dn23:23.0 2.11. Dvesatthavāhaupamā
BAGIAN 23
dn23:23.1 “Tena hi, rājañña, upamaṁ te karissāmi.
dn23:23.2 Upamāya m’idhekacce viññū purisā bhāsitassa atthaṁ ājānanti.
dn23:23.3 Bhūtapubbaṁ, rājañña, mahāsakaṭasattho sakaṭasahassaṁ puratthimā janapadā pacchimaṁ janapadaṁ agamāsi.
dn23:23.4 So yena yena gacchi, khippaṁyeva pariyādiyati tiṇakaṭṭhodakaṁ haritakapaṇṇaṁ.
dn23:23.5 Tasmiṁ kho pana satthe dve satthavāhā ahesuṁ eko pañcannaṁ sakaṭasatānaṁ, eko pañcannaṁ sakaṭasatānaṁ.
dn23:23.6 Atha kho tesaṁ satthavāhānaṁ etadahosi:
dn23:23.7 ‘ayaṁ kho mahāsakaṭasattho sakaṭasahassaṁ;
dn23:23.8 te mayaṁ yena yena gacchāma, khippameva pariyādiyati tiṇakaṭṭhodakaṁ haritakapaṇṇaṁ.
dn23:23.9 Yannūna mayaṁ imaṁ satthaṁ dvidhā vibhajeyyāma—
dn23:23.10 ekato pañca sakaṭasatāni ekato pañca sakaṭasatānī’ti.
dn23:23.11 Te taṁ satthaṁ dvidhā vibhajiṁsu ekato pañca sakaṭasatāni, ekato pañca sakaṭasatāni.
dn23:23.12 Eko satthavāho bahuṁ tiṇañca kaṭṭhañca udakañca āropetvā satthaṁ payāpesi.
dn23:23.13 Dvīhatīhapayāto kho pana so sattho addasa purisaṁ kāḷaṁ lohitakkhaṁ sannaddhakalāpaṁ kumudamāliṁ allavatthaṁ allakesaṁ kaddamamakkhitehi cakkehi bhadrena rathena paṭipathaṁ āgacchantaṁ, disvā etadavoca:
dn23:23.14 ‘kuto, bho, āgacchasī’ti?
dn23:23.15 ‘Amukamhā janapadā’ti.
dn23:23.16 ‘Kuhiṁ gamissasī’ti?
dn23:23.17 ‘Amukaṁ nāma janapadan’ti.
dn23:23.18 ‘Kacci, bho, purato kantāre mahāmegho abhippavuṭṭho’ti?
dn23:23.19 ‘Evaṁ, bho, purato kantāre mahāmegho abhippavuṭṭho, āsittodakāni vaṭumāni, bahu tiṇañca kaṭṭhañca udakañca.
dn23:23.20 Chaḍḍetha, bho, purāṇāni tiṇāni kaṭṭhāni udakāni, lahubhārehi sakaṭehi sīghaṁ sīghaṁ gacchatha, mā yoggāni kilamitthā’ti.
dn23:23.21 Atha kho so satthavāho satthike āmantesi:
dn23:23.22 ‘ayaṁ, bho, puriso evamāha:
dn23:23.23 “purato kantāre mahāmegho abhippavuṭṭho, āsittodakāni vaṭumāni, bahu tiṇañca kaṭṭhañca udakañca.
dn23:23.24 Chaḍḍetha, bho, purāṇāni tiṇāni kaṭṭhāni udakāni, lahubhārehi sakaṭehi sīghaṁ sīghaṁ gacchatha, mā yoggāni kilamitthā”ti.
dn23:23.25 Chaḍḍetha, bho, purāṇāni tiṇāni kaṭṭhāni udakāni, lahubhārehi sakaṭehi satthaṁ payāpethā’ti.
dn23:23.26 ‘Evaṁ, bho’ti kho te satthikā tassa satthavāhassa paṭissutvā chaḍḍetvā purāṇāni tiṇāni kaṭṭhāni udakāni lahubhārehi sakaṭehi satthaṁ payāpesuṁ.
dn23:23.27 Te paṭhamepi satthavāse na addasaṁsu tiṇaṁ vā kaṭṭhaṁ vā udakaṁ vā.
dn23:23.28 Dutiyepi satthavāse …
dn23:23.29 tatiyepi satthavāse …
dn23:23.30 catutthepi satthavāse …
dn23:23.31 pañcamepi satthavāse …
dn23:23.32 chaṭṭhepi satthavāse …
dn23:23.33 sattamepi satthavāse na addasaṁsu tiṇaṁ vā kaṭṭhaṁ vā udakaṁ vā.
dn23:23.34 Sabbeva anayabyasanaṁ āpajjiṁsu.
dn23:23.35 Ye ca tasmiṁ satthe ahesuṁ manussā vā pasū vā, sabbe so yakkho amanusso bhakkhesi.
dn23:23.36 Aṭṭhikāneva sesāni.
dn23:23.37 Yadā aññāsi dutiyo satthavāho:
dn23:23.38 ‘bahunikkhanto kho, bho, dāni so sattho’ti bahuṁ tiṇañca kaṭṭhañca udakañca āropetvā satthaṁ payāpesi.
dn23:23.39 Dvīhatīhapayāto kho pana so sattho addasa purisaṁ kāḷaṁ lohitakkhaṁ sannaddhakalāpaṁ kumudamāliṁ allavatthaṁ allakesaṁ kaddamamakkhitehi cakkehi bhadrena rathena paṭipathaṁ āgacchantaṁ, disvā etadavoca:
dn23:23.40 ‘kuto, bho, āgacchasī’ti?
dn23:23.41 ‘Amukamhā janapadā’ti.
dn23:23.42 ‘Kuhiṁ gamissasī’ti?
dn23:23.43 ‘Amukaṁ nāma janapadan’ti.
dn23:23.44 ‘Kacci, bho, purato kantāre mahāmegho abhippavuṭṭho’ti?
dn23:23.45 ‘Evaṁ, bho, purato kantāre mahāmegho abhippavuṭṭho. Āsittodakāni vaṭumāni, bahu tiṇañca kaṭṭhañca udakañca.
dn23:23.46 Chaḍḍetha, bho, purāṇāni tiṇāni kaṭṭhāni udakāni, lahubhārehi sakaṭehi sīghaṁ sīghaṁ gacchatha, mā yoggāni kilamitthā’ti.
dn23:23.47 Atha kho so satthavāho satthike āmantesi:
dn23:23.48 ‘ayaṁ, bho, puriso evamāha:
dn23:23.49 “purato kantāre mahāmegho abhippavuṭṭho, āsittodakāni vaṭumāni, bahu tiṇañca kaṭṭhañca udakañca.
dn23:23.50 Chaḍḍetha, bho, purāṇāni tiṇāni kaṭṭhāni udakāni, lahubhārehi sakaṭehi sīghaṁ sīghaṁ gacchatha; mā yoggāni kilamitthā”ti.
dn23:23.51 Ayaṁ bho puriso neva amhākaṁ mitto, na ñātisālohito, kathaṁ mayaṁ imassa saddhāya gamissāma.
dn23:23.52 Na vo chaḍḍetabbāni purāṇāni tiṇāni kaṭṭhāni udakāni, yathābhatena bhaṇḍena satthaṁ payāpetha.
dn23:23.53 Na no purāṇaṁ chaḍḍessāmā’ti.
dn23:23.54 ‘Evaṁ, bho’ti kho te satthikā tassa satthavāhassa paṭissutvā yathābhatena bhaṇḍena satthaṁ payāpesuṁ.
dn23:23.55 Te paṭhamepi satthavāse na addasaṁsu tiṇaṁ vā kaṭṭhaṁ vā udakaṁ vā.
dn23:23.56 Dutiyepi satthavāse …
dn23:23.57 tatiyepi satthavāse …
dn23:23.58 catutthepi satthavāse …
dn23:23.59 pañcamepi satthavāse …
dn23:23.60 chaṭṭhepi satthavāse …
dn23:23.61 sattamepi satthavāse na addasaṁsu tiṇaṁ vā kaṭṭhaṁ vā udakaṁ vā.
dn23:23.62 Tañca satthaṁ addasaṁsu anayabyasanaṁ āpannaṁ.
dn23:23.63 Ye ca tasmiṁ satthepi ahesuṁ manussā vā pasū vā, tesañca aṭṭhikāneva addasaṁsu tena yakkhena amanussena bhakkhitānaṁ.
dn23:23.64 Atha kho so satthavāho satthike āmantesi:
dn23:23.65 ‘ayaṁ kho, bho, sattho anayabyasanaṁ āpanno, yathā taṁ tena bālena satthavāhena pariṇāyakena.
dn23:23.66 Tena hi, bho, yānamhākaṁ satthe appasārāni paṇiyāni, tāni chaḍḍetvā, yāni imasmiṁ satthe mahāsārāni paṇiyāni, tāni ādiyathā’ti.
dn23:23.67 ‘Evaṁ, bho’ti kho te satthikā tassa satthavāhassa paṭissutvā yāni sakasmiṁ satthe appasārāni paṇiyāni, tāni chaḍḍetvā yāni tasmiṁ satthe mahāsārāni paṇiyāni, tāni ādiyitvā sotthinā taṁ kantāraṁ nitthariṁsu, yathā taṁ paṇḍitena satthavāhena pariṇāyakena.
dn23:23.68 Evameva kho tvaṁ, rājañña, bālo abyatto anayabyasanaṁ āpajjissasi ayoniso paralokaṁ gavesanto, seyyathāpi so purimo satthavāho.
dn23:23.69 Yepi tava sotabbaṁ saddhātabbaṁ maññissanti, tepi anayabyasanaṁ āpajjissanti, seyyathāpi te satthikā.
dn23:23.70 Paṭinissajjetaṁ, rājañña, pāpakaṁ diṭṭhigataṁ; paṭinissajjetaṁ, rājañña, pāpakaṁ diṭṭhigataṁ.
dn23:23.71 Mā te ahosi dīgharattaṁ ahitāya dukkhāyā”ti.