sn35.245:7.1 Atha kho so, bhikkhu, puriso asantuṭṭho tassa purisassa pañhaveyyākaraṇena, yenaññataro puriso kiṁsukassa dassāvī tenupasaṅkameyya; upasaṅkamitvā taṁ purisaṁ evaṁ vadeyya:
BAGIAN 7
sn35.245:7.2 ‘kīdiso, bho purisa, kiṁsuko’ti?
sn35.245:7.3 So evaṁ vadeyya:
sn35.245:7.4 ‘lohitako kho, ambho purisa, kiṁsuko—seyyathāpi maṁsapesī’ti.
sn35.245:7.5 Tena kho pana, bhikkhu, samayena tādisovassa kiṁsuko yathāpi tassa purisassa dassanaṁ.
sn35.245:7.6 Atha kho so bhikkhu puriso asantuṭṭho tassa purisassa pañhaveyyākaraṇena, yenaññataro puriso kiṁsukassa dassāvī tenupasaṅkameyya; upasaṅkamitvā taṁ purisaṁ evaṁ vadeyya:
sn35.245:7.7 ‘kīdiso, bho purisa, kiṁsuko’ti?
sn35.245:7.8 So evaṁ vadeyya:
sn35.245:7.9 ‘ocīrakajāto kho, ambho purisa, kiṁsuko ādinnasipāṭiko—seyyathāpi sirīso’ti.
sn35.245:7.10 Tena kho pana, bhikkhu, samayena tādisovassa kiṁsuko, yathāpi tassa purisassa dassanaṁ.
sn35.245:7.11 Atha kho so bhikkhu puriso asantuṭṭho tassa purisassa pañhaveyyākaraṇena, yenaññataro puriso kiṁsukassa dassāvī tenupasaṅkameyya; upasaṅkamitvā taṁ purisaṁ evaṁ vadeyya:
sn35.245:7.12 ‘kīdiso, bho purisa, kiṁsuko’ti?
sn35.245:7.13 So evaṁ vadeyya:
sn35.245:7.14 ‘bahalapattapalāso sandacchāyo kho, ambho purisa, kiṁsuko—seyyathāpi nigrodho’ti.
sn35.245:7.15 Tena kho pana, bhikkhu, samayena tādisovassa kiṁsuko, yathāpi tassa purisassa dassanaṁ.
sn35.245:7.16 Evameva kho, bhikkhu, yathā yathā adhimuttānaṁ tesaṁ sappurisānaṁ dassanaṁ suvisuddhaṁ hoti tathā tathā kho tehi sappurisehi byākataṁ.