dn23:21.0 2.10. Aggikajaṭilaupamā
BAGIAN 21
dn23:21.1 “Tena hi, rājañña, upamaṁ te karissāmi.
dn23:21.2 Upamāya m’idhekacce viññū purisā bhāsitassa atthaṁ ājānanti.
dn23:21.3 Bhūtapubbaṁ, rājañña, aññataro aggiko jaṭilo araññāyatane paṇṇakuṭiyā sammati.
dn23:21.4 Atha kho, rājañña, aññataro janapade sattho vuṭṭhāsi.
dn23:21.5 Atha kho so sattho tassa aggikassa jaṭilassa assamassa sāmantā ekarattiṁ vasitvā pakkāmi.
dn23:21.6 Atha kho, rājañña, tassa aggikassa jaṭilassa etadahosi:
dn23:21.7 ‘yannūnāhaṁ yena so satthavāso tenupasaṅkameyyaṁ, appeva nāmettha kiñci upakaraṇaṁ adhigaccheyyan’ti.
dn23:21.8 Atha kho so aggiko jaṭilo kālasseva vuṭṭhāya yena so satthavāso tenupasaṅkami; upasaṅkamitvā addasa tasmiṁ satthavāse daharaṁ kumāraṁ mandaṁ uttānaseyyakaṁ chaḍḍitaṁ.
dn23:21.9 Disvānassa etadahosi:
dn23:21.10 ‘na kho me taṁ patirūpaṁ yaṁ me pekkhamānassa manussabhūto kālaṅkareyya;
dn23:21.11 yannūnāhaṁ imaṁ dārakaṁ assamaṁ netvā āpādeyyaṁ poseyyaṁ vaḍḍheyyan’ti.
dn23:21.12 Atha kho so aggiko jaṭilo taṁ dārakaṁ assamaṁ netvā āpādesi posesi vaḍḍhesi.
dn23:21.13 Yadā so dārako dasavassuddesiko vā hoti dvādasavassuddesiko vā, atha kho tassa aggikassa jaṭilassa janapade kañcideva karaṇīyaṁ uppajji.
dn23:21.14 Atha kho so aggiko jaṭilo taṁ dārakaṁ etadavoca:
dn23:21.15 ‘icchāmahaṁ, tāta, janapadaṁ gantuṁ;
dn23:21.16 aggiṁ, tāta, paricareyyāsi.
dn23:21.17 Mā ca te aggi nibbāyi.
dn23:21.18 Sace ca te aggi nibbāyeyya, ayaṁ vāsī imāni kaṭṭhāni idaṁ araṇisahitaṁ, aggiṁ nibbattetvā aggiṁ paricareyyāsī’ti.
dn23:21.19 Atha kho so aggiko jaṭilo taṁ dārakaṁ evaṁ anusāsitvā janapadaṁ agamāsi.
dn23:21.20 Tassa khiḍḍāpasutassa aggi nibbāyi.
dn23:21.21 Atha kho tassa dārakassa etadahosi:
dn23:21.22 ‘pitā kho maṁ evaṁ avaca:
dn23:21.23 “aggiṁ, tāta, paricareyyāsi.
dn23:21.24 Mā ca te aggi nibbāyi.
dn23:21.25 Sace ca te aggi nibbāyeyya, ayaṁ vāsī imāni kaṭṭhāni idaṁ araṇisahitaṁ, aggiṁ nibbattetvā aggiṁ paricareyyāsī”ti.
dn23:21.26 Yannūnāhaṁ aggiṁ nibbattetvā aggiṁ paricareyyan’ti.
dn23:21.27 Atha kho so dārako araṇisahitaṁ vāsiyā tacchi:
dn23:21.28 ‘appeva nāma aggiṁ adhigaccheyyan’ti.
dn23:21.29 Neva so aggiṁ adhigacchi.
dn23:21.30 Araṇisahitaṁ dvidhā phālesi, tidhā phālesi, catudhā phālesi, pañcadhā phālesi, dasadhā phālesi, satadhā phālesi, sakalikaṁ sakalikaṁ akāsi, sakalikaṁ sakalikaṁ karitvā udukkhale koṭṭesi, udukkhale koṭṭetvā mahāvāte opuni:
dn23:21.31 ‘appeva nāma aggiṁ adhigaccheyyan’ti.
dn23:21.32 Neva so aggiṁ adhigacchi.
dn23:21.33 Atha kho so aggiko jaṭilo janapade taṁ karaṇīyaṁ tīretvā yena sako assamo tenupasaṅkami; upasaṅkamitvā taṁ dārakaṁ etadavoca:
dn23:21.34 ‘kacci te, tāta, aggi na nibbuto’ti?
dn23:21.35 ‘Idha me, tāta, khiḍḍāpasutassa aggi nibbāyi.
dn23:21.36 Tassa me etadahosi:
dn23:21.37 “pitā kho maṁ evaṁ avaca aggiṁ, tāta, paricareyyāsi.
dn23:21.38 Mā ca te, tāta, aggi nibbāyi.
dn23:21.39 Sace ca te aggi nibbāyeyya, ayaṁ vāsī imāni kaṭṭhāni idaṁ araṇisahitaṁ, aggiṁ nibbattetvā aggiṁ paricareyyāsīti.
dn23:21.40 Yannūnāhaṁ aggiṁ nibbattetvā aggiṁ paricareyyan”ti.
dn23:21.41 Atha khvāhaṁ, tāta, araṇisahitaṁ vāsiyā tacchiṁ:
dn23:21.42 “appeva nāma aggiṁ adhigaccheyyan”ti.
dn23:21.43 Nevāhaṁ aggiṁ adhigacchiṁ.
dn23:21.44 Araṇisahitaṁ dvidhā phālesiṁ, tidhā phālesiṁ, catudhā phālesiṁ, pañcadhā phālesiṁ, dasadhā phālesiṁ, satadhā phālesiṁ, sakalikaṁ sakalikaṁ akāsiṁ, sakalikaṁ sakalikaṁ karitvā udukkhale koṭṭesiṁ, udukkhale koṭṭetvā mahāvāte opuniṁ:
dn23:21.45 “appeva nāma aggiṁ adhigaccheyyan”ti.
dn23:21.46 Nevāhaṁ aggiṁ adhigacchin’ti.
dn23:21.47 Atha kho tassa aggikassa jaṭilassa etadahosi:
dn23:21.48 ‘yāva bālo ayaṁ dārako abyatto, kathañhi nāma ayoniso aggiṁ gavesissatī’ti.
dn23:21.49 Tassa pekkhamānassa araṇisahitaṁ gahetvā aggiṁ nibbattetvā taṁ dārakaṁ etadavoca:
dn23:21.50 ‘evaṁ kho, tāta, aggi nibbattetabbo.
dn23:21.51 Na tveva yathā tvaṁ bālo abyatto ayoniso aggiṁ gavesī’ti.
dn23:21.52 Evameva kho tvaṁ, rājañña, bālo abyatto ayoniso paralokaṁ gavesissasi.
dn23:21.53 Paṭinissajjetaṁ, rājañña, pāpakaṁ diṭṭhigataṁ; paṭinissajjetaṁ, rājañña, pāpakaṁ diṭṭhigataṁ.
dn23:21.54 Mā te ahosi dīgharattaṁ ahitāya dukkhāyā”ti.