Bhikkhusutta

sn46.5:1.1 Sāvatthinidānaṁ.

sn46.5:1.2 Atha kho aññataro bhikkhu yena bhagavā tenupasaṅkami …pe… ekamantaṁ nisinno kho so bhikkhu bhagavantaṁ etadavoca:

sn46.5:1.3 “‘bojjhaṅgā, bojjhaṅgā’ti, bhante, vuccanti.

sn46.5:1.4 Kittāvatā nu kho, bhante, ‘bojjhaṅgā’ti vuccantī”ti?

sn46.5:1.5 “Bodhāya saṁvattantīti kho, bhikkhu, tasmā ‘bojjhaṅgā’ti vuccanti.

sn46.5:1.6 Idha, bhikkhu, satisambojjhaṅgaṁ bhāveti vivekanissitaṁ virāganissitaṁ nirodhanissitaṁ vossaggapariṇāmiṁ …pe…

sn46.5:1.7 upekkhāsambojjhaṅgaṁ bhāveti vivekanissitaṁ virāganissitaṁ nirodhanissitaṁ vossaggapariṇāmiṁ.

sn46.5:1.8 Tassime satta bojjhaṅge bhāvayato kāmāsavāpi cittaṁ vimuccati, bhavāsavāpi cittaṁ vimuccati, avijjāsavāpi cittaṁ vimuccati.

sn46.5:1.9 Vimuttasmiṁ vimuttamiti ñāṇaṁ hoti.

sn46.5:1.10 ‘Khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyā’ti pajānāti.

sn46.5:1.11 Bodhāya saṁvattantīti, bhikkhu, tasmā ‘bojjhaṅgā’ti vuccantī”ti.

sn46.5:1.12 Pañcamaṁ.