sn42.8:6.1 Idha, gāmaṇi, ekacco satthā evaṁvādī hoti evaṁdiṭṭhi:
BAGIAN 6
sn42.8:6.2 ‘yo koci pāṇamatipāteti, sabbo so āpāyiko nerayiko, yo koci adinnaṁ ādiyati, sabbo so āpāyiko nerayiko, yo koci kāmesu micchā carati, sabbo so āpāyiko nerayiko, yo koci musā bhaṇati, sabbo so āpāyiko nerayiko’ti.
sn42.8:6.3 Tasmiṁ kho pana, gāmaṇi, satthari sāvako abhippasanno hoti.
sn42.8:6.4 Tassa evaṁ hoti:
sn42.8:6.5 ‘mayhaṁ kho satthā evaṁvādī evaṁdiṭṭhi—
sn42.8:6.6 yo koci pāṇamatipāteti, sabbo so āpāyiko nerayikoti.
sn42.8:6.7 Atthi kho pana mayā pāṇo atipātito, ahampamhi āpāyiko nerayikoti diṭṭhiṁ paṭilabhati.
sn42.8:6.8 Taṁ, gāmaṇi, vācaṁ appahāya taṁ cittaṁ appahāya taṁ diṭṭhiṁ appaṭinissajjitvā yathābhataṁ nikkhitto evaṁ niraye.
sn42.8:6.9 Mayhaṁ kho satthā evaṁvādī evaṁdiṭṭhi—
sn42.8:6.10 yo koci adinnaṁ ādiyati, sabbo so āpāyiko nerayikoti.
sn42.8:6.11 Atthi kho pana mayā adinnaṁ ādinnaṁ ahampamhi āpāyiko nerayikoti diṭṭhiṁ paṭilabhati.
sn42.8:6.12 Taṁ, gāmaṇi, vācaṁ appahāya taṁ cittaṁ appahāya taṁ diṭṭhiṁ appaṭinissajjitvā yathābhataṁ nikkhitto evaṁ niraye.
sn42.8:6.13 Mayhaṁ kho satthā evaṁvādī evaṁdiṭṭhi—
sn42.8:6.14 yo koci kāmesu micchā carati, sabbo so āpāyiko nerayiko’ti.
sn42.8:6.15 Atthi kho pana mayā kāmesu micchā ciṇṇaṁ.
sn42.8:6.16 ‘Ahampamhi āpāyiko nerayiko’ti diṭṭhiṁ paṭilabhati.
sn42.8:6.17 Taṁ, gāmaṇi, vācaṁ appahāya taṁ cittaṁ appahāya taṁ diṭṭhiṁ appaṭinissajjitvā yathābhataṁ nikkhitto evaṁ niraye.
sn42.8:6.18 Mayhaṁ kho satthā evaṁvādī evaṁdiṭṭhi—
sn42.8:6.19 yo koci musā bhaṇati, sabbo so āpāyiko nerayikoti.
sn42.8:6.20 Atthi kho pana mayā musā bhaṇitaṁ.
sn42.8:6.21 ‘Ahampamhi āpāyiko nerayiko’ti diṭṭhiṁ paṭilabhati.
sn42.8:6.22 Taṁ, gāmaṇi, vācaṁ appahāya taṁ cittaṁ appahāya taṁ diṭṭhiṁ appaṭinissajjitvā yathābhataṁ nikkhitto evaṁ niraye.