṇṇatarā ca appesakkhatarā ca.

dn24:2.17.14 Ṭhānaṁ kho panetaṁ, āvuso, vijjati, yaṁ aññataro satto tamhā kāyā cavitvā itthattaṁ āgacchati.

dn24:2.17.15 Itthattaṁ āgato samāno agārasmā anagāriyaṁ pabbajati.

dn24:2.17.16 Agārasmā anagāriyaṁ pabbajito samāno ātappamanvāya padhānamanvāya anuyogamanvāya appamādamanvāya sammāmanasikāramanvāya tathārūpaṁ cetosamādhiṁ phusati, yathāsamāhite citte taṁ pubbenivāsaṁ anussarati; tato paraṁ nānussarati.

dn24:2.17.17 So evamāha:

dn24:2.17.18 “yo kho so bhavaṁ brahmā mahābrahmā abhibhū anabhibhūto aññadatthudaso vasavattī issaro kattā nimmātā seṭṭho sajitā vasī pitā bhūtabhabyānaṁ, yena mayaṁ bhotā brahmunā nimmitā. So nicco dhuvo sassato avipariṇāmadhammo sassatisamaṁ tatheva ṭhassati.

dn24:2.17.19 Ye pana mayaṁ ahumhā tena bhotā brahmunā nimmitā, te mayaṁ aniccā addhuvā appāyukā cavanadhammā itthattaṁ āgatā”ti.

dn24:2.17.20 Evaṁvihitakaṁ no tumhe āyasmanto issarakuttaṁ brahmakuttaṁ ācariyakaṁ aggaññaṁ paññapethā’ti.

dn24:2.17.21 Te evamāhaṁsu:

dn24:2.17.22 ‘evaṁ kho no, āvuso gotama, sutaṁ, yathevāyasmā gotamo āhā’ti.

dn24:2.17.23 Aggaññañcāhaṁ, bhaggava, pajānāmi.

dn24:2.17.24 Tañca pajānāmi, tato ca uttaritaraṁ pajānāmi, tañca pajānaṁ na parāmasāmi, aparāmasato ca me paccattaññeva nibbuti viditā. Yadabhijānaṁ tathāgato no anayaṁ āpajjati.

dn24:2.18.1 Santi, bhaggava, eke samaṇabrāhmaṇā khiḍḍāpadosikaṁ ācariyakaṁ aggaññaṁ paññapenti.

dn24:2.18.2 Tyāhaṁ upasaṅkamitvā evaṁ vadāmi:

dn24:2.18.3 ‘saccaṁ kira tumhe āyasmanto khiḍḍāpadosikaṁ ācariyakaṁ aggaññaṁ paññapethā’ti?

dn24:2.18.4 Te ca me evaṁ puṭṭhā ‘āmo’ti paṭijānanti.

dn24:2.18.5 Tyāhaṁ evaṁ vadāmi:

dn24:2.18.6 ‘kathaṁvihitakaṁ pana tumhe āyasmanto khiḍḍāpadosikaṁ ācariyakaṁ aggaññaṁ paññapethā’ti?

dn24:2.18.7 Te mayā puṭṭhā na sampāyanti, asampāyantā mamaññeva paṭipucchanti,

dn24:2.18.8 tesāhaṁ puṭṭho byākaromi:

dn24:2.18.9 ‘Santāvuso, khiḍḍāpadosikā nāma devā. Te ativelaṁ hassakhiḍḍāratidhammasamāpannā viharanti. Tesaṁ ativelaṁ hassakhiḍḍāratidhammasamāpannānaṁ viharataṁ sati sammussati, satiyā sammosā te devā tamhā kāyā cavanti.

dn24:2.18.10 Ṭhānaṁ kho panetaṁ, āvuso, vijjati, yaṁ aññataro satto tamhā kāyā cavitvā itthattaṁ āgacchati,

dn24:2.18.11 itthattaṁ āgato samāno agārasmā anagāriyaṁ pabbajati,

dn24:2.18.12 agārasmā anagāriyaṁ pabbajito samāno ātappamanvāya padhānamanvāya anuyogamanvāya appamādamanvāya sammāmanasikāramanvāya tathārūpaṁ cetosamādhiṁ phusati, yathāsamāhite citte taṁ pubbenivāsaṁ anussarati; tato paraṁ nānussarati.

dn24:2.18.13 So evamāha:

dn24:2.18.14 “ye kho te bhonto devā na khiḍḍāpadosikā te na ativelaṁ hassakhiḍḍāratidhammasamāpannā viharanti. Tesaṁ nātivelaṁ hassakhiḍḍāratidhammasamāpannānaṁ viharataṁ sati na sammussati, satiyā asammosā te devā tamhā kāyā na cavanti,

dn24:2.18.15 niccā dhuvā sassatā avipariṇāmadhammā sassatisamaṁ tatheva ṭhassanti.

dn24:2.18.16 Ye pana mayaṁ ahumhā khiḍḍāpadosikā te mayaṁ ativelaṁ hassakhiḍḍāratidhammasamāpannā viharimhā, tesaṁ no ativelaṁ hassakhiḍḍāratidhammasamāpannānaṁ viharataṁ sati sammussati, satiyā sammosā evaṁ mayaṁ tamhā kāyā cutā,

dn24:2.18.17 aniccā addhuvā appāyukā cavanadhammā itthattaṁ āgatā”ti.

dn24:2.18.18 Evaṁvihitakaṁ no tumhe āyasmanto khiḍḍāpadosikaṁ ācariyakaṁ aggaññaṁ paññapethā’ti.

dn24:2.18.19 Te evamāhaṁsu:

dn24:2.18.20 ‘evaṁ kho no, āvuso gotama, sutaṁ, yathevāyasmā gotamo āhā’ti.

dn24:2.18.21 Aggaññañcāhaṁ, bhaggava, pajānāmi …pe…

dn24:2.18.22 yadabhijānaṁ tathāgato no anayaṁ āpajjati.

dn24:2.19.1 Santi, bhaggava, eke samaṇabrāhmaṇā manopadosikaṁ ācariyakaṁ aggaññaṁ paññapenti.

dn24:2.19.2 Tyāhaṁ upasaṅkamitvā evaṁ vadāmi:

dn24:2.19.3 ‘saccaṁ kira tumhe āyasmanto manopadosikaṁ ācariyakaṁ aggaññaṁ paññapethā’ti?

dn24:2.19.4 Te ca me evaṁ puṭṭhā ‘āmo’ti paṭijānanti.

dn24:2.19.5 Tyāhaṁ evaṁ vadāmi:

dn24:2.19.6 ‘kathaṁvihitakaṁ pana tumhe āyasmanto manopadosikaṁ ācariyakaṁ aggaññaṁ paññapethā’ti?

dn24:2.19.7 Te mayā puṭṭhā na sampāyanti, asampāyantā mamaññeva paṭipucchanti.

dn24:2.19.8 Tesāhaṁ puṭṭho byākaromi:

dn24:2.19.9 ‘Santāvuso, manopadosikā nāma devā. Te ativelaṁ aññamaññaṁ upanijjhāyanti. Te ativelaṁ aññamaññaṁ upanijjhāyantā aññamaññamhi cittāni padūsenti. Te aññamaññaṁ paduṭṭhacittā kilantakāyā kilantacittā. Te devā tamhā kāyā cavanti.

dn24:2.19.10 Ṭhānaṁ kho panetaṁ, āvuso, vijjati, yaṁ aññataro satto tamhā kāyā cavitvā itthattaṁ āgacchati.

dn24:2.19.11 Itthattaṁ āgato samāno agārasmā anagāriyaṁ pabbajati.

dn24:2.19.12 Agārasmā anagāriyaṁ pabbajito samāno ātappamanvāya padhānamanvāya anuyogamanvāya appamādamanvāya sammāmanasikāramanvāya tathārūpaṁ cetosamādhiṁ phusati, yathāsamāhite citte taṁ pubbenivāsaṁ anussarati, tato paraṁ nānussarati.

dn24:2.19.13 So evamāha:

dn24:2.19.14 “ye kho te bhonto devā na manopadosikā te nātivelaṁ aññamaññaṁ upanijjhāyanti. Te nātivelaṁ aññamaññaṁ upanijjhāyantā aññamaññamhi cittāni nappadūsenti. Te aññamaññaṁ appaduṭṭhacittā akilantakāyā akilantacittā. Te devā tamhā kāyā na cavanti,

dn24:2.19.15 niccā dhuvā sassatā avipariṇāmadhammā sassatisamaṁ tatheva ṭhassanti.

dn24:2.19.16 Ye pana mayaṁ ahumhā manopadosikā, te mayaṁ ativelaṁ aññamaññaṁ upanijjhāyimhā. Te mayaṁ ativelaṁ aññamaññaṁ upanijjhāyantā aññamaññamhi cittāni padūsimhā. Te mayaṁ aññamaññaṁ paduṭṭhacittā kilantakāyā kilantacittā. Evaṁ mayaṁ tamhā kāyā cutā,

dn24:2.19.17 aniccā addhuvā appāyukā cavanadhammā itthattaṁ āgatā”ti.

dn24:2.19.18 Evaṁvihitakaṁ no tumhe āyasmanto manopadosikaṁ ācariyakaṁ aggaññaṁ paññapethā’ti.

dn24:2.19.19 Te evamāhaṁsu:

dn24:2.19.20 ‘evaṁ kho no, āvuso gotama, sutaṁ, yathevāyasmā gotamo āhā’ti.

dn24:2.19.21 Aggaññañcāhaṁ, bhaggava, pajānāmi …pe…

dn24:2.19.22 yadabhijānaṁ tathāgato no anayaṁ āpajjati.

dn24:2.20.1 Santi, bhaggava, eke samaṇabrāhmaṇā adhiccasamuppannaṁ ācariyakaṁ aggaññaṁ paññapenti.

dn24:2.20.2 Tyāhaṁ upasaṅkamitvā evaṁ vadāmi:

dn24:2.20.3 ‘saccaṁ kira tumhe āyasmanto adhiccasamuppannaṁ ācariyakaṁ aggaññaṁ paññapethā’ti?

dn24:2.20.4 Te ca me evaṁ puṭṭhā ‘āmo’ti paṭijānanti.

dn24:2.20.5 Tyāhaṁ evaṁ vadāmi:

dn24:2.20.6 ‘kathaṁvihitakaṁ pana tumhe āyasmanto adhiccasamuppannaṁ ācariyakaṁ aggaññaṁ paññapethā’ti?

dn24:2.20.7 Te mayā puṭṭhā na sampāyanti, asampāyantā mamaññeva paṭipucchanti.

dn24:2.20.8 Tesāhaṁ puṭṭho byākaromi:

dn24:2.20.9 ‘Santāvuso, asaññasattā nāma devā.

dn24:2.20.10 Saññuppādā ca pana te devā tamhā kāyā cavanti.

dn24:2.20.11 Ṭhānaṁ kho panetaṁ, āvuso, vijjati yaṁ aññataro satto tamhā kāyā cavitvā itthattaṁ āgacchati.

dn24:2.20.12 Itthattaṁ āgato samāno agārasmā anagāriyaṁ pabbajati.

dn24:2.20.13 Agārasmā anagāriyaṁ pabbajito samāno ātappamanvāya padhānamanvāya anuyogamanvāya appamādamanvāya sammāmanasikāramanvāya tathārūpaṁ cetosamādhiṁ phusati, yathāsamāhite citte taṁ saññuppādaṁ anussarati, tato paraṁ nānussarati’.

dn24:2.20.14 So evamāha:

dn24:2.20.15 ‘adhiccasamuppanno attā ca loko ca.

dn24:2.20.16 Taṁ kissa hetu?

dn24:2.20.17 Ahañhi pubbe nāhosiṁ, somhi etarahi ahutvā santatāya pariṇato’ti.

dn24:2.20.18 ‘Evaṁvihitakaṁ no tumhe āyasmanto adhiccasamuppannaṁ ācariyakaṁ aggaññaṁ paññapethā’ti?

dn24:2.20.19 Te evamāhaṁsu:

dn24:2.20.20 ‘evaṁ kho no, āvuso gotama, sutaṁ yathevāyasmā gotamo āhā’ti.

dn24:2.20.21 Aggaññañcāhaṁ, bhaggava, pajānāmi tañca pajānāmi, tato ca uttaritaraṁ pajānāmi, tañca pajānaṁ na parāmasāmi, aparāmasato ca me paccattaññeva nibbuti viditā.

dn24:2.20.22 Yadabhijānaṁ tathāgato no anayaṁ āpajjati.

dn24:2.21.1 Evaṁvādiṁ kho maṁ, bhaggava, evamakkhāyiṁ eke samaṇabrāhmaṇā asatā tucchā musā abhūtena abbhācikkhanti:

dn24:2.21.2 ‘viparīto samaṇo gotamo bhikkhavo ca.

dn24:2.21.3 Samaṇo gotamo evamāha—

dn24:2.21.4 yasmiṁ samaye subhaṁ vimokkhaṁ upasampajja viharati, sabbaṁ tasmiṁ samaye asubhantveva pajānātī’ti.

dn24:2.21.5 Na kho panāhaṁ, bhaggava, evaṁ vadāmi:

dn24:2.21.6 ‘yasmiṁ samaye subhaṁ vimokkhaṁ upasampajja viharati, sabbaṁ tasmiṁ samaye asubhantveva pajānātī’ti.

dn24:2.21.7 Evañca khvāhaṁ, bhaggava, vadāmi:

dn24:2.21.8 ‘yasmiṁ samaye subhaṁ vimokkhaṁ upasampajja viharati, subhantveva tasmiṁ samaye pajānātī’”ti.

dn24:2.21.9 “Te ca, bhante, viparītā, ye bhagavantaṁ viparītato dahanti bhikkhavo ca.

dn24:2.21.10 Evaṁpasanno ahaṁ, bhante, bhagavati. Pahoti me bhagavā tathā dhammaṁ desetuṁ, yathā ahaṁ subhaṁ vimokkhaṁ upasampajja vihareyyan”ti.

dn24:2.21.11 “Dukkaraṁ kho etaṁ, bhaggava, tayā aññadiṭṭhikena aññakhantikena aññarucikena aññatrāyogena aññatrācariyakena subhaṁ vimokkhaṁ upasampajja viharituṁ.

dn24:2.21.12 Iṅgha tvaṁ, bhaggava, yo ca te ayaṁ mayi pasādo, tameva tvaṁ sādhukamanurakkhā”ti.

dn24:2.21.13 “Sace taṁ, bhante, mayā dukkaraṁ aññadiṭṭhikena aññakhantikena aññarucikena aññatrāyogena aññatrācariyakena subhaṁ vimokkhaṁ upasampajja viharituṁ.

dn24:2.21.14 Yo ca me ayaṁ, bhante, bhagavati pasādo, tamevāhaṁ sādhukamanurakkhissāmī”ti.

dn24:2.21.15 Idamavoca bhagavā.

dn24:2.21.16 Attamano bhaggavagotto paribbājako bhagavato bhāsitaṁ abhinandīti.

dn24:2.21.17 Pāthikasuttaṁ niṭṭhitaṁ paṭhamaṁ.