Abhayasutta

sn46.56:1.1 Evaṁ me sutaṁ—

sn46.56:1.2 ekaṁ samayaṁ bhagavā rājagahe viharati gijjhakūṭe pabbate.

sn46.56:1.3 Atha kho abhayo rājakumāro yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho abhayo rājakumāro bhagavantaṁ etadavoca:

sn46.56:1.4 “pūraṇo, bhante, kassapo evamāha:

sn46.56:1.5 ‘natthi hetu, natthi paccayo aññāṇāya adassanāya.

sn46.56:1.6 Ahetu, appaccayo aññāṇaṁ adassanaṁ hoti.

sn46.56:1.7 Natthi hetu, natthi paccayo ñāṇāya dassanāya.

sn46.56:1.8 Ahetu, appaccayo ñāṇaṁ dassanaṁ hotī’ti.

sn46.56:1.9 Idha bhagavā kimāhā”ti?

sn46.56:1.10 “Atthi, rājakumāra, hetu, atthi paccayo aññāṇāya adassanāya.

sn46.56:1.11 Sahetu, sappaccayo aññāṇaṁ adassanaṁ hoti.

sn46.56:1.12 Atthi, rājakumāra, hetu, atthi paccayo ñāṇāya dassanāya.

sn46.56:1.13 Sahetu, sappaccayo ñāṇaṁ dassanaṁ hotī”ti.