Sakkapañhasutta

dn21:2.1.1 Katāvakāso sakko devānamindo bhagavatā imaṁ bhagavantaṁ paṭhamaṁ pañhaṁ apucchi:

dn21:2.1.2 “Kiṁsaṁyojanā nu kho, mārisa, devā manussā asurā nāgā gandhabbā ye caññe santi puthukāyā, te:

dn21:2.1.3 ‘averā adaṇḍā asapattā abyāpajjā viharemu averino’ti iti ca nesaṁ hoti, atha ca pana saverā sadaṇḍā sasapattā sabyāpajjā viharanti saverino”ti?

dn21:2.1.4 Itthaṁ sakko devānamindo bhagavantaṁ pañhaṁ apucchi.

dn21:2.1.5 Tassa bhagavā pañhaṁ puṭṭho byākāsi:

dn21:2.1.6 “Issāmacchariyasaṁyojanā kho, devānaminda, devā manussā asurā nāgā gandhabbā ye caññe santi puthukāyā, te:

dn21:2.1.7 ‘averā adaṇḍā asapattā abyāpajjā viharemu averino’ti iti ca nesaṁ hoti, atha ca pana saverā sadaṇḍā sasapattā sabyāpajjā viharanti saverino”ti.

dn21:2.1.8 Itthaṁ bhagavā sakkassa devānamindassa pañhaṁ puṭṭho byākāsi.

dn21:2.1.9 Attamano sakko devānamindo bhagavato bhāsitaṁ abhinandi anumodi:

dn21:2.1.10 “evametaṁ, bhagavā, evametaṁ, sugata.

dn21:2.1.11 Tiṇṇā mettha kaṅkhā vigatā kathaṅkathā bhagavato pañhaveyyākaraṇaṁ sutvā”ti.

dn21:2.2.1 Itiha sakko devānamindo bhagavato bhāsitaṁ abhinanditvā anumoditvā bhagavantaṁ uttari pañhaṁ apucchi:

dn21:2.2.2 “Issāmacchariyaṁ pana, mārisa, kiṁnidānaṁ kiṁsamudayaṁ kiṁjātikaṁ kiṁpabhavaṁ;

dn21:2.2.3 kismiṁ sati issāmacchariyaṁ hoti;

dn21:2.2.4 kismiṁ asati issāmacchariyaṁ na hotī”ti?

dn21:2.2.5 “Issāmacchariyaṁ kho, devānaminda, piyāppiyanidānaṁ piyāppiyasamudayaṁ piyāppiyajātikaṁ piyāppiyapabhavaṁ;

dn21:2.2.6 piyāppiye sati issāmacchariyaṁ hoti,

dn21:2.2.7 piyāppiye asati issāmacchariyaṁ na hotī”ti.

dn21:2.2.8 “Piyāppiyaṁ pana, mārisa, kiṁnidānaṁ kiṁsamudayaṁ kiṁjātikaṁ kiṁpabhavaṁ;

dn21:2.2.9 kismiṁ sati piyāppiyaṁ hoti;

dn21:2.2.10 kismiṁ asati piyāppiyaṁ na hotī”ti?

dn21:2.2.11 “Piyāppiyaṁ kho, devānaminda, chandanidānaṁ chandasamudayaṁ chandajātikaṁ chandapabhavaṁ;

dn21:2.2.12 chande sati piyāppiyaṁ hoti;

dn21:2.2.13 chande asati piyāppiyaṁ na hotī”ti.

dn21:2.2.14 “Chando pana, mārisa, kiṁnidāno kiṁsamudayo kiṁjātiko kiṁpabhavo;

dn21:2.2.15 kismiṁ sati chando hoti;

dn21:2.2.16 kismiṁ asati chando na hotī”ti?

dn21:2.2.17 “Chando kho, devānaminda, vitakkanidāno vitakkasamudayo vitakkajātiko vitakkapabhavo;

dn21:2.2.18 vitakke sati chando hoti;

dn21:2.2.19 vitakke asati chando na hotī”ti.

dn21:2.2.20 “Vitakko pana, mārisa, kiṁnidāno kiṁsamudayo kiṁjātiko kiṁpabhavo;

dn21:2.2.21 kismiṁ sati vitakko hoti;

dn21:2.2.22 kismiṁ asati vitakko na hotī”ti?

dn21:2.2.23 “Vitakko kho, devānaminda, papañcasaññāsaṅkhānidāno papañcasaññāsaṅkhāsamudayo papañcasaññāsaṅkhājātiko papañcasaññāsaṅkhāpabhavo;

dn21:2.2.24 papañcasaññāsaṅkhāya sati vitakko hoti;

dn21:2.2.25 papañcasaññāsaṅkhāya asati vitakko na hotī”ti.

dn21:2.3.1 “Kathaṁ paṭipanno pana, mārisa, bhikkhu papañcasaññāsaṅkhānirodhasāruppagāminiṁ paṭipadaṁ paṭipanno hotī”ti?

dn21:2.3.2.0 2.2. Vedanākammaṭṭhāna

dn21:2.3.3 “Somanassampāhaṁ, devānaminda, duvidhena vadāmi—

dn21:2.3.4 sevitabbampi, asevitabbampi.

dn21:2.3.5 Domanassampāhaṁ, devānaminda, duvidhena vadāmi—

dn21:2.3.6 sevitabbampi, asevitabbampi.

dn21:2.3.7 Upekkhampāhaṁ, devānaminda, duvidhena vadāmi—

dn21:2.3.8 sevitabbampi, asevitabbampi.

dn21:2.3.9 Somanassampāhaṁ, devānaminda, duvidhena vadāmi sevitabbampi, asevitabbampīti iti kho panetaṁ vuttaṁ, kiñcetaṁ paṭicca vuttaṁ?

dn21:2.3.10 Tattha yaṁ jaññā somanassaṁ

dn21:2.3.11 ‘imaṁ kho me somanassaṁ sevato akusalā dhammā abhivaḍḍhanti, kusalā dhammā parihāyantī’ti, evarūpaṁ somanassaṁ na sevitabbaṁ.

dn21:2.3.12 Tattha yaṁ jaññā somanassaṁ

dn21:2.3.13 ‘imaṁ kho me somanassaṁ sevato akusalā dhammā parihāyanti, kusalā dhammā abhivaḍḍhantī’ti, evarūpaṁ somanassaṁ sevitabbaṁ.

dn21:2.3.14 Tattha yañce savitakkaṁ savicāraṁ, yañce avitakkaṁ avicāraṁ, ye avitakke avicāre, te paṇītatare.

dn21:2.3.15 Somanassampāhaṁ, devānaminda, duvidhena vadāmi sevitabbampi, asevitabbampīti.

dn21:2.3.16 Iti yaṁ taṁ vuttaṁ, idametaṁ paṭicca vuttaṁ.

dn21:2.3.17 Domanassampāhaṁ, devānaminda, duvidhena vadāmi sevitabbampi, asevitabbampīti iti kho panetaṁ vuttaṁ, kiñcetaṁ paṭicca vuttaṁ?

dn21:2.3.18 Tattha yaṁ jaññā domanassaṁ

dn21:2.3.19 ‘imaṁ kho me domanassaṁ sevato akusalā dhammā abhivaḍḍhanti, kusalā dhammā parihāyantī’ti, evarūpaṁ domanassaṁ na sevitabbaṁ.

dn21:2.3.20 Tattha yaṁ jaññā domanassaṁ

dn21:2.3.21 ‘imaṁ kho me domanassaṁ sevato akusalā dhammā parihāyanti, kusalā dhammā abhivaḍḍhantī’ti, evarūpaṁ domanassaṁ sevitabbaṁ.

dn21:2.3.22 Tattha yañce savitakkaṁ savicāraṁ, yañce avitakkaṁ avicāraṁ, ye avitakke avicāre, te paṇītatare.

dn21:2.3.23 Domanassampāhaṁ, devānaminda, duvidhena vadāmi sevitabbampi, asevitabbampīti

dn21:2.3.24 iti yaṁ taṁ vuttaṁ, idametaṁ paṭicca vuttaṁ.

dn21:2.3.25 Upekkhampāhaṁ, devānaminda, duvidhena vadāmi sevitabbampi, asevitabbampīti iti kho panetaṁ vuttaṁ, kiñcetaṁ paṭicca vuttaṁ?

dn21:2.3.26 Tattha yaṁ jaññā upekkhaṁ

dn21:2.3.27 ‘imaṁ kho me upekkhaṁ sevato akusalā dhammā abhivaḍḍhanti, kusalā dhammā parihāyantī’ti, evarūpā upekkhā na sevitabbā.

dn21:2.3.28 Tattha yaṁ jaññā upekkhaṁ

dn21:2.3.29 ‘imaṁ kho me upekkhaṁ sevato akusalā dhammā parihāyanti, kusalā dhammā abhivaḍḍhantī’ti, evarūpā upekkhā sevitabbā.

dn21:2.3.30 Tattha yañce savitakkaṁ savicāraṁ, yañce avitakkaṁ avicāraṁ, ye avitakke avicāre, te paṇītatare.

dn21:2.3.31 Upekkhampāhaṁ, devānaminda, duvidhena vadāmi sevitabbampi, asevitabbampīti

dn21:2.3.32 iti yaṁ taṁ vuttaṁ, idametaṁ paṭicca vuttaṁ.

dn21:2.3.33 Evaṁ paṭipanno kho, devānaminda, bhikkhu papañcasaññāsaṅkhānirodhasāruppagāminiṁ paṭipadaṁ paṭipanno hotī”ti.

dn21:2.3.34 Itthaṁ bhagavā sakkassa devānamindassa pañhaṁ puṭṭho byākāsi.

dn21:2.3.35 Attamano sakko devānamindo bhagavato bhāsitaṁ abhinandi anumodi:

dn21:2.3.36 “evametaṁ, bhagavā, evametaṁ, sugata.

dn21:2.3.37 Tiṇṇā mettha kaṅkhā vigatā kathaṅkathā bhagavato pañhaveyyākaraṇaṁ sutvā”ti.

dn21:2.4.0 2.3. Pātimokkhasaṁvara

dn21:2.4.1 Itiha sakko devānamindo bhagavato bhāsitaṁ abhinanditvā anumoditvā bhagavantaṁ uttari pañhaṁ apucchi:

dn21:2.4.2 “Kathaṁ paṭipanno pana, mārisa, bhikkhu pātimokkhasaṁvarāya paṭipanno hotī”ti?

dn21:2.4.3 “Kāyasamācārampāhaṁ, devānaminda, duvidhena vadāmi—

dn21:2.4.4 sevitabbampi, asevitabbampi.

dn21:2.4.5 Vacīsamācārampāhaṁ, devānaminda, duvidhena vadāmi—

dn21:2.4.6 sevitabbampi, asevitabbampi.

dn21:2.4.7 Pariyesanaṁpāhaṁ, devānaminda, duvidhena vadāmi—

dn21:2.4.8 sevitabbampi, asevitabbampi.

dn21:2.4.9 Kāyasamācārampāhaṁ, devānaminda, duvidhena vadāmi sevitabbampi asevitabbampīti iti kho panetaṁ vuttaṁ, kiñcetaṁ paṭicca vuttaṁ?

dn21:2.4.10 Tattha yaṁ jaññā kāyasamācāraṁ

dn21:2.4.11 ‘imaṁ kho me kāyasamācāraṁ sevato akusalā dhammā abhivaḍḍhanti, kusalā dhammā parihāyantī’ti, evarūpo kāyasamācāro na sevitabbo.

dn21:2.4.12 Tattha yaṁ jaññā kāyasamācāraṁ

dn21:2.4.13 ‘imaṁ kho me kāyasamācāraṁ sevato akusalā dhammā parihāyanti, kusalā dhammā abhivaḍḍhantī’ti, evarūpo kāyasamācāro sevitabbo.

dn21:2.4.14 Kāyasamācārampāhaṁ, devānaminda, duvidhena vadāmi—

dn21:2.4.15 sevitabbampi, asevitabbampīti

dn21:2.4.16 iti yaṁ taṁ vuttaṁ, idametaṁ paṭicca vuttaṁ.

dn21:2.4.17 Vacīsamācārampāhaṁ, devānaminda, duvidhena vadāmi—

dn21:2.4.18 sevitabbampi, asevitabbampīti iti kho panetaṁ vuttaṁ, kiñcetaṁ paṭicca vuttaṁ?

dn21:2.4.19 Tattha yaṁ jaññā vacīsamācāraṁ ‘imaṁ kho me vacīsamācāraṁ sevato akusalā dhammā abhivaḍḍhanti, kusalā dhammā parihāyantī’ti, evarūpo vacīsamācāro na sevitabbo.

dn21:2.4.20 Tattha yaṁ jaññā vacīsamācāraṁ ‘imaṁ kho me vacīsamācāraṁ sevato akusalā dhammā parihāyanti, kusalā dhammā abhivaḍḍhantī’ti, evarūpo vacīsamācāro sevitabbo.

dn21:2.4.21 Vacīsamācārampāhaṁ, devānaminda, duvidhena vadāmi—

dn21:2.4.22 sevitabbampi, asevitabbampīti

dn21:2.4.23 iti yaṁ taṁ vuttaṁ, idametaṁ paṭicca vuttaṁ.

dn21:2.4.24 Pariyesanaṁpāhaṁ, devānaminda, duvidhena vadāmi—

dn21:2.4.25 sevitabbampi, asevitabbampīti iti kho panetaṁ vuttaṁ, kiñcetaṁ paṭicca vuttaṁ?

dn21:2.4.26 Tattha yaṁ jaññā pariyesanaṁ ‘imaṁ kho me pariyesanaṁ sevato akusalā dhammā abhivaḍḍhanti, kusalā dhammā parihāyantī’ti, evarūpā pariyesanā na sevitabbā.

dn21:2.4.27 Tattha yaṁ jaññā pariyesanaṁ ‘imaṁ kho me pariyesanaṁ sevato akusalā dhammā parihāyanti, kusalā dhammā abhivaḍḍhantī’ti, evarūpā pariyesanā sevitabbā.

dn21:2.4.28 Pariyesanaṁpāhaṁ, devānaminda, duvidhena vadāmi—

dn21:2.4.29 sevitabbampi, asevitabbampīti

dn21:2.4.30 iti yaṁ taṁ vuttaṁ, idametaṁ paṭicca vuttaṁ.

dn21:2.4.31 Evaṁ paṭipanno kho, devānaminda, bhikkhu pātimokkhasaṁvarāya paṭipanno hotī”ti.

dn21:2.4.32 Itthaṁ bhagavā sakkassa devānamindassa pañhaṁ puṭṭho byākāsi.

dn21:2.4.33 Attamano sakko devānamindo bhagavato bhāsitaṁ abhinandi anumodi:

dn21:2.4.34 “evametaṁ, bhagavā, evametaṁ, sugata.

dn21:2.4.35 Tiṇṇā mettha kaṅkhā vigatā kathaṅkathā bhagavato pañhaveyyākaraṇaṁ sutvā”ti.

dn21:2.5.0 2.4. Indriyasaṁvara

dn21:2.5.1 Itiha sakko devānamindo bhagavato bhāsitaṁ abhinanditvā anumoditvā bhagavantaṁ uttari pañhaṁ apucchi:

dn21:2.5.2 “Kathaṁ paṭipanno pana, mārisa, bhikkhu indriyasaṁvarāya paṭipanno hotī”ti?

dn21:2.5.3 “Cakkhuviññeyyaṁ rūpampāhaṁ, devānaminda, duvidhena vadāmi—

dn21:2.5.4 sevitabbampi, asevitabbampi.

dn21:2.5.5 Sotaviññeyyaṁ saddampāhaṁ, devānaminda, duvidhena vadāmi—

dn21:2.5.6 sevitabbampi, asevitabbampi.

dn21:2.5.7 Ghānaviññeyyaṁ gandhampāhaṁ, devānaminda, duvidhena vadāmi—

dn21:2.5.8 sevitabbampi, asevitabbampi.

dn21:2.5.9 Jivhāviññeyyaṁ rasampāhaṁ, devānaminda, duvidhena vadāmi—

dn21:2.5.10 sevitabbampi, asevitabbampi.

dn21:2.5.11 Kāyaviññeyyaṁ phoṭṭhabbampāhaṁ, devānaminda, duvidhena vadāmi—

dn21:2.5.12 sevitabbampi, asevitabbampi.

dn21:2.5.13 Manoviññeyyaṁ dhammampāhaṁ, devānaminda, duvidhena vadāmi—

dn21:2.5.14 sevitabbampi, asevitabbampī”ti.

dn21:2.5.15 Evaṁ vutte, sakko devānamindo bhagavantaṁ etadavoca:

dn21:2.5.16 “Imassa kho ahaṁ, bhante, bhagavatā saṅkhittena bhāsitassa evaṁ vitthārena atthaṁ ājānāmi.

dn21:2.5.17 Yathārūpaṁ, bhante, cakkhuviññeyyaṁ rūpaṁ sevato akusalā dhammā abhivaḍḍhanti, kusalā dhammā parihāyanti, evarūpaṁ cakkhuviññeyyaṁ rūpaṁ na sevitabbaṁ.

dn21:2.5.18 Yathārūpañca kho, bhante, cakkhuviññeyyaṁ rūpaṁ sevato akusalā dhammā parihāyanti, kusalā dhammā abhivaḍḍhanti, evarūpaṁ cakkhuviññeyyaṁ rūpaṁ sevitabbaṁ.

dn21:2.5.19 Yathārūpañca kho, bhante, sotaviññeyyaṁ saddaṁ sevato …pe…

dn21:2.5.20 ghānaviññeyyaṁ gandhaṁ sevato …

dn21:2.5.21 jivhāviññeyyaṁ rasaṁ sevato …

dn21:2.5.22 kāyaviññeyyaṁ phoṭṭhabbaṁ sevato …

dn21:2.5.23 manoviññeyyaṁ dhammaṁ sevato akusalā dhammā abhivaḍḍhanti, kusalā dhammā parihāyanti, evarūpo manoviññeyyo dhammo na sevitabbo.

dn21:2.5.24 Yathārūpañca kho, bhante, manoviññeyyaṁ dhammaṁ sevato akusalā dhammā parihāyanti, kusalā dhammā abhivaḍḍhanti, evarūpo manoviññeyyo dhammo sevitabbo.

dn21:2.5.25 Imassa kho me, bhante, bhagavatā saṅkhittena bhāsitassa evaṁ vitthārena atthaṁ ājānato

dn21:2.5.26 tiṇṇā mettha kaṅkhā vigatā kathaṅkathā bhagavato pañhaveyyākaraṇaṁ sutvā”ti.

dn21:2.6.1 Itiha sakko devānamindo bhagavato bhāsitaṁ abhinanditvā anumoditvā bhagavantaṁ uttari pañhaṁ apucchi:

dn21:2.6.2 “Sabbeva nu kho, mārisa, samaṇabrāhmaṇā ekantavādā ekantasīlā ekantachandā ekantaajjhosānā”ti?

dn21:2.6.3 “Na kho, devānaminda, sabbe samaṇabrāhmaṇā ekantavādā ekantasīlā ekantachandā ekantaajjhosānā”ti.

dn21:2.6.4 “Kasmā pana, mārisa, na sabbe samaṇabrāhmaṇā ekantavādā ekantasīlā ekantachandā ekantaajjhosānā”ti?

dn21:2.6.5 “Anekadhātu nānādhātu kho, devānaminda, loko.

dn21:2.6.6 Tasmiṁ anekadhātunānādhātusmiṁ loke yaṁ yadeva sattā dhātuṁ abhinivisanti, taṁ tadeva thāmasā parāmāsā abhinivissa voharanti:

dn21:2.6.7 ‘idameva saccaṁ moghamaññan’ti.

dn21:2.6.8 Tasmā na sabbe samaṇabrāhmaṇā ekantavādā ekantasīlā ekantachandā ekantaajjhosānā”ti.

dn21:2.6.9 “Sabbeva nu kho, mārisa, samaṇabrāhmaṇā accantaniṭṭhā accantayogakkhemī accantabrahmacārī accantapariyosānā”ti?

dn21:2.6.10 “Na kho, devānaminda, sabbe samaṇabrāhmaṇā accantaniṭṭhā accantayogakkhemī accantabrahmacārī accantapariyosānā”ti.

dn21:2.6.11 “Kasmā pana, mārisa, na sabbe samaṇabrāhmaṇā accantaniṭṭhā accantayogakkhemī accantabrahmacārī accantapariyosānā”ti?

dn21:2.6.12 “Ye kho, devānaminda, bhikkhū taṇhāsaṅkhayavimuttā te accantaniṭṭhā accantayogakkhemī accantabrahmacārī accantapariyosānā.

dn21:2.6.13 Tasmā na sabbe samaṇabrāhmaṇā accantaniṭṭhā accantayogakkhemī accantabrahmacārī accantapariyosānā”ti.

dn21:2.6.14 Itthaṁ bhagavā sakkassa devānamindassa pañhaṁ puṭṭho byākāsi.

dn21:2.6.15 Attamano sakko devānamindo bhagavato bhāsitaṁ abhinandi anumodi:

dn21:2.6.16 “evametaṁ, bhagavā, evametaṁ, sugata.

dn21:2.6.17 Tiṇṇā mettha kaṅkhā vigatā kathaṅkathā bhagavato pañhaveyyākaraṇaṁ sutvā”ti.

dn21:2.6.18 Itiha sakko devānamindo bhagavato bhāsitaṁ abhinanditvā anumoditvā bhagavantaṁ etadavoca:

dn21:2.7.1 “Ejā, bhante, rogo, ejā gaṇḍo, ejā sallaṁ, ejā imaṁ purisaṁ parikaḍḍhati tassa tasseva bhavassa abhinibbattiyā.

dn21:2.7.2 Tasmā ayaṁ puriso uccāvacamāpajjati.

dn21:2.7.3 Yesāhaṁ, bhante, pañhānaṁ ito bahiddhā aññesu samaṇabrāhmaṇesu okāsakammampi nālatthaṁ, te me bhagavatā byākatā.

dn21:2.7.4 Dīgharattānusayitañca pana me vicikicchākathaṅkathāsallaṁ, tañca bhagavatā abbuḷhan”ti.

dn21:2.7.5 “Abhijānāsi no tvaṁ, devānaminda, ime pañhe aññe samaṇabrāhmaṇe pucchitā”ti?

dn21:2.7.6 “Abhijānāmahaṁ, bhante, ime pañhe aññe samaṇabrāhmaṇe pucchitā”ti.

dn21:2.7.7 “Yathā kathaṁ pana te, devānaminda, byākaṁsu? Sace te agaru bhāsassū”ti.

dn21:2.7.8 “Na kho me, bhante, garu yatthassa bhagavā nisinno bhagavantarūpo vā”ti.

dn21:2.7.9 “Tena hi, devānaminda, bhāsassū”ti.

dn21:2.7.10 “Yesvāhaṁ, bhante, maññāmi samaṇabrāhmaṇā āraññikā pantasenāsanāti, tyāhaṁ upasaṅkamitvā ime pañhe pucchāmi, te mayā puṭṭhā na sampāyanti, asampāyantā mamaṁyeva paṭipucchanti:

dn21:2.7.11 ‘ko nāmo āyasmā’ti?

dn21:2.7.12 Tesāhaṁ puṭṭho byākaromi:

dn21:2.7.13 ‘ahaṁ kho, mārisa, sakko devānamindo’ti.

dn21:2.7.14 Te mamaṁyeva uttari paṭipucchanti:

dn21:2.7.15 ‘kiṁ panāyasmā, devānaminda, kammaṁ katvā imaṁ ṭhānaṁ patto’ti?

dn21:2.7.16 Tesāhaṁ yathāsutaṁ yathāpariyattaṁ dhammaṁ desemi.

dn21:2.7.17 Te tāvatakeneva attamanā honti:

dn21:2.7.18 ‘sakko ca no devānamindo diṭṭho, yañca no apucchimhā, tañca no byākāsī’ti.

dn21:2.7.19 Te aññadatthu mamaṁyeva sāvakā sampajjanti, na cāhaṁ tesaṁ.

dn21:2.7.20 Ahaṁ kho pana, bhante, bhagavato sāvako sotāpanno avinipātadhammo niyato sambodhiparāyaṇo”ti.

dn21:2.7.21.0 2.5. Somanassapaṭilābhakathā

dn21:2.7.22 “Abhijānāsi no tvaṁ, devānaminda, ito pubbe evarūpaṁ vedapaṭilābhaṁ somanassapaṭilābhan”ti?

dn21:2.7.23 “Abhijānāmahaṁ, bhante, ito pubbe evarūpaṁ vedapaṭilābhaṁ somanassapaṭilābhan”ti.

dn21:2.7.24 “Yathā kathaṁ pana tvaṁ, devānaminda, abhijānāsi ito pubbe evarūpaṁ vedapaṭilābhaṁ somanassapaṭilābhan”ti?

dn21:2.7.25 “Bhūtapubbaṁ, bhante, devāsurasaṅgāmo samupabyūḷho ahosi.

dn21:2.7.26 Tasmiṁ kho pana, bhante, saṅgāme devā jiniṁsu, asurā parājayiṁsu.

dn21:2.7.27 Tassa mayhaṁ, bhante, taṁ saṅgāmaṁ abhivijinitvā vijitasaṅgāmassa etadahosi:

dn21:2.7.28 ‘yā ceva dāni dibbā ojā yā ca asurā ojā, ubhayametaṁ devā paribhuñjissantī’ti.

dn21:2.7.29 So kho pana me, bhante, vedapaṭilābho somanassapaṭilābho sadaṇḍāvacaro sasatthāvacaro na nibbidāya na virāgāya na nirodhāya na upasamāya na abhiññāya na sambodhāya na nibbānāya saṁvattati.

dn21:2.7.30 Yo kho pana me ayaṁ, bhante, bhagavato dhammaṁ sutvā vedapaṭilābho somanassapaṭilābho, so adaṇḍāvacaro asatthāvacaro ekantanibbidāya virāgāya nirodhāya upasamāya abhiññāya sambodhāya nibbānāya saṁvattatī”ti.

dn21:2.8.1 “Kiṁ pana tvaṁ, devānaminda, atthavasaṁ sampassamāno evarūpaṁ vedapaṭilābhaṁ somanassapaṭilābhaṁ pavedesī”ti?

dn21:2.8.2 “Cha kho ahaṁ, bhante, atthavase sampassamāno evarūpaṁ vedapaṭilābhaṁ somanassapaṭilābhaṁ pavedemi.

dn21:2.8.3 Idheva tiṭṭhamānassa,

dn21:2.8.4 devabhūtassa me sato;

dn21:2.8.5 Punarāyu ca me laddho,

dn21:2.8.6 evaṁ jānāhi mārisa.

dn21:2.8.7 Imaṁ kho ahaṁ, bhante, paṭhamaṁ atthavasaṁ sampassamāno evarūpaṁ vedapaṭilābhaṁ somanassapaṭilābhaṁ pavedemi.

dn21:2.8.8 Cutāhaṁ diviyā kāyā,

dn21:2.8.9 āyuṁ hitvā amānusaṁ;

dn21:2.8.10 Amūḷho gabbhamessāmi,

dn21:2.8.11 yattha me ramatī mano.

dn21:2.8.12 Imaṁ kho ahaṁ, bhante, dutiyaṁ atthavasaṁ sampassamāno evarūpaṁ vedapaṭilābhaṁ somanassapaṭilābhaṁ pavedemi.

dn21:2.8.13 Svāhaṁ amūḷhapaññassa,

dn21:2.8.14 viharaṁ sāsane rato;

dn21:2.8.15 Ñāyena viharissāmi,

dn21:2.8.16 sampajāno paṭissato.

dn21:2.8.17 Imaṁ kho ahaṁ, bhante, tatiyaṁ atthavasaṁ sampassamāno evarūpaṁ vedapaṭilābhaṁ somanassapaṭilābhaṁ pavedemi.

dn21:2.8.18 Ñāyena me carato ca,

dn21:2.8.19 sambodhi ce bhavissati;

dn21:2.8.20 Aññātā viharissāmi,

dn21:2.8.21 sveva anto bhavissati.

dn21:2.8.22 Imaṁ kho ahaṁ, bhante, catutthaṁ atthavasaṁ sampassamāno evarūpaṁ vedapaṭilābhaṁ somanassapaṭilābhaṁ pavedemi.

dn21:2.8.23 Cutāhaṁ mānusā kāyā,

dn21:2.8.24 āyuṁ hitvāna mānusaṁ;

dn21:2.8.25 Puna devo bhavissāmi,

dn21:2.8.26 devalokamhi uttamo.

dn21:2.8.27 Imaṁ kho ahaṁ, bhante, pañcamaṁ atthavasaṁ sampassamāno evarūpaṁ vedapaṭilābhaṁ somanassapaṭilābhaṁ pavedemi.

dn21:2.8.28 Te paṇītatarā devā,

dn21:2.8.29 akaniṭṭhā yasassino;

dn21:2.8.30 Antime vattamānamhi,

dn21:2.8.31 so nivāso bhavissati.

dn21:2.8.32 Imaṁ kho ahaṁ, bhante, chaṭṭhaṁ atthavasaṁ sampassamāno evarūpaṁ vedapaṭilābhaṁ somanassapaṭilābhaṁ pavedemi.

dn21:2.8.33 Ime kho ahaṁ, bhante, cha atthavase sampassamāno evarūpaṁ vedapaṭilābhaṁ somanassapaṭilābhaṁ pavedemi.

dn21:2.9.1 Apariyositasaṅkappo,

dn21:2.9.2 vicikiccho kathaṅkathī;

dn21:2.9.3 Vicariṁ dīghamaddhānaṁ,

dn21:2.9.4 anvesanto tathāgataṁ.

dn21:2.9.5 Yassu maññāmi samaṇe,

dn21:2.9.6 pavivittavihārino;

dn21:2.9.7 Sambuddhā iti maññāno,

dn21:2.9.8 gacchāmi te upāsituṁ.

dn21:2.9.9 ‘Kathaṁ ārādhanā hoti,

dn21:2.9.10 kathaṁ hoti virādhanā’;

dn21:2.9.11 Iti puṭṭhā na sampāyanti,

dn21:2.9.12 magge paṭipadāsu ca.

dn21:2.9.13 Tyassu yadā maṁ jānanti,

dn21:2.9.14 sakko devānamāgato;

dn21:2.9.15 Tyassu mameva pucchanti,

dn21:2.9.16 ‘kiṁ katvā pāpuṇī idaṁ’.

dn21:2.9.17 Tesaṁ yathāsutaṁ dhammaṁ,

dn21:2.9.18 desayāmi jane sutaṁ;

dn21:2.9.19 Tena attamanā honti,

dn21:2.9.20 ‘diṭṭho no vāsavoti ca’.

dn21:2.9.21 Yadā ca buddhamaddakkhiṁ,

dn21:2.9.22 vicikicchāvitāraṇaṁ;

dn21:2.9.23 Somhi vītabhayo ajja,

dn21:2.9.24 sambuddhaṁ payirupāsiya.

dn21:2.9.25 Taṇhāsallassa hantāraṁ,

dn21:2.9.26 buddhaṁ appaṭipuggalaṁ;

dn21:2.9.27 Ahaṁ vande mahāvīraṁ,

dn21:2.9.28 buddhamādiccabandhunaṁ.

dn21:2.9.29 Yaṁ karomasi brahmuno,

dn21:2.9.30 samaṁ devehi mārisa;

dn21:2.9.31 Tadajja tuyhaṁ kassāma,

dn21:2.9.32 handa sāmaṁ karoma te.

dn21:2.9.33 Tvameva asi sambuddho,

dn21:2.9.34 tuvaṁ satthā anuttaro;

dn21:2.9.35 Sadevakasmiṁ lokasmiṁ,

dn21:2.9.36 natthi te paṭipuggalo”ti.

dn21:2.10.1 Atha kho sakko devānamindo pañcasikhaṁ gandhabbaputtaṁ āmantesi:

dn21:2.10.2 “bahūpakāro kho mesi tvaṁ, tāta pañcasikha, yaṁ tvaṁ bhagavantaṁ paṭhamaṁ pasādesi.

dn21:2.10.3 Tayā, tāta, paṭhamaṁ pasāditaṁ pacchā mayaṁ taṁ bhagavantaṁ dassanāya upasaṅkamimhā arahantaṁ sammāsambuddhaṁ.

dn21:2.10.4 Pettike vā ṭhāne ṭhapayissāmi, gandhabbarājā bhavissasi, bhaddañca te sūriyavacchasaṁ dammi, sā hi te abhipatthitā”ti.

dn21:2.10.5 Atha kho sakko devānamindo pāṇinā pathaviṁ parāmasitvā tikkhattuṁ udānaṁ udānesi:

dn21:2.10.6 “Namo tassa bhagavato arahato sammāsambuddhassa.

dn21:2.10.7 Namo tassa bhagavato arahato sammāsambuddhassa.

dn21:2.10.8 Namo tassa bhagavato arahato sammāsambuddhassā”ti.

dn21:2.10.9 Imasmiñca pana veyyākaraṇasmiṁ bhaññamāne sakkassa devānamindassa virajaṁ vītamalaṁ dhammacakkhuṁ udapādi:

dn21:2.10.10 “yaṁ kiñci samudayadhammaṁ sabbaṁ taṁ nirodhadhamman”ti.

dn21:2.10.11 Aññesañca asītiyā devatāsahassānaṁ;

dn21:2.10.12 iti ye sakkena devānamindena ajjhiṭṭhapañhā puṭṭhā, te bhagavatā byākatā.

dn21:2.10.13 Tasmā imassa veyyākaraṇassa sakkapañhātveva adhivacananti.

dn21:2.10.14 Sakkapañhasuttaṁ niṭṭhitaṁ aṭṭhamaṁ.