sn35.146:1.1 “Navapurāṇāni, bhikkhave, kammāni desessāmi kammanirodhaṁ kammanirodhagāminiñca paṭipadaṁ.
BAGIAN 1
sn35.146:1.2 Taṁ suṇātha, sādhukaṁ manasi karotha, bhāsissāmīti.
sn35.146:1.3 Katamañca, bhikkhave, purāṇakammaṁ?
sn35.146:1.4 Cakkhu, bhikkhave, purāṇakammaṁ abhisaṅkhataṁ abhisañcetayitaṁ vedaniyaṁ daṭṭhabbaṁ …pe…
sn35.146:1.5 jivhā purāṇakammā abhisaṅkhatā abhisañcetayitā vedaniyā daṭṭhabbā …pe…
sn35.146:1.6 mano purāṇakammo abhisaṅkhato abhisañcetayito vedaniyo daṭṭhabbo.
sn35.146:1.7 Idaṁ vuccati, bhikkhave, purāṇakammaṁ.
sn35.146:1.8 Katamañca, bhikkhave, navakammaṁ?
sn35.146:1.9 Yaṁ kho, bhikkhave, etarahi kammaṁ karoti kāyena vācāya manasā,
sn35.146:1.10 idaṁ vuccati, bhikkhave, navakammaṁ.
sn35.146:1.11 Katamo ca, bhikkhave, kammanirodho?
sn35.146:1.12 Yo kho, bhikkhave, kāyakammavacīkammamanokammassa nirodhā vimuttiṁ phusati,
sn35.146:1.13 ayaṁ vuccati, bhikkhave, kammanirodho.
sn35.146:1.14 Katamā ca, bhikkhave, kammanirodhagāminī paṭipadā?
sn35.146:1.15 Ayameva ariyo aṭṭhaṅgiko maggo, seyyathidaṁ—
sn35.146:1.16 sammādiṭṭhi, sammāsaṅkappo, sammāvācā, sammākammanto, sammāājīvo, sammāvāyāmo, sammāsati, sammāsamādhi—
sn35.146:1.17 ayaṁ vuccati, bhikkhave, kammanirodhagāminī paṭipadā.
sn35.146:1.18 Iti kho, bhikkhave, desitaṁ mayā purāṇakammaṁ, desitaṁ navakammaṁ, desito kammanirodho, desitā kammanirodhagāminī paṭipadā.
sn35.146:1.19 Yaṁ kho, bhikkhave, satthārā karaṇīyaṁ sāvakānaṁ hitesinā anukampakena anukampaṁ upādāya, kataṁ vo taṁ mayā.
sn35.146:1.20 Etāni, bhikkhave, rukkhamūlāni, etāni suññāgārāni. Jhāyatha, bhikkhave, mā pamādattha; mā pacchāvippaṭisārino ahuvattha. Ayaṁ vo amhākaṁ anusāsanī”ti.
sn35.146:1.21 Paṭhamaṁ.