Dutiyajhānapañhāsutta

sn40.2:1.1 “‘Dutiyaṁ jhānaṁ, dutiyaṁ jhānan’ti vuccati.

sn40.2:1.2 Katamaṁ nu kho dutiyaṁ jhānanti?

sn40.2:1.3 Tassa mayhaṁ, āvuso, etadahosi:

sn40.2:1.4 ‘idha bhikkhu vitakkavicārānaṁ vūpasamā ajjhattaṁ sampasādanaṁ cetaso ekodibhāvaṁ avitakkaṁ avicāraṁ samādhijaṁ pītisukhaṁ dutiyaṁ jhānaṁ upasampajja viharati.

sn40.2:1.5 Idaṁ vuccati dutiyaṁ jhānan’ti.

sn40.2:1.6 So khvāhaṁ, āvuso, vitakkavicārānaṁ vūpasamā ajjhattaṁ sampasādanaṁ cetaso ekodibhāvaṁ avitakkaṁ avicāraṁ samādhijaṁ pītisukhaṁ dutiyaṁ jhānaṁ upasampajja viharāmi.

sn40.2:1.7 Tassa mayhaṁ, āvuso, iminā vihārena viharato vitakkasahagatā saññāmanasikārā samudācaranti.