Ajjhattaaniccahetusutta

sn35.140:1.1 “Cakkhuṁ, bhikkhave, aniccaṁ.

sn35.140:1.2 Yopi hetu, yopi paccayo cakkhussa uppādāya, sopi anicco.

sn35.140:1.3 Aniccasambhūtaṁ, bhikkhave, cakkhu kuto niccaṁ bhavissati …pe…

sn35.140:1.4 jivhā aniccā.

sn35.140:1.5 Yopi hetu, yopi paccayo jivhāya uppādāya sopi anicco.

sn35.140:1.6 Aniccasambhūtā, bhikkhave, jivhā kuto niccā bhavissati …pe…

sn35.140:1.7 mano anicco.

sn35.140:1.8 Yopi, bhikkhave, hetu yopi paccayo manassa uppādāya, sopi anicco.

sn35.140:1.9 Aniccasambhūto, bhikkhave, mano kuto nicco bhavissati.

sn35.140:1.10 Evaṁ passaṁ, bhikkhave, sutavā ariyasāvako cakkhusmimpi nibbindati …pe… jivhāyapi nibbindati …pe… manasmimpi nibbindati,

sn35.140:1.11 nibbindaṁ virajjati; virāgā vimuccati; vimuttasmiṁ vimuttamiti ñāṇaṁ hoti.

sn35.140:1.12 ‘Khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyā’ti pajānātī”ti.

sn35.140:1.13 Sattamaṁ.