Upādānapañhāsutta

sn38.12:1.1 “‘Upādānaṁ, upādānan’ti, āvuso sāriputta, vuccati.

sn38.12:1.2 Katamaṁ nu kho, āvuso, upādānan”ti?

sn38.12:1.3 “Cattārimāni, āvuso, upādānāni.

sn38.12:1.4 Kāmupādānaṁ, diṭṭhupādānaṁ sīlabbatupādānaṁ, attavādupādānaṁ—

sn38.12:1.5 imāni kho, āvuso, cattāri upādānānī”ti.

sn38.12:1.6 “Atthi panāvuso, maggo atthi paṭipadā, etesaṁ upādānānaṁ pahānāyā”ti?

sn38.12:1.7 “Atthi kho, āvuso, maggo atthi paṭipadā, etesaṁ upādānānaṁ pahānāyā”ti.

sn38.12:1.8 “Katamo panāvuso, maggo katamā paṭipadā, etesaṁ upādānānaṁ pahānāyā”ti?

sn38.12:1.9 “Ayameva kho, āvuso, ariyo aṭṭhaṅgiko maggo, etesaṁ upādānānaṁ pahānāya, seyyathidaṁ—

sn38.12:1.10 sammādiṭṭhi …pe… sammāsamādhi.

sn38.12:1.11 Ayaṁ kho, āvuso, maggo ayaṁ paṭipadā, etesaṁ upādānānaṁ pahānāyā”ti.

sn38.12:1.12 “Bhaddako, āvuso, maggo bhaddikā paṭipadā, etesaṁ upādānānaṁ pahānāya.

sn38.12:1.13 Alañca panāvuso sāriputta, appamādāyā”ti.

sn38.12:1.14 Dvādasamaṁ.