dn1:2.1.0 3.1.2. Ekaccasassatavāda
BAGIAN 2
dn1:2.1.1 Santi, bhikkhave, eke samaṇabrāhmaṇā ekaccasassatikā ekaccaasassatikā ekaccaṁ sassataṁ ekaccaṁ asassataṁ attānañca lokañca paññapenti catūhi vatthūhi.
dn1:2.1.2 Te ca bhonto samaṇabrāhmaṇā kimāgamma kimārabbha ekaccasassatikā ekaccaasassatikā ekaccaṁ sassataṁ ekaccaṁ asassataṁ attānañca lokañca paññapenti catūhi vatthūhi?
dn1:2.2.1 Hoti kho so, bhikkhave, samayo, yaṁ kadāci karahaci dīghassa addhuno accayena ayaṁ loko saṁvaṭṭati.
dn1:2.2.2 Saṁvaṭṭamāne loke yebhuyyena sattā ābhassarasaṁvattanikā honti.
dn1:2.2.3 Te tattha honti manomayā pītibhakkhā sayaṁpabhā antalikkhacarā subhaṭṭhāyino, ciraṁ dīghamaddhānaṁ tiṭṭhanti.
dn1:2.3.1 Hoti kho so, bhikkhave, samayo, yaṁ kadāci karahaci dīghassa addhuno accayena ayaṁ loko vivaṭṭati.
dn1:2.3.2 Vivaṭṭamāne loke suññaṁ brahmavimānaṁ pātubhavati.
dn1:2.3.3 Atha kho aññataro satto āyukkhayā vā puññakkhayā vā ābhassarakāyā cavitvā suññaṁ brahmavimānaṁ upapajjati.
dn1:2.3.4 So tattha hoti manomayo pītibhakkho sayampabho antalikkhacaro subhaṭṭhāyī, ciraṁ dīghamaddhānaṁ tiṭṭhati.
dn1:2.4.1 Tassa tattha ekakassa dīgharattaṁ nivusitattā anabhirati paritassanā uppajjati:
dn1:2.4.2 ‘aho vata aññepi sattā itthattaṁ āgaccheyyun’ti.
dn1:2.4.3 Atha aññepi sattā āyukkhayā vā puññakkhayā vā ābhassarakāyā cavitvā brahmavimānaṁ upapajjanti tassa sattassa sahabyataṁ.
dn1:2.4.4 Tepi tattha honti manomayā pītibhakkhā sayaṁpabhā antalikkhacarā subhaṭṭhāyino, ciraṁ dīghamaddhānaṁ tiṭṭhanti.
dn1:2.5.1 Tatra, bhikkhave, yo so satto paṭhamaṁ upapanno tassa evaṁ hoti:
dn1:2.5.2 ‘ahamasmi brahmā mahābrahmā abhibhū anabhibhūto aññadatthudaso vasavattī issaro kattā nimmātā seṭṭho sajitā vasī pitā bhūtabhabyānaṁ.
dn1:2.5.3 Mayā ime sattā nimmitā.
dn1:2.5.4 Taṁ kissa hetu?
dn1:2.5.5 Mamañhi pubbe etadahosi:
dn1:2.5.6 “aho vata aññepi sattā itthattaṁ āgaccheyyun”ti.
dn1:2.5.7 Iti mama ca manopaṇidhi, ime ca sattā itthattaṁ āgatā’ti.
dn1:2.5.8 Yepi te sattā pacchā upapannā, tesampi evaṁ hoti:
dn1:2.5.9 ‘ayaṁ kho bhavaṁ brahmā mahābrahmā abhibhū anabhibhūto aññadatthudaso vasavattī issaro kattā nimmātā seṭṭho sajitā vasī pitā bhūtabhabyānaṁ.
dn1:2.5.10 Iminā mayaṁ bhotā brahmunā nimmitā.
dn1:2.5.11 Taṁ kissa hetu?
dn1:2.5.12 Imañhi mayaṁ addasāma idha paṭhamaṁ upapannaṁ, mayaṁ panamha pacchā upapannā’ti.
dn1:2.6.1 Tatra, bhikkhave, yo so satto paṭhamaṁ upapanno, so dīghāyukataro ca hoti vaṇṇavantataro ca mahesakkhataro ca.
dn1:2.6.2 Ye pana te sattā pacchā upapannā, te appāyukatarā ca honti dubbaṇṇatarā ca appesakkhatarā ca.
dn1:2.6.3 Ṭhānaṁ kho panetaṁ, bhikkhave, vijjati, yaṁ aññataro satto tamhā kāyā cavitvā itthattaṁ āgacchati.
dn1:2.6.4 Itthattaṁ āgato samāno agārasmā anagāriyaṁ pabbajati.
dn1:2.6.5 Agārasmā anagāriyaṁ pabbajito samāno ātappamanvāya padhānamanvāya anuyogamanvāya appamādamanvāya sammāmanasikāramanvāya tathārūpaṁ cetosamādhiṁ phusati, yathāsamāhite citte taṁ pubbenivāsaṁ anussarati, tato paraṁ nānussarati.
dn1:2.6.6 So evamāha:
dn1:2.6.7 ‘yo kho so bhavaṁ brahmā mahābrahmā abhibhū anabhibhūto aññadatthudaso vasavattī issaro kattā nimmātā seṭṭho sajitā vasī pitā bhūtabhabyānaṁ, yena mayaṁ bhotā brahmunā nimmitā, so nicco dhuvo sassato avipariṇāmadhammo sassatisamaṁ tatheva ṭhassati.
dn1:2.6.8 Ye pana mayaṁ ahumhā tena bhotā brahmunā nimmitā, te mayaṁ aniccā addhuvā appāyukā cavanadhammā itthattaṁ āgatā’ti.
dn1:2.6.9 Idaṁ, bhikkhave, paṭhamaṁ ṭhānaṁ, yaṁ āgamma yaṁ ārabbha eke samaṇabrāhmaṇā ekaccasassatikā ekaccaasassatikā ekaccaṁ sassataṁ ekaccaṁ asassataṁ attānañca lokañca paññapenti.
dn1:2.7.1 Dutiye ca bhonto samaṇabrāhmaṇā kimāgamma kimārabbha ekaccasassatikā ekaccaasassatikā ekaccaṁ sassataṁ ekaccaṁ asassataṁ attānañca lokañca paññapenti?
dn1:2.7.2 Santi, bhikkhave, khiḍḍāpadosikā nāma devā, te ativelaṁ hassakhiḍḍāratidhammasamāpannā viharanti. Tesaṁ ativelaṁ hassakhiḍḍāratidhammasamāpannānaṁ viharataṁ sati sammussati. Satiyā sammosā te devā tamhā kāyā cavanti.
dn1:2.8.1 Ṭhānaṁ kho panetaṁ, bhikkhave, vijjati yaṁ aññataro satto tamhā kāyā cavitvā itthattaṁ āgacchati.
dn1:2.8.2 Itthattaṁ āgato samāno agārasmā anagāriyaṁ pabbajati.
dn1:2.8.3 Agārasmā anagāriyaṁ pabbajito samāno ātappamanvāya padhānamanvāya anuyogamanvāya appamādamanvāya sammāmanasikāramanvāya tathārūpaṁ cetosamādhiṁ phusati, yathāsamāhite citte taṁ pubbenivāsaṁ anussarati, tato paraṁ nānussarati.
dn1:2.9.1 So evamāha:
dn1:2.9.2 ‘ye kho te bhonto devā na khiḍḍāpadosikā, te na ativelaṁ hassakhiḍḍāratidhammasamāpannā viharanti. Tesaṁ na ativelaṁ hassakhiḍḍāratidhammasamāpannānaṁ viharataṁ sati na sammussati. Satiyā asammosā te devā tamhā kāyā na cavanti;
dn1:2.9.3 niccā dhuvā sassatā avipariṇāmadhammā sassatisamaṁ tatheva ṭhassanti.
dn1:2.9.4 Ye pana mayaṁ ahumhā khiḍḍāpadosikā, te mayaṁ ativelaṁ hassakhiḍḍāratidhammasamāpannā viharimhā. Tesaṁ no ativelaṁ hassakhiḍḍāratidhammasamāpannānaṁ viharataṁ sati sammussati. Satiyā sammosā evaṁ mayaṁ tamhā kāyā cutā
dn1:2.9.5 aniccā addhuvā appāyukā cavanadhammā itthattaṁ āgatā’ti.
dn1:2.9.6 Idaṁ, bhikkhave, dutiyaṁ ṭhānaṁ, yaṁ āgamma yaṁ ārabbha eke samaṇabrāhmaṇā ekaccasassatikā ekaccaasassatikā ekaccaṁ sassataṁ ekaccaṁ asassataṁ attānañca lokañca paññapenti.
dn1:2.10.1 Tatiye ca bhonto samaṇabrāhmaṇā kimāgamma kimārabbha ekaccasassatikā ekaccaasassatikā ekaccaṁ sassataṁ ekaccaṁ asassataṁ attānañca lokañca paññapenti?
dn1:2.10.2 Santi, bhikkhave, manopadosikā nāma devā, te ativelaṁ aññamaññaṁ upanijjhāyanti. Te ativelaṁ aññamaññaṁ upanijjhāyantā aññamaññamhi cittāni padūsenti. Te aññamaññaṁ paduṭṭhacittā kilantakāyā kilantacittā. Te devā tamhā kāyā cavanti.
dn1:2.11.1 Ṭhānaṁ kho panetaṁ, bhikkhave, vijjati yaṁ aññataro satto tamhā kāyā cavitvā itthattaṁ āgacchati.
dn1:2.11.2 Itthattaṁ āgato samāno agārasmā anagāriyaṁ pabbajati.
dn1:2.11.3 Agārasmā anagāriyaṁ pabbajito samāno ātappamanvāya padhānamanvāya anuyogamanvāya appamādamanvāya sammāmanasikāramanvāya tathārūpaṁ cetosamādhiṁ phusati, yathāsamāhite citte taṁ pubbenivāsaṁ anussarati, tato paraṁ nānussarati.
dn1:2.12.1 So evamāha:
dn1:2.12.2 ‘ye kho te bhonto devā na manopadosikā, te nātivelaṁ aññamaññaṁ upanijjhāyanti. Te nātivelaṁ aññamaññaṁ upanijjhāyantā aññamaññamhi cittāni nappadūsenti. Te aññamaññaṁ appaduṭṭhacittā akilantakāyā akilantacittā. Te devā tamhā kāyā na cavanti,
dn1:2.12.3 niccā dhuvā sassatā avipariṇāmadhammā sassatisamaṁ tatheva ṭhassanti.
dn1:2.12.4 Ye pana mayaṁ ahumhā manopadosikā, te mayaṁ ativelaṁ aññamaññaṁ upanijjhāyimhā. Te mayaṁ ativelaṁ aññamaññaṁ upanijjhāyantā aññamaññamhi cittāni padūsimhā, te mayaṁ aññamaññaṁ paduṭṭhacittā kilantakāyā kilantacittā. Evaṁ mayaṁ tamhā kāyā cutā
dn1:2.12.5 aniccā addhuvā appāyukā cavanadhammā itthattaṁ āgatā’ti.
dn1:2.12.6 Idaṁ, bhikkhave, tatiyaṁ ṭhānaṁ, yaṁ āgamma yaṁ ārabbha eke samaṇabrāhmaṇā ekaccasassatikā ekaccaasassatikā ekaccaṁ sassataṁ ekaccaṁ asassataṁ attānañca lokañca paññapenti.
dn1:2.13.1 Catutthe ca bhonto samaṇabrāhmaṇā kimāgamma kimārabbha ekaccasassatikā ekaccaasassatikā ekaccaṁ sassataṁ ekaccaṁ asassataṁ attānañca lokañca paññapenti?
dn1:2.13.2 Idha, bhikkhave, ekacco samaṇo vā brāhmaṇo vā takkī hoti vīmaṁsī. So takkapariyāhataṁ vīmaṁsānucaritaṁ sayampaṭibhānaṁ evamāha:
dn1:2.13.3 ‘yaṁ kho idaṁ vuccati cakkhuṁ itipi sotaṁ itipi ghānaṁ itipi jivhā itipi kāyo itipi, ayaṁ attā anicco addhuvo asassato vipariṇāmadhammo.
dn1:2.13.4 Yañca kho idaṁ vuccati cittanti vā manoti vā viññāṇanti vā ayaṁ attā nicco dhuvo sassato avipariṇāmadhammo sassatisamaṁ tatheva ṭhassatī’ti.
dn1:2.13.5 Idaṁ, bhikkhave, catutthaṁ ṭhānaṁ, yaṁ āgamma yaṁ ārabbha eke samaṇabrāhmaṇā ekaccasassatikā ekaccaasassatikā ekaccaṁ sassataṁ ekaccaṁ asassataṁ attānañca lokañca paññapenti.
dn1:2.14.1 Imehi kho te, bhikkhave, samaṇabrāhmaṇā ekaccasassatikā ekaccaasassatikā ekaccaṁ sassataṁ ekaccaṁ asassataṁ attānañca lokañca paññapenti catūhi vatthūhi.
dn1:2.14.2 Ye hi keci, bhikkhave, samaṇā vā brāhmaṇā vā ekaccasassatikā ekaccaasassatikā ekaccaṁ sassataṁ ekaccaṁ asassataṁ attānañca lokañca paññapenti, sabbe te imeheva catūhi vatthūhi, etesaṁ vā aññatarena; natthi ito bahiddhā.
dn1:2.15.1 Tayidaṁ, bhikkhave, tathāgato pajānāti:
dn1:2.15.2 ‘ime diṭṭhiṭṭhānā evaṅgahitā evaṁparāmaṭṭhā evaṅgatikā bhavanti evaṁabhisamparāyā’ti.
dn1:2.15.3 Tañca tathāgato pajānāti, tato ca uttaritaraṁ pajānāti, tañca pajānanaṁ na parāmasati, aparāmasato cassa paccattaññeva nibbuti viditā.
dn1:2.15.4 Vedanānaṁ samudayañca atthaṅgamañca assādañca ādīnavañca nissaraṇañca yathābhūtaṁ viditvā anupādāvimutto, bhikkhave, tathāgato.
dn1:2.15.5 Ime kho te, bhikkhave, dhammā gambhīrā duddasā duranubodhā santā paṇītā atakkāvacarā nipuṇā paṇḍitavedanīyā, ye tathāgato sayaṁ abhiññā sacchikatvā pavedeti, yehi tathāgatassa yathābhuccaṁ vaṇṇaṁ sammā vadamānā vadeyyuṁ.
dn1:2.16.0 3.1.3. Antānantavāda
dn1:2.16.1 Santi, bhikkhave, eke samaṇabrāhmaṇā antānantikā antānantaṁ lokassa paññapenti catūhi vatthūhi.
dn1:2.16.2 Te ca bhonto samaṇabrāhmaṇā kimāgamma kimārabbha antānantikā antānantaṁ lokassa paññapenti catūhi vatthūhi?
dn1:2.17.1 Idha, bhikkhave, ekacco samaṇo vā brāhmaṇo vā ātappamanvāya padhānamanvāya anuyogamanvāya appamādamanvāya sammāmanasikāramanvāya tathārūpaṁ cetosamādhiṁ phusati, yathāsamāhite citte antasaññī lokasmiṁ viharati.
dn1:2.17.2 So evamāha:
dn1:2.17.3 ‘antavā ayaṁ loko parivaṭumo.
dn1:2.17.4 Taṁ kissa hetu?
dn1:2.17.5 Ahañhi ātappamanvāya padhānamanvāya anuyogamanvāya appamādamanvāya sammāmanasikāramanvāya tathārūpaṁ cetosamādhiṁ phusāmi, yathāsamāhite citte antasaññī lokasmiṁ viharāmi.
dn1:2.17.6 Imināmahaṁ etaṁ jānāmi:
dn1:2.17.7 “yathā antavā ayaṁ loko parivaṭumo”’ti.
dn1:2.17.8 Idaṁ, bhikkhave, paṭhamaṁ ṭhānaṁ, yaṁ āgamma yaṁ ārabbha eke samaṇabrāhmaṇā antānantikā antānantaṁ lokassa paññapenti.
dn1:2.18.1 Dutiye ca bhonto samaṇabrāhmaṇā kimāgamma kimārabbha antānantikā antānantaṁ lokassa paññapenti?
dn1:2.18.2 Idha, bhikkhave, ekacco samaṇo vā brāhmaṇo vā ātappamanvāya padhānamanvāya anuyogamanvāya appamādamanvāya sammāmanasikāramanvāya tathārūpaṁ cetosamādhiṁ phusati, yathāsamāhite citte anantasaññī lokasmiṁ viharati.
dn1:2.18.3 So evamāha:
dn1:2.18.4 ‘ananto ayaṁ loko apariyanto.
dn1:2.18.5 Ye te samaṇabrāhmaṇā evamāhaṁsu:
dn1:2.18.6 “antavā ayaṁ loko parivaṭumo”ti, tesaṁ musā.
dn1:2.18.7 Ananto ayaṁ loko apariyanto.
dn1:2.18.8 Taṁ kissa hetu?
dn1:2.18.9 Ahañhi ātappamanvāya padhānamanvāya anuyogamanvāya appamādamanvāya sammāmanasikāramanvāya tathārūpaṁ cetosamādhiṁ phusāmi, yathāsamāhite citte anantasaññī lokasmiṁ viharāmi.
dn1:2.18.10 Imināmahaṁ etaṁ jānāmi:
dn1:2.18.11 “yathā ananto ayaṁ loko apariyanto”’ti.
dn1:2.18.12 Idaṁ, bhikkhave, dutiyaṁ ṭhānaṁ, yaṁ āgamma yaṁ ārabbha eke samaṇabrāhmaṇā antānantikā antānantaṁ lokassa paññapenti.
dn1:2.19.1 Tatiye ca bhonto samaṇabrāhmaṇā kimāgamma kimārabbha antānantikā antānantaṁ lokassa paññapenti?
dn1:2.19.2 Idha, bhikkhave, ekacco samaṇo vā brāhmaṇo vā ātappamanvāya padhānamanvāya anuyogamanvāya appamādamanvāya sammāmanasikāramanvāya tathārūpaṁ cetosamādhiṁ phusati, yathāsamāhite citte uddhamadho antasaññī lokasmiṁ viharati, tiriyaṁ anantasaññī.
dn1:2.19.3 So evamāha:
dn1:2.19.4 ‘antavā ca ayaṁ loko ananto ca.
dn1:2.19.5 Ye te samaṇabrāhmaṇā evamāhaṁsu:
dn1:2.19.6 “antavā ayaṁ loko parivaṭumo”ti, tesaṁ musā.
dn1:2.19.7 Yepi te samaṇabrāhmaṇā evamāhaṁsu:
dn1:2.19.8 “ananto ayaṁ loko apariyanto”ti, tesampi musā.
dn1:2.19.9 Antavā ca ayaṁ loko ananto ca.
dn1:2.19.10 Taṁ kissa hetu?
dn1:2.19.11 Ahañhi ātappamanvāya padhānamanvāya anuyogamanvāya appamādamanvāya sammāmanasikāramanvāya tathārūpaṁ cetosamādhiṁ phusāmi, yathāsamāhite citte uddhamadho antasaññī lokasmiṁ viharāmi, tiriyaṁ anantasaññī.
dn1:2.19.12 Imināmahaṁ etaṁ jānāmi:
dn1:2.19.13 “yathā antavā ca ayaṁ loko ananto cā”’ti.
dn1:2.19.14 Idaṁ, bhikkhave, tatiyaṁ ṭhānaṁ, yaṁ āgamma yaṁ ārabbha eke samaṇabrāhmaṇā antānantikā antānantaṁ lokassa paññapenti.
dn1:2.20.1 Catutthe ca bhonto samaṇabrāhmaṇā kimāgamma kimārabbha antānantikā antānantaṁ lokassa paññapenti?
dn1:2.20.2 Idha, bhikkhave, ekacco samaṇo vā brāhmaṇo vā takkī hoti vīmaṁsī. So takkapariyāhataṁ vīmaṁsānucaritaṁ sayampaṭibhānaṁ evamāha:
dn1:2.20.3 ‘nevāyaṁ loko antavā, na panānanto.
dn1:2.20.4 Ye te samaṇabrāhmaṇā evamāhaṁsu:
dn1:2.20.5 “antavā ayaṁ loko parivaṭumo”ti, tesaṁ musā.
dn1:2.20.6 Yepi te samaṇabrāhmaṇā evamāhaṁsu:
dn1:2.20.7 “ananto ayaṁ loko apariyanto”ti, tesampi musā.
dn1:2.20.8 Yepi te samaṇabrāhmaṇā evamāhaṁsu:
dn1:2.20.9 “antavā ca ayaṁ loko ananto cā”ti, tesampi musā.
dn1:2.20.10 Nevāyaṁ loko antavā, na panānanto’ti.
dn1:2.20.11 Idaṁ, bhikkhave, catutthaṁ ṭhānaṁ, yaṁ āgamma yaṁ ārabbha eke samaṇabrāhmaṇā antānantikā antānantaṁ lokassa paññapenti.
dn1:2.21.1 Imehi kho te, bhikkhave, samaṇabrāhmaṇā antānantikā antānantaṁ lokassa paññapenti catūhi vatthūhi.
dn1:2.21.2 Ye hi keci, bhikkhave, samaṇā vā brāhmaṇā vā antānantikā antānantaṁ lokassa paññapenti, sabbe te imeheva catūhi vatthūhi, etesaṁ vā aññatarena; natthi ito bahiddhā.
dn1:2.22.1 Tayidaṁ, bhikkhave, tathāgato pajānāti:
dn1:2.22.2 ‘ime diṭṭhiṭṭhānā evaṅgahitā evaṁparāmaṭṭhā evaṅgatikā bhavanti evaṁabhisamparāyā’ti.
dn1:2.22.3 Tañca tathāgato pajānāti, tato ca uttaritaraṁ pajānāti, tañca pajānanaṁ na parāmasati, aparāmasato cassa paccattaññeva nibbuti viditā.
dn1:2.22.4 Vedanānaṁ samudayañca atthaṅgamañca assādañca ādīnavañca nissaraṇañca yathābhūtaṁ viditvā anupādāvimutto, bhikkhave, tathāgato.
dn1:2.22.5 Ime kho te, bhikkhave, dhammā gambhīrā duddasā duranubodhā santā paṇītā atakkāvacarā nipuṇā paṇḍitavedanīyā, ye tathāgato sayaṁ abhiññā sacchikatvā pavedeti, yehi tathāgatassa yathābhuccaṁ vaṇṇaṁ sammā vadamānā vadeyyuṁ.
dn1:2.23.0 3.1.4. Amarāvikkhepavāda
dn1:2.23.1 Santi, bhikkhave, eke samaṇabrāhmaṇā amarāvikkhepikā, tattha tattha pañhaṁ puṭṭhā samānā vācāvikkhepaṁ āpajjanti amarāvikkhepaṁ catūhi vatthūhi.
dn1:2.23.2 Te ca bhonto samaṇabrāhmaṇā kimāgamma kimārabbha amarāvikkhepikā tattha tattha pañhaṁ puṭṭhā samānā vācāvikkhepaṁ āpajjanti amarāvikkhepaṁ catūhi vatthūhi?
dn1:2.24.1 Idha, bhikkhave, ekacco samaṇo vā brāhmaṇo vā ‘idaṁ kusalan’ti yathābhūtaṁ nappajānāti, ‘idaṁ akusalan’ti yathābhūtaṁ nappajānāti.
dn1:2.24.2 Tassa evaṁ hoti:
dn1:2.24.3 ‘ahaṁ kho “idaṁ kusalan”ti yathābhūtaṁ nappajānāmi, “idaṁ akusalan”ti yathābhūtaṁ nappajānāmi.
dn1:2.24.4 Ahañce kho pana “idaṁ kusalan”ti yathābhūtaṁ appajānanto, “idaṁ akusalan”ti yathābhūtaṁ appajānanto, “idaṁ kusalan”ti vā byākareyyaṁ, “idaṁ akusalan”ti vā byākareyyaṁ, taṁ mamassa musā.
dn1:2.24.5 Yaṁ mamassa musā, so mamassa vighāto.
dn1:2.24.6 Yo mamassa vighāto so mamassa antarāyo’ti.
dn1:2.24.7 Iti so musāvādabhayā musāvādaparijegucchā nevidaṁ kusalanti byākaroti, na panidaṁ akusalanti byākaroti, tattha tattha pañhaṁ puṭṭho samāno vācāvikkhepaṁ āpajjati amarāvikkhepaṁ:
dn1:2.24.8 ‘evantipi me no; tathātipi me no; aññathātipi me no; notipi me no; no notipi me no’ti.
dn1:2.24.9 Idaṁ, bhikkhave, paṭhamaṁ ṭhānaṁ, yaṁ āgamma yaṁ ārabbha eke samaṇabrāhmaṇā amarāvikkhepikā tattha tattha pañhaṁ puṭṭhā samānā vācāvikkhepaṁ āpajjanti amarāvikkhepaṁ.
dn1:2.25.1 Dutiye ca bhonto samaṇabrāhmaṇā kimāgamma kimārabbha amarāvikkhepikā tattha tattha pañhaṁ puṭṭhā samānā vācāvikkhepaṁ āpajjanti amarāvikkhepaṁ?
dn1:2.25.2 Idha, bhikkhave, ekacco samaṇo vā brāhmaṇo vā ‘idaṁ kusalan’ti yathābhūtaṁ nappajānāti, ‘idaṁ akusalan’ti yathābhūtaṁ nappajānāti.
dn1:2.25.3 Tassa evaṁ hoti:
dn1:2.25.4 ‘ahaṁ kho “idaṁ kusalan”ti yathābhūtaṁ nappajānāmi, “idaṁ akusalan”ti yathābhūtaṁ nappajānāmi.
dn1:2.25.5 Ahañce kho pana “idaṁ kusalan”ti yathābhūtaṁ appajānanto, “idaṁ akusalan”ti yathābhūtaṁ appajānanto, “idaṁ kusalan”ti vā byākareyyaṁ, “idaṁ akusalan”ti vā byākareyyaṁ, tattha me assa chando vā rāgo vā doso vā paṭigho vā.
dn1:2.25.6 Yattha me assa chando vā rāgo vā doso vā paṭigho vā, taṁ mamassa upādānaṁ.
dn1:2.25.7 Yaṁ mamassa upādānaṁ, so mamassa vighāto.
dn1:2.25.8 Yo mamassa vighāto, so mamassa antarāyo’ti.
dn1:2.25.9 Iti so upādānabhayā upādānaparijegucchā nevidaṁ kusalanti byākaroti, na panidaṁ akusalanti byākaroti, tattha tattha pañhaṁ puṭṭho samāno vācāvikkhepaṁ āpajjati amarāvikkhepaṁ:
dn1:2.25.10 ‘evantipi me no; tathātipi me no; aññathātipi me no; notipi me no; no notipi me no’ti.
dn1:2.25.11 Idaṁ, bhikkhave, dutiyaṁ ṭhānaṁ, yaṁ āgamma yaṁ ārabbha eke samaṇabrāhmaṇā amarāvikkhepikā tattha tattha pañhaṁ puṭṭhā samānā vācāvikkhepaṁ āpajjanti amarāvikkhepaṁ.
dn1:2.26.1 Tatiye ca bhonto samaṇabrāhmaṇā kimāgamma kimārabbha amarāvikkhepikā tattha tattha pañhaṁ puṭṭhā samānā vācāvikkhepaṁ āpajjanti amarāvikkhepaṁ?
dn1:2.26.2 Idha, bhikkhave, ekacco samaṇo vā brāhmaṇo vā ‘idaṁ kusalan’ti yathābhūtaṁ nappajānāti, ‘idaṁ akusalan’ti yathābhūtaṁ nappajānāti.
dn1:2.26.3 Tassa evaṁ hoti:
dn1:2.26.4 ‘ahaṁ kho “idaṁ kusalan”ti yathābhūtaṁ nappajānāmi, “idaṁ akusalan”ti yathābhūtaṁ nappajānāmi.
dn1:2.26.5 Ahañce kho pana “idaṁ kusalan”ti yathābhūtaṁ appajānanto “idaṁ akusalan”ti yathābhūtaṁ appajānanto “idaṁ kusalan”ti vā byākareyyaṁ, “idaṁ akusalan”ti vā byākareyyaṁ;
dn1:2.26.6 santi hi kho samaṇabrāhmaṇā paṇḍitā nipuṇā kataparappavādā vālavedhirūpā, te bhindantā maññe caranti paññāgatena diṭṭhigatāni,
dn1:2.26.7 te maṁ tattha samanuyuñjeyyuṁ samanugāheyyuṁ samanubhāseyyuṁ.
dn1:2.26.8 Ye maṁ tattha samanuyuñjeyyuṁ samanugāheyyuṁ samanubhāseyyuṁ, tesāhaṁ na sampāyeyyaṁ.
dn1:2.26.9 Yesāhaṁ na sampāyeyyaṁ, so mamassa vighāto.
dn1:2.26.10 Yo mamassa vighāto, so mamassa antarāyo’ti.
dn1:2.26.11 Iti so anuyogabhayā anuyogaparijegucchā nevidaṁ kusalanti byākaroti, na panidaṁ akusalanti byākaroti, tattha tattha pañhaṁ puṭṭho samāno vācāvikkhepaṁ āpajjati amarāvikkhepaṁ:
dn1:2.26.12 ‘evantipi me no; tathātipi me no; aññathātipi me no; notipi me no; no notipi me no’ti.
dn1:2.26.13 Idaṁ, bhikkhave, tatiyaṁ ṭhānaṁ, yaṁ āgamma yaṁ ārabbha eke samaṇabrāhmaṇā amarāvikkhepikā tattha tattha pañhaṁ puṭṭhā samānā vācāvikkhepaṁ āpajjanti amarāvikkhepaṁ.
dn1:2.27.1 Catutthe ca bhonto samaṇabrāhmaṇā kimāgamma kimārabbha amarāvikkhepikā tattha tattha pañhaṁ puṭṭhā samānā vācāvikkhepaṁ āpajjanti amarāvikkhepaṁ?
dn1:2.27.2 Idha, bhikkhave, ekacco samaṇo vā brāhmaṇo vā mando hoti momūho.
dn1:2.27.3 So mandattā momūhattā tattha tattha pañhaṁ puṭṭho samāno vācāvikkhepaṁ āpajjati amarāvikkhepaṁ:
dn1:2.27.4 ‘atthi paro loko’ti iti ce maṁ pucchasi, ‘atthi paro loko’ti iti ce me assa, ‘atthi paro loko’ti iti te naṁ byākareyyaṁ,
dn1:2.27.5 ‘evantipi me no, tathātipi me no, aññathātipi me no, notipi me no, no notipi me no’ti.
dn1:2.27.6 ‘Natthi paro loko …pe…
dn1:2.27.7 ‘atthi ca natthi ca paro loko …pe…
dn1:2.27.8 ‘nevatthi na natthi paro loko …pe…
dn1:2.27.9 ‘atthi sattā opapātikā …pe…
dn1:2.27.10 ‘natthi sattā opapātikā …pe…
dn1:2.27.11 ‘atthi ca natthi ca sattā opapātikā …pe…
dn1:2.27.12 ‘nevatthi na natthi sattā opapātikā …pe…
dn1:2.27.13 ‘atthi sukatadukkaṭānaṁ kammānaṁ phalaṁ vipāko …pe…
dn1:2.27.14 ‘natthi sukatadukkaṭānaṁ kammānaṁ phalaṁ vipāko …pe…
dn1:2.27.15 ‘atthi ca natthi ca sukatadukkaṭānaṁ kammānaṁ phalaṁ vipāko …pe…
dn1:2.27.16 ‘nevatthi na natthi sukatadukkaṭānaṁ kammānaṁ phalaṁ vipāko …pe…
dn1:2.27.17 ‘hoti tathāgato paraṁ maraṇā …pe…
dn1:2.27.18 ‘na hoti tathāgato paraṁ maraṇā …pe…
dn1:2.27.19 ‘hoti ca na ca hoti tathāgato paraṁ maraṇā …pe…
dn1:2.27.20 ‘neva hoti na na hoti tathāgato paraṁ maraṇā’ti iti ce maṁ pucchasi, ‘neva hoti na na hoti tathāgato paraṁ maraṇā’ti iti ce me assa, ‘neva hoti na na hoti tathāgato paraṁ maraṇā’ti iti te naṁ byākareyyaṁ,
dn1:2.27.21 ‘evantipi me no, tathātipi me no, aññathātipi me no, notipi me no, no notipi me no’ti.
dn1:2.27.22 Idaṁ, bhikkhave, catutthaṁ ṭhānaṁ, yaṁ āgamma yaṁ ārabbha eke samaṇabrāhmaṇā amarāvikkhepikā tattha tattha pañhaṁ puṭṭhā samānā vācāvikkhepaṁ āpajjanti amarāvikkhepaṁ.
dn1:2.28.1 Imehi kho te, bhikkhave, samaṇabrāhmaṇā amarāvikkhepikā tattha tattha pañhaṁ puṭṭhā samānā vācāvikkhepaṁ āpajjanti amarāvikkhepaṁ catūhi vatthūhi.
dn1:2.28.2 Ye hi keci, bhikkhave, samaṇā vā brāhmaṇā vā amarāvikkhepikā tattha tattha pañhaṁ puṭṭhā samānā vācāvikkhepaṁ āpajjanti amarāvikkhepaṁ, sabbe te imeheva catūhi vatthūhi, etesaṁ vā aññatarena, natthi ito bahiddhā …
dn1:2.29.1 pe…
dn1:2.29.2 yehi tathāgatassa yathābhuccaṁ vaṇṇaṁ sammā vadamānā vadeyyuṁ.
dn1:2.30.0 3.1.5. Adhiccasamuppannavāda
dn1:2.30.1 Santi, bhikkhave, eke samaṇabrāhmaṇā adhiccasamuppannikā adhiccasamuppannaṁ attānañca lokañca paññapenti dvīhi vatthūhi.
dn1:2.30.2 Te ca bhonto samaṇabrāhmaṇā kimāgamma kimārabbha adhiccasamuppannikā adhiccasamuppannaṁ attānañca lokañca paññapenti dvīhi vatthūhi?
dn1:2.31.1 Santi, bhikkhave, asaññasattā nāma devā.
dn1:2.31.2 Saññuppādā ca pana te devā tamhā kāyā cavanti.
dn1:2.31.3 Ṭhānaṁ kho panetaṁ, bhikkhave, vijjati, yaṁ aññataro satto tamhā kāyā cavitvā itthattaṁ āgacchati.
dn1:2.31.4 Itthattaṁ āgato samāno agārasmā anagāriyaṁ pabbajati.
dn1:2.31.5 Agārasmā anagāriyaṁ pabbajito samāno ātappamanvāya padhānamanvāya anuyogamanvāya appamādamanvāya sammāmanasikāramanvāya tathārūpaṁ cetosamādhiṁ phusati, yathāsamāhite citte saññuppādaṁ anussarati, tato paraṁ nānussarati.
dn1:2.31.6 So evamāha:
dn1:2.31.7 ‘adhiccasamuppanno attā ca loko ca.
dn1:2.31.8 Taṁ kissa hetu?
dn1:2.31.9 Ahañhi pubbe nāhosiṁ, somhi etarahi ahutvā santatāya pariṇato’ti.
dn1:2.31.10 Idaṁ, bhikkhave, paṭhamaṁ ṭhānaṁ, yaṁ āgamma yaṁ ārabbha eke samaṇabrāhmaṇā adhiccasamuppannikā adhiccasamuppannaṁ attānañca lokañca paññapenti.
dn1:2.32.1 Dutiye ca bhonto samaṇabrāhmaṇā kimāgamma kimārabbha adhiccasamuppannikā adhiccasamuppannaṁ attānañca lokañca paññapenti?
dn1:2.32.2 Idha, bhikkhave, ekacco samaṇo vā brāhmaṇo vā takkī hoti vīmaṁsī.
dn1:2.32.3 So takkapariyāhataṁ vīmaṁsānucaritaṁ sayampaṭibhānaṁ evamāha:
dn1:2.32.4 ‘adhiccasamuppanno attā ca loko cā’ti.
dn1:2.32.5 Idaṁ, bhikkhave, dutiyaṁ ṭhānaṁ, yaṁ āgamma yaṁ ārabbha eke samaṇabrāhmaṇā adhiccasamuppannikā adhiccasamuppannaṁ attānañca lokañca paññapenti.
dn1:2.33.1 Imehi kho te, bhikkhave, samaṇabrāhmaṇā adhiccasamuppannikā adhiccasamuppannaṁ attānañca lokañca paññapenti dvīhi vatthūhi.
dn1:2.33.2 Ye hi keci, bhikkhave, samaṇā vā brāhmaṇā vā adhiccasamuppannikā adhiccasamuppannaṁ attānañca lokañca paññapenti, sabbe te imeheva dvīhi vatthūhi, etesaṁ vā aññatarena, natthi ito bahiddhā …
dn1:2.34.1 pe…
dn1:2.34.2 yehi tathāgatassa yathābhuccaṁ vaṇṇaṁ sammā vadamānā vadeyyuṁ.
dn1:2.35.1 Imehi kho te, bhikkhave, samaṇabrāhmaṇā pubbantakappikā pubbantānudiṭṭhino pubbantaṁ ārabbha anekavihitāni adhimuttipadāni abhivadanti aṭṭhārasahi vatthūhi.
dn1:2.35.2 Ye hi keci, bhikkhave, samaṇā vā brāhmaṇā vā pubbantakappikā pubbantānudiṭṭhino pubbantamārabbha anekavihitāni adhimuttipadāni abhivadanti, sabbe te imeheva aṭṭhārasahi vatthūhi, etesaṁ vā aññatarena, natthi ito bahiddhā.
dn1:2.36.1 Tayidaṁ, bhikkhave, tathāgato pajānāti:
dn1:2.36.2 ‘ime diṭṭhiṭṭhānā evaṅgahitā evaṁparāmaṭṭhā evaṅgatikā bhavanti evaṁabhisamparāyā’ti.
dn1:2.36.3 Tañca tathāgato pajānāti, tato ca uttaritaraṁ pajānāti, tañca pajānanaṁ na parāmasati, aparāmasato cassa paccattaññeva nibbuti viditā.
dn1:2.36.4 Vedanānaṁ samudayañca atthaṅgamañca assādañca ādīnavañca nissaraṇañca yathābhūtaṁ viditvā anupādāvimutto, bhikkhave, tathāgato.
dn1:2.36.5 Ime kho te, bhikkhave, dhammā gambhīrā duddasā duranubodhā santā paṇītā atakkāvacarā nipuṇā paṇḍitavedanīyā, ye tathāgato sayaṁ abhiññā sacchikatvā pavedeti, yehi tathāgatassa yathābhuccaṁ vaṇṇaṁ sammā vadamānā vadeyyuṁ.
dn1:2.36.6 Dutiyabhāṇavāro.
dn1:2.37.0 3.2. Aparantakappika
dn1:2.37.1 Santi, bhikkhave, eke samaṇabrāhmaṇā aparantakappikā aparantānudiṭṭhino, aparantaṁ ārabbha anekavihitāni adhimuttipadāni abhivadanti catucattārīsāya vatthūhi.
dn1:2.37.2 Te ca bhonto samaṇabrāhmaṇā kimāgamma kimārabbha aparantakappikā aparantānudiṭṭhino aparantaṁ ārabbha anekavihitāni adhimuttipadāni abhivadanti catucattārīsāya vatthūhi?
dn1:2.38.0 3.2.1. Saññīvāda
dn1:2.38.1 Santi, bhikkhave, eke samaṇabrāhmaṇā uddhamāghātanikā saññīvādā uddhamāghātanaṁ saññiṁ attānaṁ paññapenti soḷasahi vatthūhi.
dn1:2.38.2 Te ca bhonto samaṇabrāhmaṇā kimāgamma kimārabbha uddhamāghātanikā saññīvādā uddhamāghātanaṁ saññiṁ attānaṁ paññapenti soḷasahi vatthūhi?
dn1:2.38.3 ‘Rūpī attā hoti arogo paraṁ maraṇā saññī’ti naṁ paññapenti.
dn1:2.38.4 ‘Arūpī attā hoti arogo paraṁ maraṇā saññī’ti naṁ paññapenti.
dn1:2.38.5 ‘Rūpī ca arūpī ca attā hoti …pe….
dn1:2.38.6 ‘Nevarūpī nārūpī attā hoti ….
dn1:2.38.7 ‘Antavā attā hoti ….
dn1:2.38.8 ‘Anantavā attā hoti ….
dn1:2.38.9 ‘Antavā ca anantavā ca attā hoti ….
dn1:2.38.10 ‘Nevantavā nānantavā attā hoti ….
dn1:2.38.11 ‘Ekattasaññī attā hoti ….
dn1:2.38.12 ‘Nānattasaññī attā hoti ….
dn1:2.38.13 ‘Parittasaññī attā hoti ….
dn1:2.38.14 ‘Appamāṇasaññī attā hoti ….
dn1:2.38.15 ‘Ekantasukhī attā hoti ….
dn1:2.38.16 ‘Ekantadukkhī attā hoti ….
dn1:2.38.17 ‘Sukhadukkhī attā hoti ….
dn1:2.38.18 ‘Adukkhamasukhī attā hoti arogo paraṁ maraṇā saññī’ti naṁ paññapenti.
dn1:2.39.1 Imehi kho te, bhikkhave, samaṇabrāhmaṇā uddhamāghātanikā saññīvādā uddhamāghātanaṁ saññiṁ attānaṁ paññapenti soḷasahi vatthūhi.
dn1:2.39.2 Ye hi keci, bhikkhave, samaṇā vā brāhmaṇā vā uddhamāghātanikā saññīvādā uddhamāghātanaṁ saññiṁ attānaṁ paññapenti, sabbe te imeheva soḷasahi vatthūhi, etesaṁ vā aññatarena, natthi ito bahiddhā …
dn1:2.40.1 pe…
dn1:2.40.2 yehi tathāgatassa yathābhuccaṁ vaṇṇaṁ sammā vadamānā vadeyyuṁ.