sn35.239:2.1 Kathañca, bhikkhave, bhikkhu indriyesu guttadvāro hoti?
BAGIAN 2
sn35.239:2.2 Idha, bhikkhave, bhikkhu cakkhunā rūpaṁ disvā na nimittaggāhī hoti, nānubyañjanaggāhī;
sn35.239:2.3 yatvādhikaraṇamenaṁ cakkhundriyaṁ asaṁvutaṁ viharantaṁ abhijjhādomanassā pāpakā akusalā dhammā anvāssaveyyuṁ. Tassa saṁvarāya paṭipajjati; rakkhati cakkhundriyaṁ; cakkhundriye saṁvaraṁ āpajjati.
sn35.239:2.4 Sotena saddaṁ sutvā …
sn35.239:2.5 ghānena gandhaṁ ghāyitvā …
sn35.239:2.6 jivhāya rasaṁ sāyitvā …
sn35.239:2.7 kāyena phoṭṭhabbaṁ phusitvā …
sn35.239:2.8 manasā dhammaṁ viññāya na nimittaggāhī hoti nānubyañjanaggāhī;
sn35.239:2.9 yatvādhikaraṇamenaṁ manindriyaṁ asaṁvutaṁ viharantaṁ abhijjhādomanassā pāpakā akusalā dhammā anvāssaveyyuṁ, tassa saṁvarāya paṭipajjati; rakkhati manindriyaṁ; manindriye saṁvaraṁ āpajjati.
sn35.239:2.10 Seyyathāpi, bhikkhave, subhūmiyaṁ cātumahāpathe ājaññaratho yutto assa ṭhito odhastapatodo. Tamenaṁ dakkho yoggācariyo assadammasārathi abhiruhitvā vāmena hatthena rasmiyo gahetvā, dakkhiṇena hatthena patodaṁ gahetvā, yenicchakaṁ yadicchakaṁ sāreyyapi paccāsāreyyapi.
sn35.239:2.11 Evameva kho, bhikkhave, bhikkhu imesaṁ channaṁ indriyānaṁ ārakkhāya sikkhati, saṁyamāya sikkhati, damāya sikkhati, upasamāya sikkhati.
sn35.239:2.12 Evaṁ kho, bhikkhave, bhikkhu indriyesu guttadvāro hoti.