sn7.15:1.1 Sāvatthinidānaṁ.
BAGIAN 1
sn7.15:1.2 Tena kho pana samayena mānatthaddho nāma brāhmaṇo sāvatthiyaṁ paṭivasati.
sn7.15:1.3 So neva mātaraṁ abhivādeti, na pitaraṁ abhivādeti, na ācariyaṁ abhivādeti, na jeṭṭhabhātaraṁ abhivādeti.
sn7.15:1.4 Tena kho pana samayena bhagavā mahatiyā parisāya parivuto dhammaṁ deseti.
sn7.15:1.5 Atha kho mānatthaddhassa brāhmaṇassa etadahosi:
sn7.15:1.6 “ayaṁ kho samaṇo gotamo mahatiyā parisāya parivuto dhammaṁ deseti.
sn7.15:1.7 Yannūnāhaṁ yena samaṇo gotamo tenupasaṅkameyyaṁ.
sn7.15:1.8 Sace maṁ samaṇo gotamo ālapissati, ahampi taṁ ālapissāmi.
sn7.15:1.9 No ce maṁ samaṇo gotamo ālapissati, ahampi nālapissāmī”ti.
sn7.15:1.10 Atha kho mānatthaddho brāhmaṇo yena bhagavā tenupasaṅkami; upasaṅkamitvā tuṇhībhūto ekamantaṁ aṭṭhāsi.
sn7.15:1.11 Atha kho bhagavā taṁ nālapi.
sn7.15:1.12 Atha kho mānatthaddho brāhmaṇo:
sn7.15:1.13 “nāyaṁ samaṇo gotamo kiñci jānātī”ti tatova puna nivattitukāmo ahosi.
sn7.15:1.14 Atha kho bhagavā mānatthaddhassa brāhmaṇassa cetasā cetoparivitakkamaññāya mānatthaddhaṁ brāhmaṇaṁ gāthāya ajjhabhāsi: