Bhikkhunupassayasutta

sn47.10:6.1 Katamesu catūsu?

sn47.10:6.2 Idhānanda, bhikkhu kāye kāyānupassī viharati ātāpī sampajāno satimā, vineyya loke abhijjhādomanassaṁ.

sn47.10:6.3 Tassa kāye kāyānupassino viharato kāyārammaṇo vā uppajjati kāyasmiṁ pariḷāho, cetaso vā līnattaṁ, bahiddhā vā cittaṁ vikkhipati.

sn47.10:6.4 Tenānanda, bhikkhunā kismiñcideva pasādanīye nimitte cittaṁ paṇidahitabbaṁ.

sn47.10:6.5 Tassa kismiñcideva pasādanīye nimitte cittaṁ paṇidahato pāmojjaṁ jāyati.

sn47.10:6.6 Pamuditassa pīti jāyati.

sn47.10:6.7 Pītimanassa kāyo passambhati.

sn47.10:6.8 Passaddhakāyo sukhaṁ vedayati.

sn47.10:6.9 Sukhino cittaṁ samādhiyati.

sn47.10:6.10 So iti paṭisañcikkhati:

sn47.10:6.11 ‘yassa khvāhaṁ atthāya cittaṁ paṇidahiṁ, so me attho abhinipphanno.

sn47.10:6.12 Handa dāni paṭisaṁharāmī’ti.

sn47.10:6.13 So paṭisaṁharati ceva na ca vitakketi na ca vicāreti.

sn47.10:6.14 ‘Avitakkomhi avicāro, ajjhattaṁ satimā sukhamasmī’ti pajānāti.