Sabhiyakaccānasutta

sn44.11:3.1 “‘Kiṁ nu kho, bho kaccāna, hoti tathāgato paraṁ maraṇā’ti, iti puṭṭho samāno:

sn44.11:3.2 ‘abyākataṁ kho etaṁ, vaccha, bhagavatā—

sn44.11:3.3 hoti tathāgato paraṁ maraṇā’ti vadesi.

sn44.11:3.4 ‘Kiṁ pana, bho kaccāna, na hoti tathāgato paraṁ maraṇā’ti, iti puṭṭho samāno:

sn44.11:3.5 ‘abyākataṁ kho etaṁ, vaccha, bhagavatā—

sn44.11:3.6 na hoti tathāgato paraṁ maraṇā’ti vadesi.

sn44.11:3.7 ‘Kiṁ nu kho, bho kaccāna, hoti ca na ca hoti tathāgato paraṁ maraṇā’ti, iti puṭṭho samāno:

sn44.11:3.8 ‘abyākataṁ kho etaṁ, vaccha, bhagavatā—

sn44.11:3.9 hoti ca na ca hoti tathāgato paraṁ maraṇā’ti vadesi.

sn44.11:3.10 ‘Kiṁ pana, bho kaccāna, neva hoti na na hoti tathāgato paraṁ maraṇā’ti, iti puṭṭho samāno:

sn44.11:3.11 ‘etampi kho, vaccha, abyākataṁ bhagavatā—

sn44.11:3.12 neva hoti na na hoti tathāgato paraṁ maraṇā’ti vadesi.

sn44.11:3.13 Ko nu kho, bho kaccāna, hetu, ko paccayo, yenetaṁ abyākataṁ samaṇena gotamenā”ti?

sn44.11:3.14 “Yo ca, vaccha, hetu, yo ca paccayo paññāpanāya rūpīti vā arūpīti vā saññīti vā asaññīti vā nevasaññīnāsaññīti vā, so ca hetu, so ca paccayo sabbena sabbaṁ sabbathā sabbaṁ aparisesaṁ nirujjheyya.

sn44.11:3.15 Kena naṁ paññāpayamāno paññāpeyya rūpīti vā arūpīti vā saññīti vā asaññīti vā nevasaññīnāsaññīti vā”ti.

sn44.11:3.16 “Kīvaciraṁ pabbajitosi, bho kaccānā”ti?

sn44.11:3.17 “Naciraṁ, āvuso, tīṇi vassānī”ti.

sn44.11:3.18 “Yassapassa, āvuso, etamettakena ettakameva tampassa bahu, ko pana vādo evaṁ abhikkante”ti.

sn44.11:3.19 Ekādasamaṁ.

sn44.11:3.20 Abyākatavaggo paṭhamo.