sn42.10:2.1 Tena kho pana samayena maṇicūḷako gāmaṇi tassaṁ parisāyaṁ nisinno hoti.
BAGIAN 2
sn42.10:2.2 Atha kho maṇicūḷako gāmaṇi taṁ parisaṁ etadavoca:
sn42.10:2.3 “mā ayyo evaṁ avacuttha.
sn42.10:2.4 Na kappati samaṇānaṁ sakyaputtiyānaṁ jātarūparajataṁ, na sādiyanti samaṇā sakyaputtiyā jātarūparajataṁ, nappaṭiggaṇhanti samaṇā sakyaputtiyā jātarūparajataṁ, nikkhittamaṇisuvaṇṇā samaṇā sakyaputtiyā apetajātarūparajatā”ti.
sn42.10:2.5 Asakkhi kho maṇicūḷako gāmaṇi taṁ parisaṁ saññāpetuṁ.
sn42.10:2.6 Atha kho maṇicūḷako gāmaṇi yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho maṇicūḷako gāmaṇi bhagavantaṁ etadavoca:
sn42.10:2.7 “idha, bhante, rājantepure rājaparisāya sannisinnānaṁ sannipatitānaṁ ayamantarākathā udapādi:
sn42.10:2.8 ‘kappati samaṇānaṁ sakyaputtiyānaṁ jātarūparajataṁ, sādiyanti samaṇā sakyaputtiyā jātarūparajataṁ, paṭiggaṇhanti samaṇā sakyaputtiyā jātarūparajatan’ti.
sn42.10:2.9 Evaṁ vutte, ahaṁ, bhante, taṁ parisaṁ etadavocaṁ:
sn42.10:2.10 ‘mā ayyo evaṁ avacuttha.
sn42.10:2.11 Na kappati samaṇānaṁ sakyaputtiyānaṁ jātarūparajataṁ, na sādiyanti samaṇā sakyaputtiyā jātarūparajataṁ, nappaṭiggaṇhanti samaṇā sakyaputtiyā jātarūparajataṁ, nikkhittamaṇisuvaṇṇā samaṇā sakyaputtiyā apetajātarūparajatā’ti.
sn42.10:2.12 Asakkhiṁ khvāhaṁ, bhante, taṁ parisaṁ saññāpetuṁ.
sn42.10:2.13 Kaccāhaṁ, bhante, evaṁ byākaramāno vuttavādī ceva bhagavato homi, na ca bhagavantaṁ abhūtena abbhācikkhāmi, dhammassa cānudhammaṁ byākaromi, na ca koci sahadhammiko vādānuvādo gārayhaṁ ṭhānaṁ āgacchatī”ti?