Paṭhamauppādasutta

sn48.59:1.1 Sāvatthinidānaṁ.

sn48.59:1.2 “Pañcimāni, bhikkhave, indriyāni bhāvitāni bahulīkatāni anuppannāni uppajjanti, nāññatra tathāgatassa pātubhāvā arahato sammāsambuddhassa.

sn48.59:1.3 Katamāni pañca?

sn48.59:1.4 Saddhindriyaṁ, vīriyindriyaṁ, satindriyaṁ, samādhindriyaṁ, paññindriyaṁ—

sn48.59:1.5 imāni kho, bhikkhave, pañcindriyāni bhāvitāni bahulīkatāni anuppannāni uppajjanti, nāññatra tathāgatassa pātubhāvā arahato sammāsambuddhassā”ti.

sn48.59:1.6 Navamaṁ.