sn35.81:2.1 “Taggha tumhe, bhikkhave, evaṁ puṭṭhā evaṁ byākaramānā vuttavādino ceva me hotha, na ca maṁ abhūtena abbhācikkhatha, dhammassa cānudhammaṁ byākarotha, na ca koci sahadhammiko vādānuvādo gārayhaṁ ṭhānaṁ āgacchati.
BAGIAN 2
sn35.81:2.2 Dukkhassa hi, bhikkhave, pariññatthaṁ mayi brahmacariyaṁ vussati.
sn35.81:2.3 Sace pana vo, bhikkhave, aññatitthiyā paribbājakā evaṁ puccheyyuṁ:
sn35.81:2.4 ‘katamaṁ pana taṁ, āvuso, dukkhaṁ, yassa pariññāya samaṇe gotame brahmacariyaṁ vussatī’ti?
sn35.81:2.5 Evaṁ puṭṭhā tumhe, bhikkhave, tesaṁ aññatitthiyānaṁ paribbājakānaṁ evaṁ byākareyyātha:
sn35.81:2.6 ‘cakkhu kho, āvuso, dukkhaṁ, tassa pariññāya bhagavati brahmacariyaṁ vussati.
sn35.81:2.7 Rūpā …pe…
sn35.81:2.8 yampidaṁ cakkhusamphassapaccayā uppajjati vedayitaṁ sukhaṁ vā dukkhaṁ vā adukkhamasukhaṁ vā tampi dukkhaṁ.
sn35.81:2.9 Tassa pariññāya bhagavati brahmacariyaṁ vussati …pe…
sn35.81:2.10 mano dukkho …pe…
sn35.81:2.11 yampidaṁ manosamphassapaccayā uppajjati vedayitaṁ sukhaṁ vā dukkhaṁ vā adukkhamasukhaṁ vā tampi dukkhaṁ.
sn35.81:2.12 Tassa pariññāya bhagavati brahmacariyaṁ vussati.
sn35.81:2.13 Idaṁ kho taṁ, āvuso, dukkhaṁ, tassa pariññāya bhagavati brahmacariyaṁ vussatī’ti.
sn35.81:2.14 Evaṁ puṭṭhā tumhe, bhikkhave, tesaṁ aññatitthiyānaṁ paribbājakānaṁ evaṁ byākareyyāthā”ti.
sn35.81:2.15 Aṭṭhamaṁ.