dn23:11.0 2.4. Tāvatiṁsadevaupamā
BAGIAN 11
dn23:11.1 “Tena hi, rājañña, taññevettha paṭipucchissāmi; yathā te khameyya, tathā naṁ byākareyyāsi.
dn23:11.2 Yaṁ kho pana, rājañña, mānussakaṁ vassasataṁ, devānaṁ tāvatiṁsānaṁ eso eko rattindivo, tāya rattiyā tiṁsarattiyo māso, tena māsena dvādasamāsiyo saṁvaccharo, tena saṁvaccharena dibbaṁ vassasahassaṁ devānaṁ tāvatiṁsānaṁ āyuppamāṇaṁ.
dn23:11.3 Ye te mittāmaccā ñātisālohitā pāṇātipātā paṭiviratā adinnādānā paṭiviratā kāmesumicchācārā paṭiviratā musāvādā paṭiviratā surāmerayamajjapamādaṭṭhānā paṭiviratā, te kāyassa bhedā paraṁ maraṇā sugatiṁ saggaṁ lokaṁ upapannā devānaṁ tāvatiṁsānaṁ sahabyataṁ.
dn23:11.4 Sace pana tesaṁ evaṁ bhavissati:
dn23:11.5 ‘yāva mayaṁ dve vā tīṇi vā rattindivā dibbehi pañcahi kāmaguṇehi samappitā samaṅgībhūtā paricārema, atha mayaṁ pāyāsissa rājaññassa gantvā āroceyyāma:
dn23:11.6 “itipi atthi paro loko, atthi sattā opapātikā, atthi sukatadukkaṭānaṁ kammānaṁ phalaṁ vipāko”ti.
dn23:11.7 Api nu te āgantvā āroceyyuṁ—
dn23:11.8 itipi atthi paro loko, atthi sattā opapātikā, atthi sukatadukkaṭānaṁ kammānaṁ phalaṁ vipāko’”ti?
dn23:11.9 “No hidaṁ, bho kassapa.
dn23:11.10 Api hi mayaṁ, bho kassapa, ciraṁ kālaṅkatāpi bhaveyyāma.
dn23:11.11 Ko panetaṁ bhoto kassapassa āroceti:
dn23:11.12 ‘atthi devā tāvatiṁsā’ti vā ‘evaṁdīghāyukā devā tāvatiṁsā’ti vā.
dn23:11.13 Na mayaṁ bhoto kassapassa saddahāma:
dn23:11.14 ‘atthi devā tāvatiṁsā’ti vā ‘evaṁdīghāyukā devā tāvatiṁsā’ti vā”ti.
dn23:11.15.0 2.5. Jaccandhaupamā
dn23:11.16 “Seyyathāpi, rājañña, jaccandho puriso na passeyya kaṇha—sukkāni rūpāni, na passeyya nīlakāni rūpāni, na passeyya pītakāni rūpāni, na passeyya lohitakāni rūpāni, na passeyya mañjiṭṭhakāni rūpāni, na passeyya samavisamaṁ, na passeyya tārakāni rūpāni, na passeyya candimasūriye.
dn23:11.17 So evaṁ vadeyya:
dn23:11.18 ‘natthi kaṇhasukkāni rūpāni, natthi kaṇhasukkānaṁ rūpānaṁ dassāvī.
dn23:11.19 Natthi nīlakāni rūpāni, natthi nīlakānaṁ rūpānaṁ dassāvī.
dn23:11.20 Natthi pītakāni rūpāni, natthi pītakānaṁ rūpānaṁ dassāvī.
dn23:11.21 Natthi lohitakāni rūpāni, natthi lohitakānaṁ rūpānaṁ dassāvī.
dn23:11.22 Natthi mañjiṭṭhakāni rūpāni, natthi mañjiṭṭhakānaṁ rūpānaṁ dassāvī.
dn23:11.23 Natthi samavisamaṁ, natthi samavisamassa dassāvī.
dn23:11.24 Natthi tārakāni rūpāni, natthi tārakānaṁ rūpānaṁ dassāvī.
dn23:11.25 Natthi candimasūriyā, natthi candimasūriyānaṁ dassāvī.
dn23:11.26 Ahametaṁ na jānāmi, ahametaṁ na passāmi, tasmā taṁ natthī’ti.
dn23:11.27 Sammā nu kho so, rājañña, vadamāno vadeyyā”ti?
dn23:11.28 “No hidaṁ, bho kassapa.
dn23:11.29 Atthi kaṇhasukkāni rūpāni, atthi kaṇhasukkānaṁ rūpānaṁ dassāvī.
dn23:11.30 Atthi nīlakāni rūpāni, atthi nīlakānaṁ rūpānaṁ dassāvī …pe…
dn23:11.31 atthi samavisamaṁ, atthi samavisamassa dassāvī.
dn23:11.32 Atthi tārakāni rūpāni, atthi tārakānaṁ rūpānaṁ dassāvī.
dn23:11.33 Atthi candimasūriyā, atthi candimasūriyānaṁ dassāvī.
dn23:11.34 ‘Ahametaṁ na jānāmi, ahametaṁ na passāmi, tasmā taṁ natthī’ti.
dn23:11.35 Na hi so, bho kassapa, sammā vadamāno vadeyyā”ti.
dn23:11.36 “Evameva kho tvaṁ, rājañña, jaccandhūpamo maññe paṭibhāsi yaṁ maṁ tvaṁ evaṁ vadesi.
dn23:11.37 Ko panetaṁ bhoto kassapassa āroceti:
dn23:11.38 ‘atthi devā tāvatiṁsā’ti vā, ‘evaṁdīghāyukā devā tāvatiṁsā’ti vā?
dn23:11.39 Na mayaṁ bhoto kassapassa saddahāma:
dn23:11.40 ‘atthi devā tāvatiṁsā’ti vā ‘evaṁdīghāyukā devā tāvatiṁsā’ti vā”ti.
dn23:11.41 “Na kho, rājañña, evaṁ paro loko daṭṭhabbo, yathā tvaṁ maññasi iminā maṁsacakkhunā.
dn23:11.42 Ye kho te, rājañña, samaṇabrāhmaṇā araññavanapatthāni pantāni senāsanāni paṭisevanti, te tattha appamattā ātāpino pahitattā viharantā dibbacakkhuṁ visodhenti.
dn23:11.43 Te dibbena cakkhunā visuddhena atikkantamānusakena imañceva lokaṁ passanti parañca satte ca opapātike.
dn23:11.44 Evañca kho, rājañña, paro loko daṭṭhabbo;
dn23:11.45 na tveva yathā tvaṁ maññasi iminā maṁsacakkhunā.
dn23:11.46 Imināpi kho te, rājañña, pariyāyena evaṁ hotu:
dn23:11.47 ‘itipi atthi paro loko, atthi sattā opapātikā, atthi sukatadukkaṭānaṁ kammānaṁ phalaṁ vipāko’”ti.