Saṁyojanasutta

sn41.1:4.1 “‘Saṁyojanan’ti vā, bhante, ‘saṁyojaniyā dhammā’ti vā ime dhammā nānatthā ceva nānābyañjanā ca.

sn41.1:4.2 Tena hi, bhante, upamaṁ vo karissāmi.

sn41.1:4.3 Upamāyapidhekacce viññū purisā bhāsitassa atthaṁ ājānanti.

sn41.1:4.4 Seyyathāpi, bhante, kāḷo ca balībaddo odāto ca balībaddo ekena dāmena vā yottena vā saṁyuttā assu.

sn41.1:4.5 Yo nu kho evaṁ vadeyya:

sn41.1:4.6 ‘kāḷo balībaddo odātassa balībaddassa saṁyojanaṁ, odāto balībaddo kāḷassa balībaddassa saṁyojanan’ti, sammā nu kho so vadamāno vadeyyā”ti?

sn41.1:4.7 “No hetaṁ, gahapati.

sn41.1:4.8 Na kho, gahapati, kāḷo balībaddo odātassa balībaddassa saṁyojanaṁ, napi odāto balībaddo kāḷassa balībaddassa saṁyojanaṁ;

sn41.1:4.9 yena kho te ekena dāmena vā yottena vā saṁyuttā taṁ tattha saṁyojanan”ti.

sn41.1:4.10 “Evameva kho, bhante, na cakkhu rūpānaṁ saṁyojanaṁ, na rūpā cakkhussa saṁyojanaṁ;

sn41.1:4.11 yañca tattha tadubhayaṁ paṭicca uppajjati chandarāgo taṁ tattha saṁyojanaṁ.

sn41.1:4.12 Na sotaṁ saddānaṁ …

sn41.1:4.13 na ghānaṁ gandhānaṁ …

sn41.1:4.14 na jivhā rasānaṁ …

sn41.1:4.15 na kāyo phoṭṭhabbānaṁ saṁyojanaṁ, na phoṭṭhabbā kāyassa saṁyojanaṁ;

sn41.1:4.16 yañca tattha tadubhayaṁ paṭicca uppajjati chandarāgo taṁ tattha saṁyojanaṁ.

sn41.1:4.17 Na mano dhammānaṁ saṁyojanaṁ, na dhammā manassa saṁyojanaṁ;

sn41.1:4.18 yañca tattha tadubhayaṁ paṭicca uppajjati chandarāgo taṁ tattha saṁyojanan”ti.

sn41.1:4.19 “Lābhā te, gahapati, suladdhaṁ te, gahapati,

sn41.1:4.20 yassa te gambhīre buddhavacane paññācakkhu kamatī”ti.

sn41.1:4.21 Paṭhamaṁ.