Mahāsudassanasutta

dn17:2.1.0 5. Jhānasampatti

dn17:2.1.1 Atha kho, ānanda, rañño mahāsudassanassa etadahosi:

dn17:2.1.2 ‘kissa nu kho me idaṁ kammassa phalaṁ kissa kammassa vipāko, yenāhaṁ etarahi evaṁmahiddhiko evaṁmahānubhāvo’ti?

dn17:2.1.3 Atha kho, ānanda, rañño mahāsudassanassa etadahosi:

dn17:2.1.4 ‘tiṇṇaṁ kho me idaṁ kammānaṁ phalaṁ tiṇṇaṁ kammānaṁ vipāko, yenāhaṁ etarahi evaṁmahiddhiko evaṁmahānubhāvo, seyyathidaṁ—

dn17:2.1.5 dānassa damassa saṁyamassā’ti.

dn17:2.2.1 Atha kho, ānanda, rājā mahāsudassano yena mahāviyūhaṁ kūṭāgāraṁ tenupasaṅkami; upasaṅkamitvā mahāviyūhassa kūṭāgārassa dvāre ṭhito udānaṁ udānesi:

dn17:2.2.2 ‘tiṭṭha, kāmavitakka, tiṭṭha, byāpādavitakka, tiṭṭha, vihiṁsāvitakka.

dn17:2.2.3 Ettāvatā, kāmavitakka, ettāvatā, byāpādavitakka, ettāvatā, vihiṁsāvitakkā’ti.

dn17:2.3.1 Atha kho, ānanda, rājā mahāsudassano mahāviyūhaṁ kūṭāgāraṁ pavisitvā sovaṇṇamaye pallaṅke nisinno vivicceva kāmehi vivicca akusalehi dhammehi savitakkaṁ savicāraṁ vivekajaṁ pītisukhaṁ paṭhamaṁ jhānaṁ upasampajja vihāsi.

dn17:2.3.2 Vitakkavicārānaṁ vūpasamā ajjhattaṁ sampasādanaṁ cetaso ekodibhāvaṁ avitakkaṁ avicāraṁ samādhijaṁ pītisukhaṁ dutiyaṁ jhānaṁ upasampajja vihāsi.

dn17:2.3.3 Pītiyā ca virāgā upekkhako ca vihāsi, sato ca sampajāno sukhañca kāyena paṭisaṁvedesi, yaṁ taṁ ariyā ācikkhanti: ‘upekkhako satimā sukhavihārī’ti tatiyaṁ jhānaṁ upasampajja vihāsi.

dn17:2.3.4 Sukhassa ca pahānā dukkhassa ca pahānā pubbeva somanassadomanassānaṁ atthaṅgamā adukkhamasukhaṁ upekkhāsatipārisuddhiṁ catutthaṁ jhānaṁ upasampajja vihāsi.

dn17:2.4.1 Atha kho, ānanda, rājā mahāsudassano mahāviyūhā kūṭāgārā nikkhamitvā sovaṇṇamayaṁ kūṭāgāraṁ pavisitvā rūpiyamaye pallaṅke nisinno

dn17:2.4.2 mettāsahagatena cetasā ekaṁ disaṁ pharitvā vihāsi. Tathā dutiyaṁ tathā tatiyaṁ tathā catutthaṁ. Iti uddhamadho tiriyaṁ sabbadhi sabbattatāya sabbāvantaṁ lokaṁ mettāsahagatena cetasā vipulena mahaggatena appamāṇena averena abyāpajjena pharitvā vihāsi.

dn17:2.4.3 Karuṇāsahagatena cetasā …pe…

dn17:2.4.4 muditāsahagatena cetasā …pe…

dn17:2.4.5 upekkhāsahagatena cetasā ekaṁ disaṁ pharitvā vihāsi. Tathā dutiyaṁ tathā tatiyaṁ tathā catutthaṁ. Iti uddhamadho tiriyaṁ sabbadhi sabbattatāya sabbāvantaṁ lokaṁ upekkhāsahagatena cetasā vipulena mahaggatena appamāṇena averena abyāpajjena pharitvā vihāsi.

dn17:2.5.0 6. Caturāsītinagarasahassādi

dn17:2.5.1 Rañño, ānanda, mahāsudassanassa caturāsīti nagarasahassāni ahesuṁ kusāvatīrājadhānippamukhāni;

dn17:2.5.2 caturāsīti pāsādasahassāni ahesuṁ dhammapāsādappamukhāni;

dn17:2.5.3 caturāsīti kūṭāgārasahassāni ahesuṁ mahāviyūhakūṭāgārappamukhāni;

dn17:2.5.4 caturāsīti pallaṅkasahassāni ahesuṁ sovaṇṇamayāni rūpiyamayāni dantamayāni sāramayāni gonakatthatāni paṭikatthatāni paṭalikatthatāni kadalimigapavarapaccattharaṇāni sauttaracchadāni ubhatolohitakūpadhānāni;

dn17:2.5.5 caturāsīti nāgasahassāni ahesuṁ sovaṇṇālaṅkārāni sovaṇṇadhajāni hemajālapaṭicchannāni uposathanāgarājappamukhāni;

dn17:2.5.6 caturāsīti assasahassāni ahesuṁ sovaṇṇālaṅkārāni sovaṇṇadhajāni hemajālapaṭicchannāni valāhakaassarājappamukhāni;

dn17:2.5.7 caturāsīti rathasahassāni ahesuṁ sīhacammaparivārāni byagghacammaparivārāni dīpicammaparivārāni paṇḍukambalaparivārāni sovaṇṇālaṅkārāni sovaṇṇadhajāni hemajālapaṭicchannāni vejayantarathappamukhāni;

dn17:2.5.8 caturāsīti maṇisahassāni ahesuṁ maṇiratanappamukhāni;

dn17:2.5.9 caturāsīti itthisahassāni ahesuṁ subhaddādevippamukhāni;

dn17:2.5.10 caturāsīti gahapatisahassāni ahesuṁ gahapatiratanappamukhāni;

dn17:2.5.11 caturāsīti khattiyasahassāni ahesuṁ anuyantāni pariṇāyakaratanappamukhāni;

dn17:2.5.12 caturāsīti dhenusahassāni ahesuṁ duhasandanāni kaṁsūpadhāraṇāni;

dn17:2.5.13 caturāsīti vatthakoṭisahassāni ahesuṁ khomasukhumānaṁ kappāsikasukhumānaṁ koseyyasukhumānaṁ kambalasukhumānaṁ;

dn17:2.5.14 rañño, ānanda, mahāsudassanassa caturāsīti thālipākasahassāni ahesuṁ sāyaṁ pātaṁ bhattābhihāro abhihariyittha.

dn17:2.6.1 Tena kho panānanda, samayena rañño mahāsudassanassa caturāsīti nāgasahassāni sāyaṁ pātaṁ upaṭṭhānaṁ āgacchanti.

dn17:2.6.2 Atha kho, ānanda, rañño mahāsudassanassa etadahosi:

dn17:2.6.3 ‘imāni kho me caturāsīti nāgasahassāni sāyaṁ pātaṁ upaṭṭhānaṁ āgacchanti, yannūna vassasatassa vassasatassa accayena dvecattālīsaṁ dvecattālīsaṁ nāgasahassāni sakiṁ sakiṁ upaṭṭhānaṁ āgaccheyyun’ti.

dn17:2.6.4 Atha kho, ānanda, rājā mahāsudassano pariṇāyakaratanaṁ āmantesi:

dn17:2.6.5 ‘imāni kho me, samma pariṇāyakaratana, caturāsīti nāgasahassāni sāyaṁ pātaṁ upaṭṭhānaṁ āgacchanti, tena hi, samma pariṇāyakaratana, vassasatassa vassasatassa accayena dvecattālīsaṁ dvecattālīsaṁ nāgasahassāni sakiṁ sakiṁ upaṭṭhānaṁ āgacchantū’ti.

dn17:2.6.6 ‘Evaṁ, devā’ti kho, ānanda, pariṇāyakaratanaṁ rañño mahāsudassanassa paccassosi.

dn17:2.6.7 Atha kho, ānanda, rañño mahāsudassanassa aparena samayena vassasatassa vassasatassa accayena dvecattālīsaṁ dvecattālīsaṁ nāgasahassāni sakiṁ sakiṁ upaṭṭhānaṁ āgamaṁsu.

dn17:2.7.0 7. Subhaddādeviupasaṅkamana

dn17:2.7.1 Atha kho, ānanda, subhaddāya deviyā bahunnaṁ vassānaṁ bahunnaṁ vassasatānaṁ bahunnaṁ vassasahassānaṁ accayena etadahosi:

dn17:2.7.2 ‘ciraṁ diṭṭho kho me rājā mahāsudassano. Yannūnāhaṁ rājānaṁ mahāsudassanaṁ dassanāya upasaṅkameyyan’ti.

dn17:2.7.3 Atha kho, ānanda, subhaddā devī itthāgāraṁ āmantesi:

dn17:2.7.4 ‘etha tumhe sīsāni nhāyatha pītāni vatthāni pārupatha.

dn17:2.7.5 Ciraṁ diṭṭho no rājā mahāsudassano, rājānaṁ mahāsudassanaṁ dassanāya upasaṅkamissāmā’ti.

dn17:2.7.6 ‘Evaṁ, ayye’ti kho, ānanda, itthāgāraṁ subhaddāya deviyā paṭissutvā sīsāni nhāyitvā pītāni vatthāni pārupitvā yena subhaddā devī tenupasaṅkami.

dn17:2.8.1 Atha kho, ānanda, subhaddā devī pariṇāyakaratanaṁ āmantesi:

dn17:2.8.2 ‘kappehi, samma pariṇāyakaratana, caturaṅginiṁ senaṁ, ciraṁ diṭṭho no rājā mahāsudassano, rājānaṁ mahāsudassanaṁ dassanāya upasaṅkamissāmā’ti.

dn17:2.8.3 ‘Evaṁ, devī’ti kho, ānanda, pariṇāyakaratanaṁ subhaddāya deviyā paṭissutvā caturaṅginiṁ senaṁ kappāpetvā subhaddāya deviyā paṭivedesi:

dn17:2.8.4 ‘kappitā kho, devi, caturaṅginī senā,

dn17:2.8.5 yassadāni kālaṁ maññasī’ti.

dn17:2.8.6 Atha kho, ānanda, subhaddā devī caturaṅginiyā senāya saddhiṁ itthāgārena yena dhammo pāsādo tenupasaṅkami; upasaṅkamitvā dhammaṁ pāsādaṁ abhiruhitvā yena mahāviyūhaṁ kūṭāgāraṁ tenupasaṅkami.

dn17:2.8.7 Upasaṅkamitvā mahāviyūhassa kūṭāgārassa dvārabāhaṁ ālambitvā aṭṭhāsi.

dn17:2.8.8 Atha kho, ānanda, rājā mahāsudassano saddaṁ sutvā:

dn17:2.8.9 ‘kiṁ nu kho mahato viya janakāyassa saddo’ti mahāviyūhā kūṭāgārā nikkhamanto addasa subhaddaṁ deviṁ dvārabāhaṁ ālambitvā ṭhitaṁ, disvāna subhaddaṁ deviṁ etadavoca:

dn17:2.8.10 ‘ettheva, devi, tiṭṭha mā pāvisī’ti.

dn17:2.9.1 Atha kho, ānanda, rājā mahāsudassano aññataraṁ purisaṁ āmantesi:

dn17:2.9.2 ‘ehi tvaṁ, ambho purisa, mahāviyūhā kūṭāgārā sovaṇṇamayaṁ pallaṅkaṁ nīharitvā sabbasovaṇṇamaye tālavane paññapehī’ti.

dn17:2.9.3 ‘Evaṁ, devā’ti kho, ānanda, so puriso rañño mahāsudassanassa paṭissutvā mahāviyūhā kūṭāgārā sovaṇṇamayaṁ pallaṅkaṁ nīharitvā sabbasovaṇṇamaye tālavane paññapesi.

dn17:2.9.4 Atha kho, ānanda, rājā mahāsudassano dakkhiṇena passena sīhaseyyaṁ kappesi pāde pādaṁ accādhāya sato sampajāno.

dn17:2.10.1 Atha kho, ānanda, subhaddāya deviyā etadahosi:

dn17:2.10.2 ‘vippasannāni kho rañño mahāsudassanassa indriyāni, parisuddho chavivaṇṇo pariyodāto, mā heva kho rājā mahāsudassano kālamakāsī’ti rājānaṁ mahāsudassanaṁ etadavoca:

dn17:2.10.3 ‘Imāni te, deva, caturāsīti nagarasahassāni kusāvatīrājadhānippamukhāni.

dn17:2.10.4 Ettha, deva, chandaṁ janehi jīvite apekkhaṁ karohi.

dn17:2.10.5 Imāni te, deva, caturāsīti pāsādasahassāni dhammapāsādappamukhāni.

dn17:2.10.6 Ettha, deva, chandaṁ janehi jīvite apekkhaṁ karohi.

dn17:2.10.7 Imāni te, deva, caturāsīti kūṭāgārasahassāni mahāviyūhakūṭāgārappamukhāni.

dn17:2.10.8 Ettha, deva, chandaṁ janehi jīvite apekkhaṁ karohi.

dn17:2.10.9 Imāni te, deva, caturāsīti pallaṅkasahassāni sovaṇṇamayāni rūpiyamayāni dantamayāni sāramayāni gonakatthatāni paṭikatthatāni paṭalikatthatāni kadalimigapavarapaccattharaṇāni sauttaracchadāni ubhatolohitakūpadhānāni.

dn17:2.10.10 Ettha, deva, chandaṁ janehi, jīvite apekkhaṁ karohi.

dn17:2.10.11 Imāni te, deva, caturāsīti nāgasahassāni sovaṇṇālaṅkārāni sovaṇṇadhajāni hemajālapaṭicchannāni uposathanāgarājappamukhāni.

dn17:2.10.12 Ettha, deva, chandaṁ janehi jīvite apekkhaṁ karohi.

dn17:2.10.13 Imāni te, deva, caturāsīti assasahassāni sovaṇṇālaṅkārāni sovaṇṇadhajāni hemajālapaṭicchannāni valāhakaassarājappamukhāni.

dn17:2.10.14 Ettha, deva, chandaṁ janehi jīvite apekkhaṁ karohi.

dn17:2.10.15 Imāni te, deva, caturāsīti rathasahassāni sīhacammaparivārāni byagghacammaparivārāni dīpicammaparivārāni paṇḍukambalaparivārāni sovaṇṇālaṅkārāni sovaṇṇadhajāni hemajālapaṭicchannāni vejayantarathappamukhāni.

dn17:2.10.16 Ettha, deva, chandaṁ janehi jīvite apekkhaṁ karohi.

dn17:2.10.17 Imāni te, deva, caturāsīti maṇisahassāni maṇiratanappamukhāni.

dn17:2.10.18 Ettha, deva, chandaṁ janehi jīvite apekkhaṁ karohi.

dn17:2.10.19 Imāni te, deva, caturāsīti itthisahassāni itthiratanappamukhāni.

dn17:2.10.20 Ettha, deva, chandaṁ janehi jīvite apekkhaṁ karohi.

dn17:2.10.21 Imāni te, deva, caturāsīti gahapatisahassāni gahapatiratanappamukhāni.

dn17:2.10.22 Ettha, deva, chandaṁ janehi jīvite apekkhaṁ karohi.

dn17:2.10.23 Imāni te, deva, caturāsīti khattiyasahassāni anuyantāni pariṇāyakaratanappamukhāni.

dn17:2.10.24 Ettha, deva, chandaṁ janehi jīvite apekkhaṁ karohi.

dn17:2.10.25 Imāni te, deva, caturāsīti dhenusahassāni duhasandanāni kaṁsūpadhāraṇāni.

dn17:2.10.26 Ettha, deva, chandaṁ janehi jīvite apekkhaṁ karohi.

dn17:2.10.27 Imāni te, deva, caturāsīti vatthakoṭisahassāni khomasukhumānaṁ kappāsikasukhumānaṁ koseyyasukhumānaṁ kambalasukhumānaṁ.

dn17:2.10.28 Ettha, deva, chandaṁ janehi, jīvite apekkhaṁ karohi.

dn17:2.10.29 Imāni te, deva, caturāsīti thālipākasahassāni sāyaṁ pātaṁ bhattābhihāro abhihariyati.

dn17:2.10.30 Ettha, deva, chandaṁ janehi jīvite apekkhaṁ karohī’ti.

dn17:2.11.1 Evaṁ vutte, ānanda, rājā mahāsudassano subhaddaṁ deviṁ etadavoca:

dn17:2.11.2 ‘Dīgharattaṁ kho maṁ tvaṁ, devi, iṭṭhehi kantehi piyehi manāpehi samudācarittha;

dn17:2.11.3 atha ca pana maṁ tvaṁ pacchime kāle aniṭṭhehi akantehi appiyehi amanāpehi samudācarasī’ti.

dn17:2.11.4 ‘Kathaṁ carahi taṁ, deva, samudācarāmī’ti?

dn17:2.11.5 ‘Evaṁ kho maṁ tvaṁ, devi, samudācara:

dn17:2.11.6 “sabbeheva, deva, piyehi manāpehi nānābhāvo vinābhāvo aññathābhāvo, mā kho tvaṁ, deva, sāpekkho kālamakāsi, dukkhā sāpekkhassa kālaṅkiriyā, garahitā ca sāpekkhassa kālaṅkiriyā.

dn17:2.11.7 Imāni te, deva, caturāsīti nagarasahassāni kusāvatīrājadhānippamukhāni.

dn17:2.11.8 Ettha, deva, chandaṁ pajaha jīvite apekkhaṁ mākāsi.

dn17:2.11.9 Imāni te, deva, caturāsīti pāsādasahassāni dhammapāsādappamukhāni.

dn17:2.11.10 Ettha, deva, chandaṁ pajaha jīvite apekkhaṁ mākāsi.

dn17:2.11.11 Imāni te, deva, caturāsīti kūṭāgārasahassāni mahāviyūhakūṭāgārappamukhāni.

dn17:2.11.12 Ettha, deva, chandaṁ pajaha jīvite apekkhaṁ mākāsi.

dn17:2.11.13 Imāni te, deva, caturāsīti pallaṅkasahassāni sovaṇṇamayāni rūpiyamayāni dantamayāni sāramayāni gonakatthatāni paṭikatthatāni paṭalikatthatāni kadalimigapavarapaccattharaṇāni sauttaracchadāni ubhatolohitakūpadhānāni.

dn17:2.11.14 Ettha, deva, chandaṁ pajaha jīvite apekkhaṁ mākāsi.

dn17:2.11.15 Imāni te, deva, caturāsīti nāgasahassāni sovaṇṇālaṅkārāni sovaṇṇadhajāni hemajālapaṭicchannāni uposathanāgarājappamukhāni.

dn17:2.11.16 Ettha, deva, chandaṁ pajaha jīvite apekkhaṁ mākāsi.

dn17:2.11.17 Imāni te, deva, caturāsīti assasahassāni sovaṇṇālaṅkārāni sovaṇṇadhajāni hemajālapaṭicchannāni valāhakaassarājappamukhāni.

dn17:2.11.18 Ettha, deva, chandaṁ pajaha jīvite apekkhaṁ mākāsi.

dn17:2.11.19 Imāni te, deva, caturāsīti rathasahassāni sīhacammaparivārāni byagghacammaparivārāni dīpicammaparivārāni paṇḍukambalaparivārāni sovaṇṇālaṅkārāni sovaṇṇadhajāni hemajālapaṭicchannāni vejayantarathappamukhāni.

dn17:2.11.20 Ettha, deva, chandaṁ pajaha jīvite apekkhaṁ mākāsi.

dn17:2.11.21 Imāni te, deva, caturāsīti maṇisahassāni maṇiratanappamukhāni.

dn17:2.11.22 Ettha, deva, chandaṁ pajaha jīvite apekkhaṁ mākāsi.

dn17:2.11.23 Imāni te, deva, caturāsīti itthisahassāni subhaddādevippamukhāni.

dn17:2.11.24 Ettha, deva, chandaṁ pajaha jīvite apekkhaṁ mākāsi.

dn17:2.11.25 Imāni te, deva, caturāsīti gahapatisahassāni gahapatiratanappamukhāni.

dn17:2.11.26 Ettha, deva, chandaṁ pajaha jīvite apekkhaṁ mākāsi.

dn17:2.11.27 Imāni te, deva, caturāsīti khattiyasahassāni anuyantāni pariṇāyakaratanappamukhāni.

dn17:2.11.28 Ettha, deva, chandaṁ pajaha jīvite apekkhaṁ mākāsi.

dn17:2.11.29 Imāni te, deva, caturāsīti dhenusahassāni duhasandanāni kaṁsūpadhāraṇāni.

dn17:2.11.30 Ettha, deva, chandaṁ pajaha jīvite apekkhaṁ mākāsi.

dn17:2.11.31 Imāni te, deva, caturāsīti vatthakoṭisahassāni khomasukhumānaṁ kappāsikasukhumānaṁ koseyyasukhumānaṁ kambalasukhumānaṁ.

dn17:2.11.32 Ettha, deva, chandaṁ pajaha jīvite apekkhaṁ mākāsi.

dn17:2.11.33 Imāni te, deva, caturāsīti thālipākasahassāni sāyaṁ pātaṁ bhattābhihāro abhihariyati.

dn17:2.11.34 Ettha, deva, chandaṁ pajaha jīvite apekkhaṁ mākāsī”’ti.

dn17:2.12.1 Evaṁ vutte, ānanda, subhaddā devī parodi assūni pavattesi.

dn17:2.12.2 Atha kho, ānanda, subhaddā devī assūni puñchitvā rājānaṁ mahāsudassanaṁ etadavoca:

dn17:2.12.3 ‘Sabbeheva, deva, piyehi manāpehi nānābhāvo vinābhāvo aññathābhāvo, mā kho tvaṁ, deva, sāpekkho kālamakāsi, dukkhā sāpekkhassa kālaṅkiriyā, garahitā ca sāpekkhassa kālaṅkiriyā.

dn17:2.12.4 Imāni te, deva, caturāsīti nagarasahassāni kusāvatīrājadhānippamukhāni.

dn17:2.12.5 Ettha, deva, chandaṁ pajaha jīvite apekkhaṁ mākāsi.

dn17:2.12.6 Imāni te, deva, caturāsīti pāsādasahassāni dhammapāsādappamukhāni.

dn17:2.12.7 Ettha, deva, chandaṁ pajaha jīvite apekkhaṁ mākāsi.

dn17:2.12.8 Imāni te, deva, caturāsīti kūṭāgārasahassāni mahāviyūhakūṭāgārappamukhāni.

dn17:2.12.9 Ettha, deva, chandaṁ pajaha jīvite apekkhaṁ mākāsi.

dn17:2.12.10 Imāni te, deva, caturāsīti pallaṅkasahassāni sovaṇṇamayāni rūpiyamayāni dantamayāni sāramayāni gonakatthatāni paṭikatthatāni paṭalikatthatāni kadalimigapavarapaccattharaṇāni sauttaracchadāni ubhatolohitakūpadhānāni.

dn17:2.12.11 Ettha, deva, chandaṁ pajaha jīvite apekkhaṁ mākāsi.

dn17:2.12.12 Imāni te, deva, caturāsīti nāgasahassāni sovaṇṇālaṅkārāni sovaṇṇadhajāni hemajālapaṭicchannāni uposathanāgarājappamukhāni.

dn17:2.12.13 Ettha, deva, chandaṁ pajaha jīvite apekkhaṁ mākāsi.

dn17:2.12.14 Imāni te, deva, caturāsīti assasahassāni sovaṇṇālaṅkārāni sovaṇṇadhajāni hemajālapaṭicchannāni valāhakaassarājappamukhāni.

dn17:2.12.15 Ettha, deva, chandaṁ pajaha, jīvite apekkhaṁ mākāsi.

dn17:2.12.16 Imāni te, deva, caturāsīti rathasahassāni sīhacammaparivārāni byagghacammaparivārāni dīpicammaparivārāni paṇḍukambalaparivārāni sovaṇṇālaṅkārāni sovaṇṇadhajāni hemajālapaṭicchannāni vejayantarathappamukhāni.

dn17:2.12.17 Ettha, deva, chandaṁ pajaha jīvite apekkhaṁ mākāsi.

dn17:2.12.18 Imāni te, deva, caturāsīti maṇisahassāni maṇiratanappamukhāni.

dn17:2.12.19 Ettha, deva, chandaṁ pajaha jīvite apekkhaṁ mākāsi.

dn17:2.12.20 Imāni te, deva, caturāsīti itthisahassāni itthiratanappamukhāni.

dn17:2.12.21 Ettha, deva, chandaṁ pajaha, jīvite apekkhaṁ mākāsi.

dn17:2.12.22 Imāni te, deva, caturāsīti gahapatisahassāni gahapatiratanappamukhāni.

dn17:2.12.23 Ettha, deva, chandaṁ pajaha jīvite apekkhaṁ mākāsi.

dn17:2.12.24 Imāni te, deva, caturāsīti khattiyasahassāni anuyantāni pariṇāyakaratanappamukhāni.

dn17:2.12.25 Ettha, deva, chandaṁ pajaha jīvite apekkhaṁ mākāsi.

dn17:2.12.26 Imāni te, deva, caturāsīti dhenusahassāni duhasandanāni kaṁsūpadhāraṇāni.

dn17:2.12.27 Ettha, deva, chandaṁ pajaha jīvite apekkhaṁ mākāsi.

dn17:2.12.28 Imāni te, deva, caturāsīti vatthakoṭisahassāni khomasukhumānaṁ kappāsikasukhumānaṁ koseyyasukhumānaṁ kambalasukhumānaṁ.

dn17:2.12.29 Ettha, deva, chandaṁ pajaha jīvite apekkhaṁ mākāsi.

dn17:2.12.30 Imāni te, deva, caturāsīti thālipākasahassāni sāyaṁ pātaṁ bhattābhihāro abhihariyati.

dn17:2.12.31 Ettha, deva, chandaṁ pajaha jīvite apekkhaṁ mākāsī’ti.

dn17:2.13.0 8. Brahmalokūpagama

dn17:2.13.1 Atha kho, ānanda, rājā mahāsudassano na cirasseva kālamakāsi.

dn17:2.13.2 Seyyathāpi, ānanda, gahapatissa vā gahapatiputtassa vā manuññaṁ bhojanaṁ bhuttāvissa bhattasammado hoti; evameva kho, ānanda, rañño mahāsudassanassa māraṇantikā vedanā ahosi.

dn17:2.13.3 Kālaṅkato ca, ānanda, rājā mahāsudassano sugatiṁ brahmalokaṁ upapajji.

dn17:2.13.4 Rājā, ānanda, mahāsudassano caturāsīti vassasahassāni kumārakīḷaṁ kīḷi.

dn17:2.13.5 Caturāsīti vassasahassāni oparajjaṁ kāresi.

dn17:2.13.6 Caturāsīti vassasahassāni rajjaṁ kāresi.

dn17:2.13.7 Caturāsīti vassasahassāni gihibhūto dhamme pāsāde brahmacariyaṁ cari.

dn17:2.13.8 So cattāro brahmavihāre bhāvetvā kāyassa bhedā paraṁ maraṇā brahmalokūpago ahosi.

dn17:2.14.1 Siyā kho panānanda, evamassa:

dn17:2.14.2 ‘añño nūna tena samayena rājā mahāsudassano ahosī’ti,

dn17:2.14.3 na kho panetaṁ, ānanda, evaṁ daṭṭhabbaṁ. Ahaṁ tena samayena rājā mahāsudassano ahosiṁ.

dn17:2.14.4 Mama tāni caturāsīti nagarasahassāni kusāvatīrājadhānippamukhāni, mama tāni caturāsīti pāsādasahassāni dhammapāsādappamukhāni, mama tāni caturāsīti kūṭāgārasahassāni mahāviyūhakūṭāgārappamukhāni, mama tāni caturāsīti pallaṅkasahassāni sovaṇṇamayāni rūpiyamayāni dantamayāni sāramayāni gonakatthatāni paṭikatthatāni paṭalikatthatāni kadalimigapavarapaccattharaṇāni sauttaracchadāni ubhatolohitakūpadhānāni, mama tāni caturāsīti nāgasahassāni sovaṇṇālaṅkārāni sovaṇṇadhajāni hemajālapaṭicchannāni uposathanāgarājappamukhāni, mama tāni caturāsīti assasahassāni sovaṇṇālaṅkārāni sovaṇṇadhajāni hemajālapaṭicchannāni valāhakaassarājappamukhāni, mama tāni caturāsīti rathasahassāni sīhacammaparivārāni byagghacammaparivārāni dīpicammaparivārāni paṇḍukambalaparivārāni sovaṇṇālaṅkārāni sovaṇṇadhajāni hemajālapaṭicchannāni vejayantarathappamukhāni, mama tāni caturāsīti maṇisahassāni maṇiratanappamukhāni, mama tāni caturāsīti itthisahassāni subhaddādevippamukhāni, mama tāni caturāsīti gahapatisahassāni gahapatiratanappamukhāni, mama tāni caturāsīti khattiyasahassāni anuyantāni pariṇāyakaratanappamukhāni, mama tāni caturāsīti dhenusahassāni duhasandanāni kaṁsūpadhāraṇāni, mama tāni caturāsīti vatthakoṭisahassāni khomasukhumānaṁ kappāsikasukhumānaṁ koseyyasukhumānaṁ kambalasukhumānaṁ, mama tāni caturāsīti thālipākasahassāni sāyaṁ pātaṁ bhattābhihāro abhihariyittha.

dn17:2.15.1 Tesaṁ kho panānanda, caturāsītinagarasahassānaṁ ekaññeva taṁ nagaraṁ hoti, yaṁ tena samayena ajjhāvasāmi yadidaṁ kusāvatī rājadhānī.

dn17:2.15.2 Tesaṁ kho panānanda, caturāsīti pāsādasahassānaṁ ekoyeva so pāsādo hoti, yaṁ tena samayena ajjhāvasāmi yadidaṁ dhammo pāsādo.

dn17:2.15.3 Tesaṁ kho panānanda, caturāsīti kūṭāgārasahassānaṁ ekaññeva taṁ kūṭāgāraṁ hoti, yaṁ tena samayena ajjhāvasāmi yadidaṁ mahāviyūhaṁ kūṭāgāraṁ.

dn17:2.15.4 Tesaṁ kho panānanda, caturāsīti pallaṅkasahassānaṁ ekoyeva so pallaṅko hoti, yaṁ tena samayena paribhuñjāmi yadidaṁ sovaṇṇamayo vā rūpiyamayo vā dantamayo vā sāramayo vā.

dn17:2.15.5 Tesaṁ kho panānanda, caturāsīti nāgasahassānaṁ ekoyeva so nāgo hoti, yaṁ tena samayena abhiruhāmi yadidaṁ uposatho nāgarājā.

dn17:2.15.6 Tesaṁ kho panānanda, caturāsīti assasahassānaṁ ekoyeva so asso hoti, yaṁ tena samayena abhiruhāmi yadidaṁ valāhako assarājā.

dn17:2.15.7 Tesaṁ kho panānanda, caturāsīti rathasahassānaṁ ekoyeva so ratho hoti, yaṁ tena samayena abhiruhāmi yadidaṁ vejayantaratho.

dn17:2.15.8 Tesaṁ kho panānanda, caturāsīti itthisahassānaṁ ekāyeva sā itthī hoti, yā tena samayena paccupaṭṭhāti khattiyānī vā vessinī vā.

dn17:2.15.9 Tesaṁ kho panānanda, caturāsīti vatthakoṭisahassānaṁ ekaṁyeva taṁ dussayugaṁ hoti, yaṁ tena samayena paridahāmi khomasukhumaṁ vā kappāsikasukhumaṁ vā koseyyasukhumaṁ vā kambalasukhumaṁ vā.

dn17:2.15.10 Tesaṁ kho panānanda, caturāsīti thālipākasahassānaṁ ekoyeva so thālipāko hoti, yato nāḷikodanaparamaṁ bhuñjāmi tadupiyañca sūpeyyaṁ.

dn17:2.16.1 Passānanda, sabbete saṅkhārā atītā niruddhā vipariṇatā.

dn17:2.16.2 Evaṁ aniccā kho, ānanda, saṅkhārā;

dn17:2.16.3 evaṁ addhuvā kho, ānanda, saṅkhārā;

dn17:2.16.4 evaṁ anassāsikā kho, ānanda, saṅkhārā.

dn17:2.16.5 Yāvañcidaṁ, ānanda, alameva sabbasaṅkhāresu nibbindituṁ, alaṁ virajjituṁ, alaṁ vimuccituṁ.

dn17:2.17.1 Chakkhattuṁ kho panāhaṁ, ānanda, abhijānāmi imasmiṁ padese sarīraṁ nikkhipitaṁ, tañca kho rājāva samāno cakkavattī dhammiko dhammarājā cāturanto vijitāvī janapadatthāvariyappatto sattaratanasamannāgato, ayaṁ sattamo sarīranikkhepo.

dn17:2.17.2 Na kho panāhaṁ, ānanda, taṁ padesaṁ samanupassāmi sadevake loke samārake sabrahmake sassamaṇabrāhmaṇiyā pajāya sadevamanussāya yattha tathāgato aṭṭhamaṁ sarīraṁ nikkhipeyyā”ti.

dn17:2.17.3 Idamavoca bhagavā.

dn17:2.17.4 Idaṁ vatvāna sugato athāparaṁ etadavoca satthā:

dn17:2.17.5 “Aniccā vata saṅkhārā,

dn17:2.17.6 uppādavayadhammino;

dn17:2.17.7 Uppajjitvā nirujjhanti,

dn17:2.17.8 tesaṁ vūpasamo sukho”ti.

dn17:2.17.9 Mahāsudassanasuttaṁ niṭṭhitaṁ catutthaṁ.