dn11:85.0 4.1. Tīradassisakuṇupamā
BAGIAN 85
dn11:85.1 Evaṁ vutte, ahaṁ, kevaṭṭa, taṁ bhikkhuṁ etadavocaṁ—
dn11:85.2 bhūtapubbaṁ, bhikkhu, sāmuddikā vāṇijā tīradassiṁ sakuṇaṁ gahetvā nāvāya samuddaṁ ajjhogāhanti.
dn11:85.3 Te atīradakkhiniyā nāvāya tīradassiṁ sakuṇaṁ muñcanti.
dn11:85.4 So gacchateva puratthimaṁ disaṁ, gacchati dakkhiṇaṁ disaṁ, gacchati pacchimaṁ disaṁ, gacchati uttaraṁ disaṁ, gacchati uddhaṁ disaṁ, gacchati anudisaṁ.
dn11:85.5 Sace so samantā tīraṁ passati, tathāgatakova hoti.
dn11:85.6 Sace pana so samantā tīraṁ na passati, tameva nāvaṁ paccāgacchati.
dn11:85.7 Evameva kho tvaṁ, bhikkhu, yato yāva brahmalokā pariyesamāno imassa pañhassa veyyākaraṇaṁ nājjhagā, atha mamaññeva santike paccāgato.
dn11:85.8 Na kho eso, bhikkhu, pañho evaṁ pucchitabbo:
dn11:85.9 ‘kattha nu kho, bhante, ime cattāro mahābhūtā aparisesā nirujjhanti, seyyathidaṁ—pathavīdhātu āpodhātu tejodhātu vāyodhātū’ti?
dn11:85.10 Evañca kho eso, bhikkhu, pañho pucchitabbo:
dn11:85.11 ‘Kattha āpo ca pathavī,
dn11:85.12 tejo vāyo na gādhati;
dn11:85.13 Kattha dīghañca rassañca,
dn11:85.14 aṇuṁ thūlaṁ subhāsubhaṁ;
dn11:85.15 Kattha nāmañca rūpañca,
dn11:85.16 asesaṁ uparujjhatī’ti.
dn11:85.17 Tatra veyyākaraṇaṁ bhavati:
dn11:85.18 ‘Viññāṇaṁ anidassanaṁ,
dn11:85.19 anantaṁ sabbatopabhaṁ;
dn11:85.20 Ettha āpo ca pathavī,
dn11:85.21 tejo vāyo na gādhati.
dn11:85.22 Ettha dīghañca rassañca,
dn11:85.23 aṇuṁ thūlaṁ subhāsubhaṁ;
dn11:85.24 Ettha nāmañca rūpañca,
dn11:85.25 asesaṁ uparujjhati;
dn11:85.26 Viññāṇassa nirodhena,
dn11:85.27 etthetaṁ uparujjhatī’”ti.
dn11:85.28 Idamavoca bhagavā.
dn11:85.29 Attamano kevaṭṭo gahapatiputto bhagavato bhāsitaṁ abhinandīti.
dn11:85.30 Kevaṭṭasuttaṁ niṭṭhitaṁ ekādasamaṁ.