Vedanāpañhāsutta

sn38.7:1.1 “‘Vedanā, vedanā’ti, āvuso sāriputta, vuccati.

sn38.7:1.2 Katamā nu kho, āvuso, vedanā”ti?

sn38.7:1.3 “Tisso imāvuso, vedanā.

sn38.7:1.4 Katamā tisso?

sn38.7:1.5 Sukhā vedanā, dukkhā vedanā, adukkhamasukhā vedanā—

sn38.7:1.6 imā kho, āvuso, tisso vedanā”ti.

sn38.7:1.7 “Atthi panāvuso, maggo atthi paṭipadā, etāsaṁ tissannaṁ vedanānaṁ pariññāyā”ti?

sn38.7:1.8 “Atthi kho, āvuso, maggo atthi paṭipadā, etāsaṁ tissannaṁ vedanānaṁ pariññāyā”ti.

sn38.7:1.9 “Katamo panāvuso, maggo katamā paṭipadā, etāsaṁ tissannaṁ vedanānaṁ pariññāyā”ti?

sn38.7:1.10 “Ayameva kho, āvuso, ariyo aṭṭhaṅgiko maggo, etāsaṁ tissannaṁ vedanānaṁ pariññāya, seyyathidaṁ—

sn38.7:1.11 sammādiṭṭhi …pe… sammāsamādhi.

sn38.7:1.12 Ayaṁ kho, āvuso, maggo ayaṁ paṭipadā, etāsaṁ tissannaṁ vedanānaṁ pariññāyā”ti.

sn38.7:1.13 “Bhaddako, āvuso, maggo bhaddikā paṭipadā, etāsaṁ tissannaṁ vedanānaṁ pariññāya.

sn38.7:1.14 Alañca panāvuso sāriputta, appamādāyā”ti.

sn38.7:1.15 Sattamaṁ.