Sundarikasutta

sn7.9:1.1 Ekaṁ samayaṁ bhagavā kosalesu viharati sundarikāya nadiyā tīre.

sn7.9:1.2 Tena kho pana samayena sundarikabhāradvājo brāhmaṇo sundarikāya nadiyā tīre aggiṁ juhati, aggihuttaṁ paricarati.

sn7.9:1.3 Atha kho sundarikabhāradvājo brāhmaṇo aggiṁ juhitvā aggihuttaṁ paricaritvā uṭṭhāyāsanā samantā catuddisā anuvilokesi:

sn7.9:1.4 “ko nu kho imaṁ habyasesaṁ bhuñjeyyā”ti?

sn7.9:1.5 Addasā kho sundarikabhāradvājo brāhmaṇo bhagavantaṁ aññatarasmiṁ rukkhamūle sasīsaṁ pārutaṁ nisinnaṁ.

sn7.9:1.6 Disvāna vāmena hatthena habyasesaṁ gahetvā dakkhiṇena hatthena kamaṇḍaluṁ gahetvā yena bhagavā tenupasaṅkami.

sn7.9:1.7 Atha kho bhagavā sundarikabhāradvājassa brāhmaṇassa padasaddena sīsaṁ vivari.

sn7.9:1.8 Atha kho sundarikabhāradvājo brāhmaṇo “muṇḍo ayaṁ bhavaṁ, muṇḍako ayaṁ bhavan”ti tatova puna nivattitukāmo ahosi.

sn7.9:1.9 Atha kho sundarikabhāradvājassa brāhmaṇassa etadahosi:

sn7.9:1.10 “muṇḍāpi hi idhekacce brāhmaṇā bhavanti;

sn7.9:1.11 yannūnāhaṁ taṁ upasaṅkamitvā jātiṁ puccheyyan”ti.