Dutiyadvayasutta

sn35.93:1.1 “Dvayaṁ, bhikkhave, paṭicca viññāṇaṁ sambhoti.

sn35.93:1.2 Kathañca, bhikkhave, dvayaṁ paṭicca viññāṇaṁ sambhoti?

sn35.93:1.3 Cakkhuñca paṭicca rūpe ca uppajjati cakkhuviññāṇaṁ.

sn35.93:1.4 Cakkhu aniccaṁ vipariṇāmi aññathābhāvi.

sn35.93:1.5 Rūpā aniccā vipariṇāmino aññathābhāvino.

sn35.93:1.6 Itthetaṁ dvayaṁ calañceva byathañca aniccaṁ vipariṇāmi aññathābhāvi.

sn35.93:1.7 Cakkhuviññāṇaṁ aniccaṁ vipariṇāmi aññathābhāvi.

sn35.93:1.8 Yopi hetu yopi paccayo cakkhuviññāṇassa uppādāya, sopi hetu sopi paccayo anicco vipariṇāmī aññathābhāvī.

sn35.93:1.9 Aniccaṁ kho pana, bhikkhave, paccayaṁ paṭicca uppannaṁ cakkhuviññāṇaṁ kuto niccaṁ bhavissati.

sn35.93:1.10 Yā kho, bhikkhave, imesaṁ tiṇṇaṁ dhammānaṁ saṅgati sannipāto samavāyo, ayaṁ vuccati cakkhusamphasso.

sn35.93:1.11 Cakkhusamphassopi anicco vipariṇāmī aññathābhāvī.

sn35.93:1.12 Yopi hetu yopi paccayo cakkhusamphassassa uppādāya, sopi hetu sopi paccayo anicco vipariṇāmī aññathābhāvī.

sn35.93:1.13 Aniccaṁ kho pana, bhikkhave, paccayaṁ paṭicca uppanno cakkhusamphasso kuto nicco bhavissati.

sn35.93:1.14 Phuṭṭho, bhikkhave, vedeti, phuṭṭho ceteti, phuṭṭho sañjānāti.

sn35.93:1.15 Itthetepi dhammā calā ceva byathā ca aniccā vipariṇāmino aññathābhāvino …pe…