sn35.61:1.1 “Sabbupādānapariyādānāya vo, bhikkhave, dhammaṁ desessāmi.
BAGIAN 1
sn35.61:1.2 Taṁ suṇātha.
sn35.61:1.3 Katamo ca, bhikkhave, sabbupādānapariyādānāya dhammo?
sn35.61:1.4 Cakkhuñca paṭicca rūpe ca uppajjati cakkhuviññāṇaṁ. Tiṇṇaṁ saṅgati phasso.
sn35.61:1.5 Phassapaccayā vedanā.
sn35.61:1.6 Evaṁ passaṁ, bhikkhave, sutavā ariyasāvako cakkhusmimpi nibbindati, rūpesupi nibbindati, cakkhuviññāṇepi nibbindati, cakkhusamphassepi nibbindati, vedanāyapi nibbindati.
sn35.61:1.7 Nibbindaṁ virajjati; virāgā vimuccati; vimokkhā ‘pariyādinnaṁ me upādānan’ti pajānāti …pe…
sn35.61:1.8 jivhañca paṭicca rase ca uppajjati jivhāviññāṇaṁ …pe…
sn35.61:1.9 manañca paṭicca dhamme ca uppajjati manoviññāṇaṁ. Tiṇṇaṁ saṅgati phasso.
sn35.61:1.10 Phassapaccayā vedanā.
sn35.61:1.11 Evaṁ passaṁ, bhikkhave, sutavā ariyasāvako manasmimpi nibbindati, dhammesupi nibbindati, manoviññāṇepi nibbindati manosamphassepi nibbindati, vedanāyapi nibbindati.
sn35.61:1.12 Nibbindaṁ virajjati; virāgā vimuccati; vimokkhā ‘pariyādinnaṁ me upādānan’ti pajānāti.
sn35.61:1.13 Ayaṁ kho, bhikkhave, sabbupādānapariyādānāya dhammo”ti.
sn35.61:1.14 Navamaṁ.