Aññatarabhikkhusutta

sn36.23:2.1 “Tisso imā, bhikkhu, vedanā—

sn36.23:2.2 sukhā vedanā, dukkhā vedanā, adukkhamasukhā vedanā.

sn36.23:2.3 Imā vuccanti, bhikkhu, vedanā.

sn36.23:2.4 Phassasamudayā vedanāsamudayo.

sn36.23:2.5 Taṇhā vedanāsamudayagāminī paṭipadā.

sn36.23:2.6 Phassanirodhā vedanānirodho.

sn36.23:2.7 Ayameva ariyo aṭṭhaṅgiko maggo vedanānirodhagāminī paṭipadā, seyyathidaṁ—

sn36.23:2.8 sammādiṭṭhi …pe… sammāsamādhi.

sn36.23:2.9 Yaṁ vedanaṁ paṭicca uppajjati sukhaṁ somanassaṁ, ayaṁ vedanāya assādo;

sn36.23:2.10 yaṁ vedanā aniccā dukkhā vipariṇāmadhammā, ayaṁ vedanāya ādīnavo;

sn36.23:2.11 yo vedanāya chandarāgavinayo chandarāgappahānaṁ, idaṁ vedanāya nissaraṇan”ti.

sn36.23:2.12 Tatiyaṁ.