sn47.47:1.1 Atha kho aññataro bhikkhu yena bhagavā tenupasaṅkami …pe…
BAGIAN 1
sn47.47:1.2 “sādhu me, bhante, bhagavā saṅkhittena dhammaṁ desetu, yamahaṁ bhagavato dhammaṁ sutvā eko vūpakaṭṭho appamatto ātāpī pahitatto vihareyyan”ti.
sn47.47:1.3 “Tasmātiha tvaṁ, bhikkhu, ādimeva visodhehi kusalesu dhammesu.
sn47.47:1.4 Ko cādi kusalānaṁ dhammānaṁ?
sn47.47:1.5 Idha tvaṁ, bhikkhu, kāyaduccaritaṁ pahāya kāyasucaritaṁ bhāvessasi.
sn47.47:1.6 Vacīduccaritaṁ pahāya vacīsucaritaṁ bhāvessasi.
sn47.47:1.7 Manoduccaritaṁ pahāya manosucaritaṁ bhāvessasi.
sn47.47:1.8 Yato kho tvaṁ, bhikkhu, kāyaduccaritaṁ pahāya kāyasucaritaṁ bhāvessasi, vacīduccaritaṁ pahāya vacīsucaritaṁ bhāvessasi, manoduccaritaṁ pahāya manosucaritaṁ bhāvessasi, tato tvaṁ, bhikkhu, sīlaṁ nissāya sīle patiṭṭhāya cattāro satipaṭṭhāne bhāveyyāsi.