Sallasutta

sn36.6:1.1 “Assutavā, bhikkhave, puthujjano sukhampi vedanaṁ vedayati, dukkhampi vedanaṁ vedayati, adukkhamasukhampi vedanaṁ vedayati.

sn36.6:1.2 Sutavā, bhikkhave, ariyasāvako sukhampi vedanaṁ vedayati, dukkhampi vedanaṁ vedayati, adukkhamasukhampi vedanaṁ vedayati.

sn36.6:1.3 Tatra, bhikkhave, ko viseso ko adhippayāso kiṁ nānākaraṇaṁ sutavato ariyasāvakassa assutavatā puthujjanenā”ti?

sn36.6:1.4 Bhagavaṁmūlakā no, bhante, dhammā …pe…

sn36.6:1.5 assutavā, bhikkhave, puthujjano dukkhāya vedanāya phuṭṭho samāno socati kilamati paridevati urattāḷiṁ kandati sammohaṁ āpajjati.

sn36.6:1.6 So dve vedanā vedayati—

sn36.6:1.7 kāyikañca, cetasikañca.

sn36.6:1.8 Seyyathāpi, bhikkhave, purisaṁ sallena vijjheyya.

sn36.6:1.9 Tamenaṁ dutiyena sallena anuvedhaṁ vijjheyya.

sn36.6:1.10 Evañhi so, bhikkhave, puriso dvisallena vedanaṁ vedayati.

sn36.6:1.11 Evameva kho, bhikkhave, assutavā puthujjano dukkhāya vedanāya phuṭṭho samāno socati kilamati paridevati urattāḷiṁ kandati sammohaṁ āpajjati.

sn36.6:1.12 So dve vedanā vedayati—

sn36.6:1.13 kāyikañca, cetasikañca.

sn36.6:1.14 Tassāyeva kho pana dukkhāya vedanāya phuṭṭho samāno paṭighavā hoti.

sn36.6:1.15 Tamenaṁ dukkhāya vedanāya paṭighavantaṁ, yo dukkhāya vedanāya paṭighānusayo, so anuseti.

sn36.6:1.16 So dukkhāya vedanāya phuṭṭho samāno kāmasukhaṁ abhinandati.

sn36.6:1.17 Taṁ kissa hetu?

sn36.6:1.18 Na hi so, bhikkhave, pajānāti assutavā puthujjano aññatra kāmasukhā dukkhāya vedanāya nissaraṇaṁ,

sn36.6:1.19 tassa kāmasukhañca abhinandato, yo sukhāya vedanāya rāgānusayo, so anuseti.

sn36.6:1.20 So tāsaṁ vedanānaṁ samudayañca atthaṅgamañca assādañca ādīnavañca nissaraṇañca yathābhūtaṁ nappajānāti.

sn36.6:1.21 Tassa tāsaṁ vedanānaṁ samudayañca atthaṅgamañca assādañca ādīnavañca nissaraṇañca yathābhūtaṁ appajānato, yo adukkhamasukhāya vedanāya avijjānusayo, so anuseti.

sn36.6:1.22 So sukhañce vedanaṁ vedayati, saññutto naṁ vedayati.

sn36.6:1.23 Dukkhañce vedanaṁ vedayati, saññutto naṁ vedayati.

sn36.6:1.24 Adukkhamasukhañce vedanaṁ vedayati, saññutto naṁ vedayati.

sn36.6:1.25 Ayaṁ vuccati, bhikkhave, ‘assutavā puthujjano saññutto jātiyā jarāya maraṇena sokehi paridevehi dukkhehi domanassehi upāyāsehi, saññutto dukkhasmā’ti vadāmi.