Acelakassapasutta

sn41.9:1.1 Tena kho pana samayena acelo kassapo macchikāsaṇḍaṁ anuppatto hoti cittassa gahapatino purāṇagihisahāyo.

sn41.9:1.2 Assosi kho citto gahapati: “acelo kira kassapo macchikāsaṇḍaṁ anuppatto amhākaṁ purāṇagihisahāyo”ti.

sn41.9:1.3 Atha kho citto gahapati yena acelo kassapo tenupasaṅkami; upasaṅkamitvā acelena kassapena saddhiṁ sammodi.

sn41.9:1.4 Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho citto gahapati acelaṁ kassapaṁ etadavoca:

sn41.9:1.5 “kīvaciraṁ pabbajitassa, bhante kassapā”ti?

sn41.9:1.6 “Tiṁsamattāni kho me, gahapati, vassāni pabbajitassā”ti.

sn41.9:1.7 “Imehi pana te, bhante, tiṁsamattehi vassehi atthi koci uttari manussadhammā alamariyañāṇadassanaviseso adhigato phāsuvihāro”ti?

sn41.9:1.8 “Imehi kho me, gahapati, tiṁsamattehi vassehi pabbajitassa natthi koci uttari manussadhammā alamariyañāṇadassanaviseso adhigato phāsuvihāro, aññatra naggeyyā ca muṇḍeyyā ca pāvaḷanipphoṭanāya cā”ti.

sn41.9:1.9 Evaṁ vutte, citto gahapati acelaṁ kassapaṁ etadavoca:

sn41.9:1.10 “acchariyaṁ vata, bho, abbhutaṁ vata, bho.

sn41.9:1.11 Dhammassa svākkhātatā yatra hi nāma tiṁsamattehi vassehi na koci uttari manussadhammā alamariyañāṇadassanaviseso adhigato abhavissa phāsuvihāro, aññatra naggeyyā ca muṇḍeyyā ca pāvaḷanipphoṭanāya cā”ti.