Dukkhapañhāsutta

sn38.14:1.1 “‘Dukkhaṁ, dukkhan’ti, āvuso sāriputta, vuccati.

sn38.14:1.2 Katamaṁ nu kho, āvuso, dukkhan”ti?

sn38.14:1.3 “Tisso imā, āvuso, dukkhatā.

sn38.14:1.4 Dukkhadukkhatā, saṅkhāradukkhatā, vipariṇāmadukkhatā—

sn38.14:1.5 imā kho, āvuso, tisso dukkhatā”ti.

sn38.14:1.6 “Atthi panāvuso maggo atthi paṭipadā, etāsaṁ dukkhatānaṁ pariññāyā”ti?

sn38.14:1.7 “Atthi kho, āvuso, maggo atthi paṭipadā, etāsaṁ dukkhatānaṁ pariññāyā”ti.

sn38.14:1.8 “Katamo panāvuso, maggo katamā paṭipadā, etāsaṁ dukkhatānaṁ pariññāyā”ti?

sn38.14:1.9 “Ayameva kho, āvuso, ariyo aṭṭhaṅgiko maggo, etāsaṁ dukkhatānaṁ pariññāya, seyyathidaṁ—

sn38.14:1.10 sammādiṭṭhi …pe… sammāsamādhi.

sn38.14:1.11 Ayaṁ kho, āvuso, maggo ayaṁ paṭipadā, etāsaṁ dukkhatānaṁ pariññāyā”ti.

sn38.14:1.12 “Bhaddako, āvuso, maggo bhaddikā paṭipadā, etāsaṁ dukkhatānaṁ pariññāya.

sn38.14:1.13 Alañca panāvuso sāriputta, appamādāyā”ti.

sn38.14:1.14 Cuddasamaṁ.