sn42.13:29.1 Sa kho so, gāmaṇi, ariyasāvako evaṁ vigatābhijjho vigatabyāpādo asammūḷho sampajāno paṭissato upekkhāsahagatena cetasā ekaṁ disaṁ pharitvā viharati, tathā dutiyaṁ, tathā tatiyaṁ, tathā catutthaṁ, iti uddhamadho tiriyaṁ sabbadhi sabbattatāya sabbāvantaṁ lokaṁ upekkhāsahagatena cetasā vipulena mahaggatena appamāṇena averena abyāpajjena pharitvā viharati.
BAGIAN 29
sn42.13:29.2 So iti paṭisañcikkhati:
sn42.13:29.3 ‘yvāyaṁ satthā evaṁvādī evaṁdiṭṭhi:
sn42.13:29.4 “atthi dinnaṁ, atthi yiṭṭhaṁ, atthi hutaṁ, atthi sukatadukkaṭānaṁ kammānaṁ phalaṁ vipāko, atthi ayaṁ loko atthi paro loko, atthi mātā atthi pitā atthi sattā opapātikā, atthi loke samaṇabrāhmaṇā sammaggatā sammāpaṭipannā ye imañca lokaṁ parañca lokaṁ sayaṁ abhiññā sacchikatvā pavedentī”ti.
sn42.13:29.5 Sace tassa bhoto satthuno saccaṁ vacanaṁ, apaṇṇakatāya mayhaṁ, yvāhaṁ na kiñci byābādhemi tasaṁ vā thāvaraṁ vā.
sn42.13:29.6 Ubhayamettha kaṭaggāho, yaṁ camhi kāyena saṁvuto vācāya saṁvuto manasā saṁvuto, yañca kāyassa bhedā paraṁ maraṇā sugatiṁ saggaṁ lokaṁ upapajjissāmī’ti.
sn42.13:29.7 Tassa pāmojjaṁ jāyati.
sn42.13:29.8 Pamuditassa pīti jāyati.
sn42.13:29.9 Pītimanassa kāyo passambhati.
sn42.13:29.10 Passaddhakāyo sukhaṁ vedayati.
sn42.13:29.11 Sukhino cittaṁ samādhiyati.
sn42.13:29.12 Ayaṁ kho, gāmaṇi, dhammasamādhi.
sn42.13:29.13 Tatra ce tvaṁ cittasamādhiṁ paṭilabheyyāsi, evaṁ tvaṁ imaṁ kaṅkhādhammaṁ pajaheyyāsi.