Phassamūlakasutta

sn36.10:1.1 “Tisso imā, bhikkhave, vedanā phassajā phassamūlakā phassanidānā phassapaccayā.

sn36.10:1.2 Katamā tisso?

sn36.10:1.3 Sukhā vedanā, dukkhā vedanā, adukkhamasukhā vedanā.

sn36.10:1.4 Sukhavedaniyaṁ, bhikkhave, phassaṁ paṭicca uppajjati sukhā vedanā.

sn36.10:1.5 Tasseva sukhavedaniyassa phassassa nirodhā, yaṁ tajjaṁ vedayitaṁ sukhavedaniyaṁ phassaṁ paṭicca uppannā sukhā vedanā, sā nirujjhati, sā vūpasammati.

sn36.10:1.6 Dukkhavedaniyaṁ, bhikkhave, phassaṁ paṭicca uppajjati dukkhā vedanā.

sn36.10:1.7 Tasseva dukkhavedaniyassa phassassa nirodhā, yaṁ tajjaṁ vedayitaṁ dukkhavedaniyaṁ phassaṁ paṭicca uppannā dukkhā vedanā, sā nirujjhati, sā vūpasammati.

sn36.10:1.8 Adukkhamasukhavedaniyaṁ, bhikkhave, phassaṁ paṭicca uppajjati adukkhamasukhā vedanā.

sn36.10:1.9 Tasseva adukkhamasukhavedaniyassa phassassa nirodhā, yaṁ tajjaṁ vedayitaṁ adukkhamasukhavedaniyaṁ phassaṁ paṭicca uppannā adukkhamasukhā vedanā, sā nirujjhati, sā vūpasammati.

sn36.10:1.10 Seyyathāpi, bhikkhave, dvinnaṁ kaṭṭhānaṁ saṅghaṭṭanasamodhānā usmā jāyati, tejo abhinibbattati. Tesaṁyeva kaṭṭhānaṁ nānābhāvā vinikkhepā, yā tajjā usmā, sā nirujjhati, sā vūpasammati.

sn36.10:1.11 Evameva kho, bhikkhave, imā tisso vedanā phassajā phassamūlakā phassanidānā phassapaccayā.

sn36.10:1.12 Tajjaṁ phassaṁ paṭicca tajjā vedanā uppajjanti.

sn36.10:1.13 Tajjassa phassassa nirodhā tajjā vedanā nirujjhantī”ti.

sn36.10:1.14 Dasamaṁ.

sn36.10:1.15 Vedanāsaṁyuttassa sagāthāvaggo paṭhamo.