Kumbhasutta

sn45.27:1.1 Sāvatthinidānaṁ.

sn45.27:1.2 “Seyyathāpi, bhikkhave, kumbho anādhāro suppavattiyo hoti, sādhāro duppavattiyo hoti;

sn45.27:1.3 evameva kho, bhikkhave, cittaṁ anādhāraṁ suppavattiyaṁ hoti, sādhāraṁ duppavattiyaṁ hoti.

sn45.27:1.4 Ko ca, bhikkhave, cittassa ādhāro?

sn45.27:1.5 Ayameva ariyo aṭṭhaṅgiko maggo, seyyathidaṁ—

sn45.27:1.6 sammādiṭṭhi …pe… sammāsamādhi.

sn45.27:1.7 Ayaṁ cittassa ādhāro.

sn45.27:1.8 Seyyathāpi, bhikkhave, kumbho anādhāro suppavattiyo hoti, sādhāro duppavattiyo hoti;

sn45.27:1.9 evameva kho, bhikkhave, cittaṁ anādhāraṁ suppavattiyaṁ hoti, sādhāraṁ duppavattiyaṁ hotī”ti.

sn45.27:1.10 Sattamaṁ.