Caṇḍasutta

sn42.1:1.1 Sāvatthinidānaṁ.

sn42.1:1.2 Atha kho caṇḍo gāmaṇi yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho caṇḍo gāmaṇi bhagavantaṁ etadavoca:

sn42.1:1.3 “ko nu kho, bhante, hetu, ko paccayo yena midhekacco caṇḍo caṇḍotveva saṅkhaṁ gacchati.

sn42.1:1.4 Ko pana, bhante, hetu, ko paccayo yena midhekacco sorato soratotveva saṅkhaṁ gacchatī”ti?

sn42.1:1.5 “Idha, gāmaṇi, ekaccassa rāgo appahīno hoti.

sn42.1:1.6 Rāgassa appahīnattā pare kopenti, parehi kopiyamāno kopaṁ pātukaroti.

sn42.1:1.7 So caṇḍotveva saṅkhaṁ gacchati.

sn42.1:1.8 Doso appahīno hoti.

sn42.1:1.9 Dosassa appahīnattā pare kopenti, parehi kopiyamāno kopaṁ pātukaroti.

sn42.1:1.10 So caṇḍotveva saṅkhaṁ gacchati.

sn42.1:1.11 Moho appahīno hoti.

sn42.1:1.12 Mohassa appahīnattā pare kopenti, parehi kopiyamāno kopaṁ pātukaroti.

sn42.1:1.13 So caṇḍotveva saṅkhaṁ gacchati.

sn42.1:1.14 Ayaṁ kho, gāmaṇi, hetu, ayaṁ paccayo yena midhekacco caṇḍo caṇḍotveva saṅkhaṁ gacchati.