sn35.245:9.1 Upamā kho myāyaṁ, bhikkhu, katā atthassa viññāpanāya.
BAGIAN 9
sn35.245:9.2 Ayañcettha attho:
sn35.245:9.3 ‘nagaran’ti kho, bhikkhu, imassetaṁ cātumahābhūtikassa kāyassa adhivacanaṁ mātāpettikasambhavassa odanakummāsūpacayassa aniccucchādanaparimaddanabhedanaviddhaṁsanadhammassa.
sn35.245:9.4 ‘Cha dvārā’ti kho, bhikkhu, channetaṁ ajjhattikānaṁ āyatanānaṁ adhivacanaṁ.
sn35.245:9.5 ‘Dovāriko’ti kho, bhikkhu, satiyā etaṁ adhivacanaṁ.
sn35.245:9.6 ‘Sīghaṁ dūtayugan’ti kho, bhikkhu, samathavipassanānetaṁ adhivacanaṁ.
sn35.245:9.7 ‘Nagarassāmī’ti kho, bhikkhu, viññāṇassetaṁ adhivacanaṁ.
sn35.245:9.8 ‘Majjhe siṅghāṭako’ti kho, bhikkhu, catunnetaṁ mahābhūtānaṁ adhivacanaṁ—
sn35.245:9.9 pathavīdhātuyā, āpodhātuyā, tejodhātuyā, vāyodhātuyā.
sn35.245:9.10 ‘Yathābhūtaṁ vacanan’ti kho, bhikkhu, nibbānassetaṁ adhivacanaṁ.
sn35.245:9.11 ‘Yathāgatamaggo’ti kho, bhikkhu, ariyassetaṁ aṭṭhaṅgikassa maggassa adhivacanaṁ, seyyathidaṁ—
sn35.245:9.12 sammādiṭṭhiyā …pe… sammāsamādhissā”ti.
sn35.245:9.13 Aṭṭhamaṁ.