sn41.10:2.1 Evaṁ vutte, citto gahapati tā ārāmadevatā vanadevatā rukkhadevatā osadhitiṇavanappatīsu adhivatthā devatā etadavoca:
BAGIAN 2
sn41.10:2.2 “tampi aniccaṁ, tampi addhuvaṁ, tampi pahāya gamanīyan”ti.
sn41.10:2.3 Evaṁ vutte, cittassa gahapatino mittāmaccā ñātisālohitā cittaṁ gahapatiṁ etadavocuṁ:
sn41.10:2.4 “satiṁ, ayyaputta, upaṭṭhapehi, mā vippalapī”ti.
sn41.10:2.5 “Kiṁ tāhaṁ vadāmi yaṁ maṁ tumhe evaṁ vadetha:
sn41.10:2.6 ‘satiṁ, ayyaputta, upaṭṭhapehi, mā vippalapī’”ti?
sn41.10:2.7 “Evaṁ kho tvaṁ, ayyaputta, vadesi:
sn41.10:2.8 ‘tampi aniccaṁ, tampi addhuvaṁ, tampi pahāya gamanīyan’”ti.
sn41.10:2.9 “Tathā hi pana maṁ ārāmadevatā vanadevatā rukkhadevatā osadhitiṇavanappatīsu adhivatthā devatā evamāhaṁsu:
sn41.10:2.10 ‘paṇidhehi, gahapati, anāgatamaddhānaṁ rājā assaṁ cakkavattī’ti.
sn41.10:2.11 Tāhaṁ evaṁ vadāmi:
sn41.10:2.12 ‘tampi aniccaṁ …pe… tampi pahāya gamanīyan’”ti.
sn41.10:2.13 “Kiṁ pana tā, ayyaputta, ārāmadevatā vanadevatā rukkhadevatā osadhitiṇavanappatīsu adhivatthā devatā atthavasaṁ sampassamānā evamāhaṁsu:
sn41.10:2.14 ‘paṇidhehi, gahapati, anāgatamaddhānaṁ rājā assaṁ cakkavattī’”ti?
sn41.10:2.15 “Tāsaṁ kho ārāmadevatānaṁ vanadevatānaṁ rukkhadevatānaṁ osadhitiṇavanappatīsu adhivatthānaṁ devatānaṁ evaṁ hoti:
sn41.10:2.16 ‘ayaṁ kho citto gahapati, sīlavā kalyāṇadhammo.
sn41.10:2.17 Sace paṇidahissati—
sn41.10:2.18 anāgatamaddhānaṁ rājā assaṁ cakkavattī’ti, ‘tassa kho ayaṁ ijjhissati, sīlavato cetopaṇidhi visuddhattā dhammiko dhammikaṁ phalaṁ anupassatī’ti.
sn41.10:2.19 Imaṁ kho tā ārāmadevatā vanadevatā rukkhadevatā osadhitiṇavanappatīsu adhivatthā devatā atthavasaṁ sampassamānā evamāhaṁsu:
sn41.10:2.20 ‘paṇidhehi, gahapati, anāgatamaddhānaṁ rājā assaṁ cakkavattī’ti.
sn41.10:2.21 Tāhaṁ evaṁ vadāmi:
sn41.10:2.22 ‘tampi aniccaṁ, tampi addhuvaṁ, tampi pahāya gamanīyan’”ti.