dn23:13.0 2.6. Gabbhinīupamā
BAGIAN 13
dn23:13.1 “Tena hi, rājañña, upamaṁ te karissāmi.
dn23:13.2 Upamāya m’idhekacce viññū purisā bhāsitassa atthaṁ ājānanti.
dn23:13.3 Bhūtapubbaṁ, rājañña, aññatarassa brāhmaṇassa dve pajāpatiyo ahesuṁ.
dn23:13.4 Ekissā putto ahosi dasavassuddesiko vā dvādasavassuddesiko vā, ekā gabbhinī upavijaññā.
dn23:13.5 Atha kho so brāhmaṇo kālamakāsi.
dn23:13.6 Atha kho so māṇavako mātusapattiṁ etadavoca:
dn23:13.7 ‘yamidaṁ, bhoti, dhanaṁ vā dhaññaṁ vā rajataṁ vā jātarūpaṁ vā, sabbaṁ taṁ mayhaṁ;
dn23:13.8 natthi tuyhettha kiñci.
dn23:13.9 Pitu me, bhoti, dāyajjaṁ niyyādehī’ti.
dn23:13.10 Evaṁ vutte, sā brāhmaṇī taṁ māṇavakaṁ etadavoca:
dn23:13.11 ‘āgamehi tāva, tāta, yāva vijāyāmi.
dn23:13.12 Sace kumārako bhavissati, tassapi ekadeso bhavissati;
dn23:13.13 sace kumārikā bhavissati, sāpi te opabhoggā bhavissatī’ti.
dn23:13.14 Dutiyampi kho so māṇavako mātusapattiṁ etadavoca:
dn23:13.15 ‘yamidaṁ, bhoti, dhanaṁ vā dhaññaṁ vā rajataṁ vā jātarūpaṁ vā, sabbaṁ taṁ mayhaṁ;
dn23:13.16 natthi tuyhettha kiñci.
dn23:13.17 Pitu me, bhoti, dāyajjaṁ niyyādehī’ti.
dn23:13.18 Dutiyampi kho sā brāhmaṇī taṁ māṇavakaṁ etadavoca:
dn23:13.19 ‘āgamehi tāva, tāta, yāva vijāyāmi.
dn23:13.20 Sace kumārako bhavissati, tassapi ekadeso bhavissati;
dn23:13.21 sace kumārikā bhavissati sāpi te opabhoggā bhavissatī’ti.
dn23:13.22 Tatiyampi kho so māṇavako mātusapattiṁ etadavoca:
dn23:13.23 ‘yamidaṁ, bhoti, dhanaṁ vā dhaññaṁ vā rajataṁ vā jātarūpaṁ vā, sabbaṁ taṁ mayhaṁ;
dn23:13.24 natthi tuyhettha kiñci.
dn23:13.25 Pitu me, bhoti, dāyajjaṁ niyyādehī’ti.
dn23:13.26 Atha kho sā brāhmaṇī satthaṁ gahetvā ovarakaṁ pavisitvā udaraṁ opādesi:
dn23:13.27 ‘yāva vijāyāmi yadi vā kumārako yadi vā kumārikā’ti.
dn23:13.28 Sā attānañceva jīvitañca gabbhañca sāpateyyañca vināsesi.
dn23:13.29 Yathā taṁ bālā abyattā anayabyasanaṁ āpannā ayoniso dāyajjaṁ gavesantī, evameva kho tvaṁ, rājañña, bālo abyatto anayabyasanaṁ āpajjissasi ayoniso paralokaṁ gavesanto;
dn23:13.30 seyyathāpi sā brāhmaṇī bālā abyattā anayabyasanaṁ āpannā ayoniso dāyajjaṁ gavesantī.
dn23:13.31 Na kho, rājañña, samaṇabrāhmaṇā sīlavanto kalyāṇadhammā apakkaṁ paripācenti;
dn23:13.32 api ca paripākaṁ āgamenti.
dn23:13.33 Paṇḍitānaṁ attho hi, rājañña, samaṇabrāhmaṇānaṁ sīlavantānaṁ kalyāṇadhammānaṁ jīvitena.
dn23:13.34 Yathā yathā kho, rājañña, samaṇabrāhmaṇā sīlavanto kalyāṇadhammā ciraṁ dīghamaddhānaṁ tiṭṭhanti tathā tathā bahuṁ puññaṁ pasavanti, bahujanahitāya ca paṭipajjanti bahujanasukhāya lokānukampāya atthāya hitāya sukhāya devamanussānaṁ.
dn23:13.35 Imināpi kho te, rājañña, pariyāyena evaṁ hotu:
dn23:13.36 ‘itipi atthi paro loko, atthi sattā opapātikā, atthi sukatadukkaṭānaṁ kammānaṁ phalaṁ vipāko’”ti.