sn36.11:2.1 “Sādhu sādhu, bhikkhu.
BAGIAN 2
sn36.11:2.2 Tisso imā, bhikkhu, vedanā vuttā mayā.
sn36.11:2.3 Sukhā vedanā, dukkhā vedanā, adukkhamasukhā vedanā—
sn36.11:2.4 imā tisso vedanā vuttā mayā.
sn36.11:2.5 Vuttaṁ kho panetaṁ, bhikkhu, mayā:
sn36.11:2.6 ‘yaṁ kiñci vedayitaṁ, taṁ dukkhasmin’ti.
sn36.11:2.7 Taṁ kho panetaṁ, bhikkhu, mayā saṅkhārānaṁyeva aniccataṁ sandhāya bhāsitaṁ:
sn36.11:2.8 ‘yaṁ kiñci vedayitaṁ taṁ dukkhasmin’ti.
sn36.11:2.9 Taṁ kho panetaṁ, bhikkhu, mayā saṅkhārānaṁyeva khayadhammataṁ …pe…
sn36.11:2.10 vayadhammataṁ …pe…
sn36.11:2.11 virāgadhammataṁ …pe…
sn36.11:2.12 nirodhadhammataṁ …pe…
sn36.11:2.13 vipariṇāmadhammataṁ sandhāya bhāsitaṁ:
sn36.11:2.14 ‘yaṁ kiñci vedayitaṁ taṁ dukkhasmin’ti.
sn36.11:2.15 Atha kho pana, bhikkhu, mayā anupubbasaṅkhārānaṁ nirodho akkhāto.
sn36.11:2.16 Paṭhamaṁ jhānaṁ samāpannassa vācā niruddhā hoti.
sn36.11:2.17 Dutiyaṁ jhānaṁ samāpannassa vitakkavicārā niruddhā honti.
sn36.11:2.18 Tatiyaṁ jhānaṁ samāpannassa pīti niruddhā hoti.
sn36.11:2.19 Catutthaṁ jhānaṁ samāpannassa assāsapassāsā niruddhā honti.
sn36.11:2.20 Ākāsānañcāyatanaṁ samāpannassa rūpasaññā niruddhā hoti.
sn36.11:2.21 Viññāṇañcāyatanaṁ samāpannassa ākāsānañcāyatanasaññā niruddhā hoti.
sn36.11:2.22 Ākiñcaññāyatanaṁ samāpannassa viññāṇañcāyatanasaññā niruddhā hoti.
sn36.11:2.23 Nevasaññānāsaññāyatanaṁ samāpannassa ākiñcaññāyatanasaññā niruddhā hoti.
sn36.11:2.24 Saññāvedayitanirodhaṁ samāpannassa saññā ca vedanā ca niruddhā honti.
sn36.11:2.25 Khīṇāsavassa bhikkhuno rāgo niruddho hoti, doso niruddho hoti, moho niruddho hoti.
sn36.11:2.26 Atha kho, bhikkhu, mayā anupubbasaṅkhārānaṁ vūpasamo akkhāto.
sn36.11:2.27 Paṭhamaṁ jhānaṁ samāpannassa vācā vūpasantā hoti.
sn36.11:2.28 Dutiyaṁ jhānaṁ samāpannassa vitakkavicārā vūpasantā honti …pe…
sn36.11:2.29 saññāvedayitanirodhaṁ samāpannassa saññā ca vedanā ca vūpasantā honti.
sn36.11:2.30 Khīṇāsavassa bhikkhuno rāgo vūpasanto hoti, doso vūpasanto hoti, moho vūpasanto hoti.
sn36.11:2.31 Chayimā, bhikkhu, passaddhiyo.
sn36.11:2.32 Paṭhamaṁ jhānaṁ samāpannassa vācā paṭippassaddhā hoti.
sn36.11:2.33 Dutiyaṁ jhānaṁ samāpannassa vitakkavicārā paṭippassaddhā honti.
sn36.11:2.34 Tatiyaṁ jhānaṁ samāpannassa pīti paṭippassaddhā hoti.
sn36.11:2.35 Catutthaṁ jhānaṁ samāpannassa assāsapassāsā paṭippassaddhā honti.
sn36.11:2.36 Saññāvedayitanirodhaṁ samāpannassa saññā ca vedanā ca paṭippassaddhā honti.
sn36.11:2.37 Khīṇāsavassa bhikkhuno rāgo paṭippassaddho hoti, doso paṭippassaddho hoti, moho paṭippassaddho hotī”ti.
sn36.11:2.38 Paṭhamaṁ.