Ṭhānasutta

sn37.32:1.1 “Pañcimāni, bhikkhave, ṭhānāni dullabhāni akatapuññena mātugāmena.

sn37.32:1.2 Katamāni pañca?

sn37.32:1.3 Patirūpe kule jāyeyyanti—

sn37.32:1.4 idaṁ, bhikkhave, paṭhamaṁ ṭhānaṁ dullabhaṁ akatapuññena mātugāmena.

sn37.32:1.5 Patirūpe kule jāyitvā patirūpaṁ kulaṁ gaccheyyanti—

sn37.32:1.6 idaṁ, bhikkhave, dutiyaṁ ṭhānaṁ dullabhaṁ akatapuññena mātugāmena.

sn37.32:1.7 Patirūpe kule jāyitvā, patirūpaṁ kulaṁ gantvā, asapatti agāraṁ ajjhāvaseyyanti—

sn37.32:1.8 idaṁ, bhikkhave, tatiyaṁ ṭhānaṁ dullabhaṁ akatapuññena mātugāmena.

sn37.32:1.9 Patirūpe kule jāyitvā, patirūpaṁ kulaṁ gantvā, asapatti agāraṁ ajjhāvasantī puttavatī assanti—

sn37.32:1.10 idaṁ, bhikkhave, catutthaṁ ṭhānaṁ dullabhaṁ akatapuññena mātugāmena.

sn37.32:1.11 Patirūpe kule jāyitvā, patirūpaṁ kulaṁ gantvā, asapatti agāraṁ ajjhāvasantī puttavatī samānā sāmikaṁ abhibhuyya vatteyyanti—

sn37.32:1.12 idaṁ, bhikkhave, pañcamaṁ ṭhānaṁ dullabhaṁ akatapuññena mātugāmena.

sn37.32:1.13 Imāni kho, bhikkhave, pañca ṭhānāni dullabhāni akatapuññena mātugāmenāti.