Nirāmisasutta

sn36.31:1.1 “Atthi, bhikkhave, sāmisā pīti, atthi nirāmisā pīti, atthi nirāmisā nirāmisatarā pīti;

sn36.31:1.2 atthi sāmisaṁ sukhaṁ, atthi nirāmisaṁ sukhaṁ, atthi nirāmisā nirāmisataraṁ sukhaṁ;

sn36.31:1.3 atthi sāmisā upekkhā, atthi nirāmisā upekkhā, atthi nirāmisā nirāmisatarā upekkhā;

sn36.31:1.4 atthi sāmiso vimokkho, atthi nirāmiso vimokkho, atthi nirāmisā nirāmisataro vimokkho.

sn36.31:1.5 Katamā ca, bhikkhave, sāmisā pīti?

sn36.31:1.6 Pañcime, bhikkhave, kāmaguṇā.

sn36.31:1.7 Katame pañca?

sn36.31:1.8 Cakkhuviññeyyā rūpā iṭṭhā kantā manāpā piyarūpā kāmūpasaṁhitā rajanīyā …pe…

sn36.31:1.9 kāyaviññeyyā phoṭṭhabbā iṭṭhā kantā manāpā piyarūpā kāmūpasaṁhitā rajanīyā.

sn36.31:1.10 Ime kho, bhikkhave, pañca kāmaguṇā.

sn36.31:1.11 Yā kho, bhikkhave, ime pañca kāmaguṇe paṭicca uppajjati pīti, ayaṁ vuccati, bhikkhave, sāmisā pīti.